Read Lashi TARHA" AGYI 20 Bible Online

TARHA" AGYI 20 - Lashi bible

TARHA" AGYI 20

¹Mougzhung: shoid Dan mo mougpyi: shoid Berasheba mo Israela byu yi dangain"- bidthu shoid Gilead mung" mo bang: dangain" gi khi: thui: ri tau' yu ago". Nyangnu" gi Mizpa joyoo mo ASEING shidkhoin" moo daphung: kyeing" koid wigi zeing: foem: nyid boem ago".

²Israela byumyu" kung: dangain" bang: da" vhujhung: yigi he: Mangso byu yi zeing: foem: nyid jang" moo bo boem ago". Houg: moo gyizoo: 400,000 yug nghoid ago".

³Hau: ayo, moo Benyamin kung: bang: gi Mizpa joyoo moo Israela byumyu" dangain" mo, zeing: foem: nyid boem thui: ri shau" gyo: ago". Israela byumyu" yigi «He: youg: moo" khasu" bue" ziri ngoonu" ri tid kyoo" ge» ga: myid: ago".

⁴Nya: dangcang: myhi' ri said pyam byid: shau" da" Levi byu gi «Ngoo yo' nga" dangcang: myhi' gi yhe: theing: yhoeb wa shid re" Benyamin moug: mo Gibea khyoo: yhi: bye:.

⁵Gibea voobyu yigi ngoo ri re" myheig yu wa shid re" myen" ri yhoem: ri re" vang: ago". Nyangnu" gi ngoo ri said wa soin' ago". Hau: gungthid nga" dangcang: myhi' ri doin: zeig rue" wigi nyang: shid: lo" da:.

⁶Ngoo gi nya: manggung ri yu lho: adu du jab phyid wigi Israela byumyu" daxe: eig kung: khyoo: dakung: ri dadu du foin: kaid byid: zi nghoid. He: byu yigi akhyeing" ashoeb moo" ngoonu" phung: moo shoid boem abye: go".

⁷Hid: moo nanu" dangain" bang: gi Israela byumyu" yi nghoid ago". He: khyoo: yo' sen: wigi ngoonu" cikoid wa lha"» ga: tid.

⁸Byumyu" yi dangain" dage" to' yab lho: tid zigi «Ngoonu" mo zoem" moo nyid bang: nghoid nghoid- yhoem: moo nyid bang: nghoid nghoid dayug we' yhoem: aloo" wa.

⁹Ngoonu" hid: su" koid wa. Ngoonu" gi me" lab lho: Gibea byu yiri yhe: zain: wa byu dayham" khyen: yu wa.

¹⁰Israela mung" mo yuggi daxi: boem mo daboem gi gyizoo: yi shid re" zookhoo: pang" thoug byid: wa. Gootu: deing da" bang: gi yhe: wigi Israela byu yi phung: moo nyangnu" shoid vhang: boem bye: da" akhyeing" ashoeb moo" shid re" Gibea voobyu yiri yooboo dam yhe: byid: wa zi nghoid» ga: tid.

¹¹Houg: yoomo Israela mung" mo yuggi yi dangain" bang: gi myid shoin" khyoo: dakhaid za: voogung ri meing: zain: wa shid re" zeing: foem: nyid ago".

¹²Israela byumyu" kung: yigi Benyamin byumyu" kung: yi mougmyid goem: sho' khyoo: lagyoo: nhang: kaid wigi «Nanu" shoid bye: da" he: youg: moo" gi khasu" nghoid lha".

¹³Gibea mo akhyeing" da" bang: ri ngoonu" lo, moo kaid byid: ge'. Houg: lang" ngoonu" gi nyangnu" ri yo" said pyam wigi Israela byumyu" yi moo he: akhyeing" da" moo" ri yo" yu pyam wa nghoid da» ga: tid nhang: kaid da:. Nghoid loug we' Benyamin byumyu" yigi gootu: Israela byumyu" yi dang: ri atam" gyoo: goo" nghoid da:.

¹⁴Gootu: Israela byumyu" yiri gyi zain: wa shid re" Benyamin moug: voomoo" khang" moo" mo bang: gi Gibea khyoo: ju" re" ago".

¹⁵Nyangnu" gi hau: nyid" ri nyangnu" voomoo" joem mo gyizoo: eig moin khyug khyeing" yug khe: yu ago". Hau: tho' agoo" gooki' lid khyen: yu da" Gibea mung" byu lo, kung" kung" bang: nyhed shoo: yug ri zheing" foem: nyid ago". Nyangnu" mo yugkhang" moo" gi xam: khaid rilang" ashoid loo: zang" sho' lug lhei" se' lhei" da" bang: nghoid ago".

¹⁶

¹⁷Israela byumyu" yigi Benyamin byumyu" kung: ri abo nghab loo: gyi phajhi" jhau" da" gyizoo: 400,000 yug zeing: foem: nyid ago".

¹⁸Israela byumyu" yigi noku joyoo Bethela khyoo: yhe: lho: houg: moo nyangnu" gi Mangsoo ri «Benyamin byumyu" kung: yiri kha: byumyu" kung: yi xang: shi" gyi yhe: zain: wa lha"» ga: myid: ago". ASEING gi «Yuda byumyu" kung: yi shi" zain: ge'» ga: tu" da:.

¹⁹Houg: yoomo Israela byumyu" yigi thang: nyid" nab soin: ri to' yhe: lo" lho: Gibea voomoo" nam moo gyidab yhe: koid nyid ago".

²⁰Nyangnu" gi Benyamin kung: mo gyizoo: yiri gyi yhe: zain: wa shid re" gyizoo: yiri voomoo" khyoo: myonhoo: shu: lho: joyoo khyo' to" ago".

²¹Benyamin kung: mo gyizoo: yi thu re" lho: bid avang shi" ri nyangnu" gi Israela gyizoo: eig moin eig khyeing" yug ri said pyam ago".

²²Hau: thang: Israela byumyu" yigi noku joyoo khyoo: yhe: lho: ASEING shidkhoin" moo myen" thang: ju" sho' yhe: koug ngau nyid boem ago". Nyangnu" gi nyang: ri «Ngoonu" mang: nhung" Benyamin kung: yiri gyi zain: wa ngoonu" doem yhi: shi" wa rhe"» ga: myid: ago". ASEING gi «Yhi: ge'» ga: tid da:. Houg: yoomo Israela gyizoo: yigi yoem: yo" wigi shid mo nyid" yo' dakhyoo" ti" nyangnu" gyizoo: yiri joyoo khyo' to" ago".

²³

²⁴Nyangnu" gi Benyamin gyidab ri eig lheing: ein: lheing: yhe: doem thougtheung zain: boem ago".

²⁵He: eig lheing: ein: lheing: ri we' Benyamin byu yi Gibea mo thu re" lho: he: lheing: moo: nyangnu" gi gyi phajhi" jhau" ci: da" Israela gyizoo: damoin shid khyeing" yug ri said pyam ago".

²⁶Hau: thang: Israela byumyu" yi dangain" Bethela khyoo: do, yhe: boem wigi yhe: koug ngau ago". Nyangnu" gi hau: joyoo ASEING shidkhoin" moo myen" thang: ju" sho' azoo: ashug loo: nyid boem ago". Nyangnu" gi ASEING shidkhoin" moo zoem" khau: da" xoin" yo' dayham" gi gung goin" nghe' ngei" xoin" khyo" xoin" to' byid: ago".

²⁷Hau: pyaid moo Mangso Dang: Theing Kuid: gi Bethela moo jo, da:. Arun da" nya: myid: zoo: nghoid lho: Eleaza da" nya: yuggi zoo: nghoid da" Phineha gi hau: ziri yu" coung: yug nghoid da:. Byumyu" yigi ASEING ri «Ngoonu" mang: nhung" Benyamin bang: ri ngoonu" gyi yhe: doem zain: shi" wa rhe". Anghoid lang" ngoonu" to" pyam wa rhe"» ga: myid: ago". ASEING gi «Yhe: zain: ge'. Nab yo nyid" ngoo gi nanu" ri nyangnu" adang moo oung: pyam nhang: wa» ga: tid da:.

²⁸

²⁹Houg: yoomo Israela gyizoo: yi dayham" ri Gibea lheing khoem moo goug" nyid nhang: ago".

³⁰Hau: thang: soem" nyid" eig nyid" moo Benyamin gyidab ri zain: wa shid re" to' yhe: lo" wigi shid nyid" cang koid yhang: ti" nyangnu" gyizoo: yiri Gibea shoid khyoo: myonhoo: shu: wigi joyoo khyo' to" ago".

³¹Benyamin byumyu" yigi gyi zain: wa shid re" thu re" lho: houg: bang: ri voomoo" mo vi: khyoo: shu" yhe: lo" ago". Nyangnu" gi shid mo nyid" cang koid yhang: ti" Bethela khyoo: yhe: da" khyoo: yo' Gibea khyoo: yhe: da" khyoo: dain" pyoid yoo moo Israela byu yiri said pyam ago". Nyangnu" gi Israela byu soem" xi: koo: ri said pyam ago".

³²Benyamin byumyu" yigi «Ngoonu" gi nyangnu" ri shid mo nyid" cang yhang: ti" oung: pyam bye:» ga: tid. Nghoid loug we' Israela byumyu" yigi nung zoid zoid phang: wa soin' to" boem yoomo nyangnu" ri voomoo" mo khyoogung khyoo: shu" tang" yhe: lo" ago".

³³Houg: yoomo Israela gyidab zeing phang: shu" lho: Balatama moo doem zeing: foem: uri Gibea lheing khoem moo goug" nyid boem da" bang: gi nyeigdain tung" nyangnu" goug" jo, da" voomoo" lheing khoem lug pyo' khung" mo tang" thu re" ago".

³⁴Israela byumyu" yi mo gooki' lid khyen: to" da" gyizoo: damoin gi Gibea ri yhe: zain ago". Gyi khaid zain: khyoo: gi gye" thain: lo da:. Benyamin byumyu" yigi nyangnu" soem" joem: lo" nyid ziri aboin: goo" nghoid da:.

³⁵ASEING gi Israela byumyu" yiri Benyamin kung: bang: adang moo oung: doid nhang: da:. Israela byumyu" yigi hau: nyid" moo gyivoo 25100 yug ri said pyam ago".

³⁶Houg: lang" «Benyamin byumyu" yigi nyangnu" soem" bye: ziri boin: ago". Israela gyidab zeing gi Gibea lheing khoem moo nyangnu" wigi goug" jo, nhang: da" bang: ri loem boem yoomo Benyamin byumyu" yi jang" mo nung zoid zoid phang: ago".

³⁷Hau: byu yigi Gibea khyoo: myab za: tang" yhe: lo" ago". Nyangnu" voomoo" khyoo: byo sain" vang yhe: lho: houg: mo yugkhang" moo" ri said pyam ago".

³⁸Israela gyidab zeing yo' goug" jo, da" bang: gi avoid byid: wa shid re" soin' to" ago". Voogung khoug: mo myikhoug" jhoem: thei" zeing thu re" ziri myang lang"

³⁹Gyi khaid jang: tunggung moo nyid boem da" Israela byu yigi doem tau" lo ago". He: lheing: gi Benyamin byumyu" yigi Israela byu soem" xi: yug ri bain said pyam abye: go". Nyangnu" gi «Nghoid bye:- ngoonu" gi nyangnu" ri shid nyid" cang yhang: ti" oung: pyam bye:» ga: tid boem ago".

⁴⁰Hau: thang: avoid thu re" da:. Voogung mo myikhoug" neing" thu re" da:. Benyamin byu yigi nyangnu" nungthang khyoo: yu" kaid ri voomoo" goin" myi: nge" lo" nyid ziri yu" mau" ago".

⁴¹Hau: thang: Israela byumyu" yigi doem lheing: tau" lo da:. Benyamin byumyu" kung: yigi nyangnu" soem" joem: loo" wa ziri boin: boem yoomo byoo dain yoeb lam" nyid boem ago".

⁴²Nyangnu" gi Israela byumyu" yi mo zoid phang: lo" wigi janggyoin: khyoo: tang" phang: lo" ago". Nghoid loug we' nyangnu" aloid byoin goo" nghoid da:. Nyangnu" gi gyidab zeing yo' akhid" voomoo" mo thu re" da" mo, agyoo: moo myheug yu shau" boem lho: nyangnu" dangain" said toem" pyam zi shoug" ago".

⁴³Israela byumyu" yigi gyivoo yiri lhoung to" wigi Gibea bidthu shoid gyi vhu" ju" sho' atheing: anoo: cang khaid wigi cang said pyam ago".

⁴⁴Ge thang da" Benyamin byumyu" gyizoo: yi damoin shid khyeing" yug ri said pyam shoug" ago".

⁴⁵Gootu: bang: gi tau" lho: Rimon lug pyo' janggyoin: khyoo: tang" phang" ago". Nyangnu" mo wim: khyeing" ri khyoo: moo said pyam shoug" ago". Israela byumyu" yigi deing da" bang: ri Gidom khyoo: xo' lho: cang khaid wigi eig khyeing" said pyam ago".

⁴⁶Hau: nyid" said pyam shau" boem da" Benyamin gyizoo: yi dangain" rigi eig moin wim: khyeing" yug nghoid ago". Nyangnu" mo dangain" bang: gi sarhi' gyizoo: yi nghoid.

⁴⁷Nghoid loug we' khyug shoo: yug gi janggyoin: mo Rimon lug pyo' khyoo: phang: loid lo" ago". Nyangnu" houg: moo lhammoo" myid: khyab yhe: nyid boem ago".

⁴⁸Israela byumyu" yigi deing da" Benyamin byumyu" kung: yi gyi dalheing: doem thougtheung koid wigi yuggi- myiyi:- zooshang:- yo' gougnyhoug joem dangain" ri said pyam ago". Hau: khung" mo voo khang" moo" ri nyangnu" nghe' pyam.