Read Lashi TARHA" AGYI 7 Bible Online

TARHA" AGYI 7 - Lashi bible

TARHA" AGYI 7

¹Danyid" ri Gideon yo' nya: byu yigi nab soin: no' to' lho: Harod gyid bug yam moo dab koid nyid ago". Midian byumyu" yi dab gi nyangnu" mo mougzhung: shoid More bouggung nam mo janggyoin: moo nghoid da:.

²ASEING gi Gideon ri «Midian byumyu" yi adang moo nyangnu" oung: yu nhang: wa. Nang yo" da" byu yigi nga" shid re" sung myo: ago". Nyangnu" nya: yoem: yo' oung: pyam zi nghoid ga: nyangnu" myid soin: yu goo" wa. Houg: lang" ngoo ri ci: asoin: goo" wa.

³Byumyu" yiri ‹Gyug bang: hang" nghoid loug we' yhoem: khyoo: phang: loo" ge'. Ngoonu" gi he: Gilead boem moo nyid wa› ein: tid pyo: kaid ge'» ga: tid da:. Houg: yoomo eig moin eig khyeing" tau" phang: lo" ago". Nghoid loug we' damoin gi nyid shi".

⁴Hau: thang: ASEING gi Gideon ri «Re" byu yi sung myoo: ashi". Nyangnu" ri gyid lang khyoo: shu" gyo" loo" we'. Houg: moo ngoo gi re" shid re" nyangnu" ri kho' byid: wa. Nang yo' dage" yhi: eung: ein: ngoo tid da" yug gi yhe: ri" wa. Nang yo' dage" ayhi: eung: ein: ngoo tid yug gi ayhi: wa» ga: tid da:.

⁵Gideon gi hau: byu yiri gyid lang khyoo: shu" gyo" lo" da:. Houg: lho: ASEING gi nyang: ri «Gyid ri lakhuid" yhang: ti" nyang: nya: yhoo: yo' yo, shug da" yugkhang" moo" ri gyid shug wa shid re" poid thug thoug bang: yugkhang" moo" mo kho' yu we'› ga: tid da:.

⁶Byu soem" shoo: yug gi gyid ri nyangnu" lo, mo geig yu lho: yo, shug ago". Gootu: dangain" bang: gi gyid shug wa shid re" nyangnu" poid thug thoug boem ago".

⁷ASEING gi Gideon ri ‹Ngoo gi nanu" ri khyoid yu lho: hau: gyid ri lo, yo' geig yu wigi yo, shug da" byu soem" shoo: yug yo' dage" Midian byu yiri oung: pyam wa akhang" ngoo nang ri byid: wa. Gootu: yugkhang" moo" ri yhoem: khyoo: tau" loo" goo" wa shid re" tid we'» ga: tid da:.

⁸Houg: yoomo zookhoo: yo' laboo" joem voin bang: nghoid da" hau: byu soem" shoo: mo jain" da" Israela byu dangain" ri yhoem: loo" nhang: kaid da:. Midian byumyu" yi da" dab gi nyangnu" vhoo: mo janggyoin: moo jo, da:.

⁹Hau: myen ASEING gi Gideon ri «To' lho: dab ri yhe: khaid zain: we'. Ngoo gi nang ri hau: adang moo oung: doid nhang: wa.

¹⁰Nghoid loug we' nang hau: ziri gyi yhe: zain: wa gyoug rigi hau: dab khyoo: re" dei zoo: Pura yo' gyoo" yhi: we'.

¹¹Nyangnu" citid nyid ziri yhe: shoug" gyoo: wa. Houg: lang" hau: ziri gyi yhe: zain: wa voem" da" myid nang shoug" yu loo wa. Houg: yoomo Gideon yo' nya: dei zoo: Pura gi gyivoo yi da" dab athang: khyoo: gyo" yhe: da:.

¹²Midian byumyu" yi Amaleg byumyu" yi yo' dain" pyoid yoo moo nyid boem da" byumyu" yigi janggyoin: moo jhenkhyeug joem yo' dakhyo" byeung" jo, ago". Nyangnu" gi panglai: gyid yam mo midcoo: myhoo' myo: da" Gola-ug joem yo" ago".

¹³Gideon ju" yhe: ri byu dayug gi nya: byencang" phoo ri yhoebmo, daloem: khyoo: ri tid kyo" nyid ziri yhe: shau" gyo: da:. Nyang: gi «Yoono, cen: moin" zooyho' daloem: ngoonu" dab khyoo: lheing: gyo" lo lho: zoem" daloem: ri lo zang" da:. Zoem" gi leung lo" wigi myidgung moo pyi" tab nghoid jo, ziri ngoo yhoebmo, myang» ga: tid da:.

¹⁴Nya: byencang" phoo gi «Hau: zooyho' gi Israela byumyu" Yoasha da" yuggi zoo: Gideon da" sham: nghoid da:. Gootu: dang: kang: age bui" nghoid da:. Mangsoo gi Midian byumyu" yi yo' ngoonu" gyidab goin" adang moo nyang: ri oung: doid nhang: bye:» ga: phug tid da:.

¹⁵Gideon gi byu hau: yug da" yhoebmo, yo' dang: kang: ri shoug" gyoo: lang" nya: poid lug poid thug thoug wigi ASEING ri goeb pid da:. Hau: thang: nyang: gi Israela dab khyoo: doem tau" lo" lho: «Too' ge'. ASEING gi nanu" ri Midian gyidab adang moo oung: pyam nhang: bye:.

¹⁶Nyang: gi nya: byu soem" shoo: yug ri soem" phung: kho' lho: yugkhang" moo" ri laboo" daloem: yo' akhoug: moo myi: doem kaid to" da" jhuang: daloem: loem: byid: da:.

¹⁷Nyang: gi nyangnu" ri «Zung" yu" nyid ge'. Ngoo hau: dab athang: moo ju" yhi: lang" ngoo koid yhang: ti" koid ge'.

¹⁸Nga" da" phung: bang: yo' ngoo laboo" joem ri moid kaid lang" nanu" laboo" joem ri dab lheing khoem moo moid lho: ‹ASEING yo' Gideon shid re" oo"› ein: nyho: yoid ge» ga: tid da:.

¹⁹Gideon yo' nya: byu dashoo: yug gi gam gung ju" yid ri gyi zung" yug thid go" thang: ri nyang: dab thang: khyoo: ju" yhe: ago". Hau: thang: nyangnu" gi laboo" joem ri moid lho: nyangnu" ci: da" jhuang: joem ri baid kho' ago".

²⁰Gootu: eig phung: we' houg: yo' dakhyoo" koid ago". Nyangnu" gi nyangnu" da" lo, kung" shoid moo myidoem ci: wigi lo, yo shoid moo laboo" ci: lho: ‹ASEING yo' Gideon da" shamcoin" o"› ga: nyho: yoid ago".

²¹Yugkhang" moo" gi dab lheing khoem nyang: nya: joyoo moo yab jo, ago". Gyivo gyidab goin" gi nyho: wigi tau" phang: lo" ago".

²²Gideon da" byu gi nyangnu" da" laboo" moid nyid boem uri ASEING gi gyivo gyidab ri nyangnu" sham: yo' nyang: cang" nyang: gyi zain: nhang: da:. Nyangnu" gi Zarethan shoid khyoo: Bed Shila yo' Tabad nam mo Abemehola voogung ju" sho' tang" phang: lo" ago".

²³Hau: thang: Nabthali- Ashe kung: yo' Manashe moug: eig du goin" mo bang: ri khe: yu lho: nyangnu" gi Midian byu yiri cang khaid ago".

²⁴Gideon gi Ephrim boem moug: dangain" khyoo: jang: sho' lagyoo: joem ri nhang: kaid lho: «Gyoo" lo wigi Midian byumyu" yiri gyi zain: ge'. Yodan gyid lang yo' Bethabara lang ju" sho' Midian byumyu" yiri agu: dab nhang: goo"» ga: tid nhang: kaid da:. Ephrim byumyu" kung: mo bang: gi zeing: ri" wa khe: yu shoug" lho: nyangnu" gi Yodan gyid lang yo' Bethbara gyid lang zoo: ju" sho' zung" pyam ago".

²⁵Nyangnu" gi Midian zoug: nghoid boem da" Oreb yo' Zeeb ri myheig yu lho: Oreb ri Oreb lug pyo' moo yo' Zeeb rigi Zeeb da" zabyid nang: jang: moo said pyam ago". Nyangnu" gi Midian byumyu" yiri xo' lho: cang khaid wigi Oreb yo' Zeeb da" vhuloem ri Yodan gyid lang bidthu shoid moo nyid da" Gideon jhang ci: loo" byid: ago".