Read Lashi TARHA" AGYI 6 Bible Online

TARHA" AGYI 6 - Lashi bible

TARHA" AGYI 6

¹Israela byumyu" yigi ASEING ri thougtheung yooboo dalheing: doem shoid ago". Houg: yoomo nyang: gi nyangnu" adang moo Midian byu yi wigi nyhed zain vhoeb nhang: da:.

²Midian byumyu" yigi Israela byumyu" yi tho' yoem: je bo ago". Houg: yoomo Israela byumyu" yigi lug khyung: yo' bouggung joem mo gau: da" joyoo joem moo phang: gau" nyid ago".

³Israela byumyu" yi shivoo: myau: shi" shoo" khang" moo" Midian byumyu" yigi Amaleg byu yi yo' dain" pyoid yoo moo nyid boem da" byumyu" yi yo' dage" nyangnu" ri gyi re" khaid zain: ago".

⁴Nyangnu" gi hau: mung" moo dab re" koid lho: mougpyi: shoid Gaza lheing khoem ju" sho' shivoo: myau: shi" joem ri ze" shoin' pyam byid: ago". Nyangnu" gi yang- nu:- loo zei: joem dangain" ri yu pyam lho: Israela byumyu" yi dei nyid wa shid re" ci: we' ateing too" nghoid da:.

⁵Nyangnu" gi nyangnu" da" yhoem: gougnyhoug joem yo' dage" lhoung re" wigi zoem" joem koid yoomo jhenkhyeug phung: yhang: ti" thu: da:. Nyangnu" yo' nyangnu" da" Gola-ug joem gi atho' nghab loo sho' myo: da:. Nyangnu" re" wigi mung" ri mhoin' koid pyam ago".

⁶Houg: yoomo Israela byumyu" yigi nyangnu" ri ayo" thougtheung nghoid da:.

⁷Hau: thang: Israela byu yigi Midian byu yiri thougtheung jang" moo pang" thoug yu wa shid re" ASEING ri yoid mho' ago".

⁸Houg: yoomo ASEING gi Israela byumyu" yi da" ASEING Mangso mo he: mungdang: ri nyangnu" jhang voin yhi: wa da" lapi: dayug ri nyangnu" jhang nhang: kaid da:. Hau: mungdang: gi «Egutu mung" moo join koid nyid jang" mo ngoo nanu" ri shu" thu loo bye:.

⁹Ngoo nanu" ri Egutu byumyu" yi lo, mo we' he: mung" moo nanu" ri gyi koid da" bang: lo, mo we' khyoid yu bye:. Nanu" shid khyoo: yhe: loo" lang" ngoo nyangnu" ri khaid thu pyam byid: bye:. Houg: lho: nyangnu" mougmyid ri ngoo nanu" ri byid: bye:.

¹⁰Ngoo gi nanu" ASEING Mangsoo nghoid wigi akhid" nanu" nyid da" mung" moo nyid boem da" Amori byumyu" yi yu phara" joem ri ano' wa khyoo: ri ngoo tid bye:. Nghoid loug we' nanu" nga" dang: ri atam" gyoo: goo" nghoid ago"» ga: da:.

¹¹Hau: thang: ASEING da" moug: lagyoo: gi Ophra voogung khyoo: ju" re" lho: Abieza kung: mo Yoshu seing: da" shookhi" gam yang: moo zhung: jo, da:. Nya: zoo: Gideon gi Midian byumyu" yi amyang baja" ga: zabyid nang: jang: moo sam: sam: za: sungsoo: nang: nyid da:.

¹²ASEING da" moug: lagyoo: gi houg moo yhe: thu shug lho: nyang: ri «Yoem: bo da" sarhi' phoo we"- ASEING gi nang yo' dage" nyid da» ga: tid da:.

¹³Gideon gi nyang: ri «Nheigboo phoo we"- ngoo myid: ba- ASEING wigi Egutu mung" mo khasu" shu" thu lo da" khyoo:- ASEING ngoonu" ri lhung koid da" khyoo: ri ngoonu" phoug" phyid" yi ngoonu" ri tid kyo" boem da" mau" pho" moo" joem dangain" gi cibui" bye: lug lha". ASEING gi ngoonu" ri she: pyam pyam lho: Midian byumyu" yi lo, moo ngoonu" ri too" kho' abye:» ga: tid.

¹⁴Hau: thang: ASEING gi nyang: ri «Re" yoem: zeing yo' yhe: lho: Midian byu yi lo, mo Israela byumyu" yiri yhe: khyoid yu we' ngoonyang: nang ri nhang: kaid da» ga: tid da:.

¹⁵Gideon gi «Nghoid loug we' Aseing: we"- ngoo gi Israela byumyu" yiri khasu" koid wigi yo" khyoid yu wa lha". Nga" byumyu" kung: gi Manashe kung: mo yoem: je neing: thang da" kung: nghoid da:. Ngoo gi nga" yhoem: byu yi mo je yhouggyen: su: anghoid» ga: phug tid da:.

¹⁶ASEING gi «Nang hau: moo" ri yo" zei: wa ciwim gari ngoo gi nang ri pang" thoug wa. Nang gi Midian byumyu" yiri byu dayug ri za: yhang: ti" lei lei nyangnu" ri mhoin' yo" koid pyam ri" wa» ga: tid.

¹⁷Gideon gi «Nang ngoo ri vho: ngei zi nghoid rigi nang gyeing" nyang: ASEING nghoid ziri sagse: dayham" ci: shug byid: wa.

¹⁸Ngoo re" jhang zooshug xoin" aci: ju" ri" ri" gi jeju" khyo" aphang: loo" byid: shi"» ga: tid. Nyang: gi «Nang doem tau" ju" ri" sho' ngoo nyid nyid wa» ga: tid.

¹⁹Houg: yoomo Gideon gi nya: yhoem: khyoo: lo" wigi coidbaid nu" dadu: said yhung- cen: moin" wim: byi: ri doocid" akaid looza: zooyho' koid da:. Nyang: gi shoo" ri kyang khoug: moo kaid- shoo" yeing rigi oug" moo kaid lho: shookhi" gam yang: moo nyid da" ASEING moug: lagyoo: jhang ci: yhe: wigi hau: joem ri nyang: ri yhe: byid: da:.

²⁰Moug: lagyoo: gi nyang: ri «Hau: shoo" yo' zooyho' ri he: lug moo" boem tho' moo ke" to" lho: hau: adang moo shoo" yeing foid gyoin: we'» ga: tid da:. Gideon gi hougsu" koid bye:.

²¹Hau: thang: ASEING da" moug: lagyoo: gi lo, yhoin" kaid lho: nyang: zei: ci: da" vasi" thang: wigi hau: shoo" yo' zooyho' ri tain" da:. Myi: gi hau: lug moo" boem mo dab thu re" lho: shoo" yo' zooyho' ri nge" pyam da:. Hau: thang: moug: lagyoo: gi byug loo" khari" da:.

²²Hau: thang: Gideon gi nyang: ASEING da" moug: lagyoo: ri myang bye: ziri boin: re" lho: nyang: gi «Myhang: thang da" ASEING we"- re" moug: lagyoo: ri ngoo myonhoo: yo' myo, khung" myang bye:» ga: gyoug nain" ziyo' tid da:.

²³Nghoid loug we' ASEING gi nyang: ri «Myenjham" yug yoo baja"- agyug- nang ashid: wa» ga: tid.

²⁴Gideon gi houg: moo: ASEING shid re" phoin: daloem: koid lho: hau: ziri «ASEING gi myenjham" yug yoo su: nghoid» ga: myheing da:. (Hau: zigi Abieza kung: bang: seing: da" Ophra moo akhid" ju" sho' jo, ashi".)

²⁵Hau: myen ri ASEING gi Gideon ri «Re" pho da" nuloo: yo' nyhed zain bo da" nuloo: gootu: dadu: ri yu lho: re" pho da" Bala phoin: ri phyo' khyo' pyam we'. Hau: akhoug: moo bo da" Ashera yu phara" myhi' da" soolhoo: ri zain: khyo' pyam we'.

²⁶He: myid boem" moo re" ASEING Mangsoo shid re" goolhoo' za: zhug da" phoin: daloem: ri koid we'. Hau: thang: ri nuloo: eig du: ein: du: ri she: yu lho: jhungshug xoin" khyo" nang zain: khyo' pyam da" Ashera da" soolhoo: ri thang" koid wigi gung goin" ri nghe' ngei" we'» ga: tid da:.

²⁷Hougsu" yoomo Gideon gi nya: dei zoo: daxi: yug ri shu" lho: ASEING nyang: ri tid bye: ziri koid da:. Nyang: gi nyid" ri hougsu" koid wa shid re" nya: yhoem: byu yiri yo' voobyu yiri gye" gyoug yoomo nyang: gi myen" ri koid da:.

²⁸Voobyu yi thang: nyid" nab soin: no' mo to' re" boem ri Bala phoin: yo' Ashera da" soolhoo: gi zain: khyo' pyam lho: houg moo koid to" da" phoin: dang moo hau: nuloo: eig du: ein: du: ri nghe' ngei" byid: pyam bye: ziri myang boem ago".

²⁹«He: zi hang" koid lha"» ga: nyang: cang" myid: ago". Nyangnu" myid: joeb yu" ri hau: zi koid yug gi Yoasha da" yuggi zoo: Gideon nghoid ziri se' ago".

³⁰Hau: thang: nyangnu" gi Yoasha ri «Ngoonu" nyang: ri yo" said pyam wa shid re" re" yuggi zoo: ri hid: khyoo: shu" thu ri" we'. Nyang: gi Bala phoin: yo' hau: anam mo Ashera da" soolhoo: ri zain: khyo' to" da» ga: tid da:.

³¹Nghoid loug we' Yoasha gi nyang: ri re" rue" bang: ri «Nanu" Bala shoid bo dab go" rhe". Nanu" gi nyang: ri goem loem byid: go" rhe". Bala shoid bo dab su: hang" nghoid loug we' moug: aboo" shi" ri said pyam shoug" goo" baja". Bala gi yu phara" nghoid rigi nyang: nya: gung nyang: nyang: goem loem yu nhang: ge'. Nya: da" phoin: gi baid khyoeb pyam zi shau" abye: go"» ga: tid da:.

³²Hau: bidnyid mo Gideon gi Yerubala ga: myeing yo" lo" da:. Ciwim gari Yoasha gi «Bala gi nyang: nya: gung ri goem loem yu baja". Nya: da" phoin: gi baid khyoeb pyam zi shau" abye: go"» ga: tid yoomo nghoid.

³³Hau: thang: Midian byumyu" dangain"- Amaleg byu yi yo' dain" pyoid yoo moo nyid boem da" byu yi dangain" mo, zeing: foem: lho: Yodan gyid lang ri gu dab wigi Yezerela janggyoin: moo dab koid nyid ago".

³⁴ASEING da" Venyi: gi Gideon ri vhu" she: wigi Abieza da" kung: bang: nya: thang: cang goo" wa shid re" khe: da" laboo" moid kaid da:.

³⁵Nyang: gi Manashe mougmyid eig du goin" moo nyid boem da" bang: ri nya: thang: cang boem wa shid re" khe: yu wa lagyoo: yiri jang: sho' nhang: kaid da:. Nyang: gi Ashe- Zebulun yo' Nabthali kung: joem khyoo: lagyoo: joem ri nhang: kaid lho: houg: bang: we' nyang: yo' re" xo' tei" da:.

³⁶Hau: thang: Gideon gi Mangsoo ri «Nang gi Israela byumyu" yiri khyoid yu wa shid re" ngoo ri ci: wa nang myid phyed too" bye:.

³⁷Gi bye:. Ngoonu" sungsoo: nang: jang: moo ngoo soug" goug" dayham" to" too" wa. Nab soin: ri nghain: gi myidgung moo agyoo" lho: soug" goug" dang moo za: gyo" dab jo, nghoid rigi Israela byumyu" yiri khyoid yu wa shid re" nang ngoo ri ci: wa zi nghoid ziri ngoo si' wa» ga: tid da:.

³⁸Gi" gi nyang: hougsu" bue" da:. Gideon gi thang: nyid" nab soin: no' to' re" wigi hau: soug" goug" ri nyang: ne shoem' kaid ri khu daloem: byeung" sho' nghain: yau gyoo" re" da:.

³⁹Hau: thang: Gideon gi Mangsoo ri «Ngoo ri nheig ayoo- dang: dalheing: doem tid nhang: shi" we'. Jeju" mo soug" goug" yo' dalheing: doem jham" yu" nhang: shi" we'. He: lheing: gi soug" goug" ri hei' nhang: lho: myidgung ri jhu' nhang: we'» ga: tid da:.

⁴⁰Hau: myen ri Mangsoo gi hougsu" nyang: koid bye:. Thang: nyid" nab soin: ri soug" goug" gi hei' jo, lho: myidjang gi nghain: yo' jhu' jo, da:.