Read Lashi TARHA" AGYI 8 Bible Online

TARHA" AGYI 8 - Lashi bible

TARHA" AGYI 8

¹Hau: thang: Ephrim byu yigi Gideon ri «Midian byumyu" yiri nang yhe: zain: da" uri ngoonu" ri ciwim akhid: go" lha". Nang ciwim yoomo ngoonu" ri hid: su" koid lha"» ga: myeing" myo: ago". Nyangnu" hau: khyoo: ri soo" soo" myeing" myo: ago".

²Nghoid loug we' nyang: gi nyangnu" ri «Ngoo yo" koid zigi nanu" koid bye: da" moo" yo' khasu" ayo" tu' goo" nghoid da:. Nanu" Ephrim kung: mo bang: koid da" moo" dajhi' lang" nga" byumyu" kung: goin" bang: koid da" moo" tho' je phoug" dab da:.

³Gyeing" ga: rigi Mangso yoem: so' khyo" nanu" gi Midian zoug: Oreb yo' Zeeb eig yug ri said pyam ago". Houg: ziyo' ngoo koid ziri khasu" yo" tu' goo" wa» ga: tid da:. Nyang: hidsu" tid lang" nyangnu" nheig ayoo: loogoo" nghoid da:.

⁴Hau: ayo, moo Gideon yo' nya: byu soem" shoo: yug gi Yodan gyid lang khyoo: ju" lo" lho: hau: ziri gu: dab da:. Nyangnu" myung: nghoid loug we' gyivoo yiri cang khaid boem ashi".

⁵Nyangnu" Sukhod khyoo: ju" boem lang" nyang: gi hau: voo byu yiri «Jeju" khyo" nga" byu yiri zooyho' dajhi' byi: zhoo" ge'. Nyangnu" gi myung: bye:. Ngoo gi Midian khokham yi nghoid da" Zeba yo' Zalmunna ri cang khaid nyid» ga: tid da:.

⁶Nghoid loug we' Sukhod vhujhung: yigi «Ngoonu" ciwim yoomo re" gyidab ri zoo: noem se' byid: wa la". Nang gi Zeba yo' Zalmunna ri ayo" myheig shi" nghoid da» ga: tid ago".

⁷Houg: yoomo Gideon gi «Gi bye:- ASEING gi Zeba yo' Zalmunna ri nga" lo, moo ab byid: lang" ngoo gi dain" pyoid yoo mo zu: kyang: yo' zu: gam wigi nanu" ri lo baid wa» ga: tid da:.

⁸Gideon gi Penuela khyoo: yhe: lho: houg: mo bang: ri houg: yo' dayhang: ti" za: yhe: mho' da:. Nghoid loug we' Penuela mo bang: we' Sukhod mo bang: yo' dayhang: ti" za: phug tid ago".

⁹Houg: yoomo nyang: gi nyangnu" ri «Ngoo gi ce: dam adab zu: azang" loo: yang" yang" za: doem tau" lo rigi ngoo gi he: nanu" da" gyidab pyuzung ri lo phyo' khyo' pyam wa» ga: tid kho' da:.

¹⁰Zeba yo' Zalmunna gi Karkora moo nya: tang: gyizoo: yi yo' dage" nyid ago". Dain" pyoid yoo moo nyid boem da" byumyu" kung: joem gi gyidab goin" lang" 15,000 yug za: dadeing lo:. Gyizoo: 120,000 yug gi said pyam zi shoug" ago".

¹¹Gideon gi Noba yo' Yobeha bidthu shoid dain" pyoid yoo ayam khyo" cang wigi yhe: lo" lho: gyidab ri nyeigdain tung" yhe: khaid zain: da:.

¹²Midian khokham Zeba yo' Zalmunna eig yug gi phang: lo" byug ago". Nghoid loug we' Gideon gi cang khaid lho: nya: eig tang: ri myheig yu da:. Nya: eig tang: da" gyidab goin" ri byoodain byooshoo" bui" nhang: pyam da:.

¹³Gideon gi gyipui" mo Here boem gyoo: khyoo: khyo" tau" phang: lo uri

¹⁴Nyang: gi Sukhod mo zoolu: dayug ri myheig yu lho: dang: myid: nyid da:. Hau: zoolu: phoo gi Sukhod mo vhujhung: nyhed xe: nyhed yug da" myeing ri Gideon ri lhid" byid: da:.

¹⁵Hau: thang: Gideon gi Sukhod voobyu yi jhang lo" lho: «Ngoo ri pang" thoug yu wa shid re" nanu" he: pyam ziri boin: go" rhe". Nanu" gi Zeba yo' Zalmunna ri ngoo ashoug" myheig shi" yoomo nga" da" myung: dau da" gyizoo: yiri zoo: noem dajhi' we' ayo" byid: ga: tid ago". Nghoid bye:- hau: eig yug hid: the'» ga: tid da:.

¹⁶Hau: thang: nyang: gi dain" pyoid yoo mo zu: kyang: yo' zu: gam joem ri yu lho: hau: ziyo' Sukhod mo vhujhung: yiri yooboo dam byid: da:.

¹⁷Nyang: gi Panuela moo jo, da" gyi pyuzung ri we' phyo' khyo' pyam lho: voobyu yiri we' said pyam da:.

¹⁸Hau: thang: Gideon gi Zeba yo' Zalmunna eig tang: ri «Tabora moo re" eig yug said pyam bang: da" khyoo: gi khasu"» ga: myid:. Nya: eig yug gi «Nyangnu" gi nang yo' du da:. Yugkhang" moo" gi khokham nu" yo' du ago"» ga: tid boem.

¹⁹Gideon gi «Nyangnu" gi nga" mang: nhung" yi nga" myhi' seing: da" yuggi zoo: yi nghoid. Re" eig yug nyangnu" ri asaid nghoid rigi ngoo re" eig yug ri asaid wa ein: ziri deing" deing jham' tang: da» ga: tid da:.

²⁰Hau: thang: nyang: gi nya: zooshid" yuggi zoo: Yetha ri «Nya: eig yug ri yhe: said pyam we'» ga: tid. Nghoid loug we' zoolu: phoo gi sham: ashe: thu nghoid da:. Nyang: gi zoolu: nu" za: danghoid shi" yoomo hougsu" ne" nyid zi nghoid.

²¹Hau: thang: Zeba yo' Zalmunna eig yug gi Gideon ri «Re" we' nang nyang: re" said pyam la. Yuggi moo" gi yuggi nyang: koid ca"» ga: tid. Houg: yoomo Gideon gi nya: eig yug ri said pyam lho: nya: eig yug da" Gola-ug joem da" leung zeung: moo void ci: da" shoung: yhoung to" da" ziyoo ri yu pyam da:.

²²Hau: thang: Israela byu yigi Gideon ri «Nang yo' re" amyed shen' yigi ngoonu" da" vhoebkhang" zoug: yi koid ge'. Nang gi ngoonu" ri Midian byumyu" yi lo, mo khyoid yu abye:» ga: tid ago".

²³Gideon gi «Ngoo yo' nga" yuggi zoo: yigi nanu" da" vhoebkhang" zoug: anghoid. ASEING gi nanu" da" vhoebkhang" zoug: nghoid wa» ga: phug tid.

²⁴Nghoid loug we' nyang: gi xo' lho: «Nanu" ri ngoo daja: mho' ba. Nanu" yugkhang" moo" nanu" yu to" da" nu: xei" joem ngoo ri byid: ge'» ga: tid da:. (Gootu: dain" pyoid yoo mo byumyu" yi yo' dakhyo" Midian byumyu" yigi sheing: nuxei" xei" ago".)

²⁵Byumyu" yigi «Hau: joem ri ngei ngei bu: bu: nang ri ngoonu" byid: wa» ga: tid ago". Nyangnu" gi byimi myhu" kaid lho: yugkhang" moo" nyang: nyang: yu ci: da" nuxei" joem houg: moo khyoid kaid ago".

²⁶Gideon shoug" yu da" sheing: nuxei" joem gi 17 juid: jain" bo da:. Houg: jang" moo sheing: zi sheing: yi:- Midian khokham void da" pain" ni byimi joem nyangnu" da" Gola-ug moo dab da" shoung: zi joem abo boo shi" nghoid da:.

²⁷Gideon gi hau: sheing: joem ri yu phara" soolhoo: daloem: koid yu lho: nya: yhoem: moug: Ophara moo to" to" da:. Israela byumyu" yi dangain" Mangsoo ri to" pyam wigi hau: yu phara" soolhoo: ri no' wa shid re" houg: khyoo: yhe: ago". Hau: zigi Gideon yo' nya: yhoem: byu yi shid re" lhid bue" da:.

²⁸Houg: yoomo Midian byumyu" yiri Israela byumyu" yi oung: pyam wigi kyug nhain' zi ajo, loo: nghoid da:. Hau: mungdain: gi Gideon shid: sho' myid: xi: zain meing: dam jo, da:.

²⁹Gideon gi nya: yhoem: khyoo: tau" lo" lho: houg: moo lo" nyid da:.

³⁰Nyang: gi yuggi zoo: nyhed xi: yug yo" da:. Ciwim gari nyang: gi yhoem: seing: myhi' myoo" sho' yo" da:.

³¹Nyang: gi Shekhem mo dangcang: myhi' we' yoo" shi" da:. Hau: yug gi Gideon ri yuggi zoo: dayug khu: byid: da:. Gideon nyang: ri Abimeleg ga: myeing byid: da:.

³²Yoasha da" yuggi zoo: Gideon gi gye" mang: thang: ri shid: lo" lho: Abieza kung: yi da" voogung Ophra mo nya: phoo Yoasha da" loeb moo myhoeb ago".

³³Gideon shid: thang: ri Israela byumyu" yigi Mangsoo ri jhug adoem zug lho: Bala yu phara" joem ri no' ago". Nyangnu" gi Bala ri nyangnu" yu phara" khyo" dang: theing koid ago".

³⁴Nyangnu" lheing khoem mo nyangnu" gyivoo yi dangain" bang: lo, mo nyangnu" ri khyoid yu da" nyangnu" ASEING Mangsoo ri adei byid: loo: nghoid ago".

³⁵Nyangnu" gi Israela byumyu" yi shid re" nyang: zei so" lo" da" ge da" lo, moo" dangain" gang mo Gideon da" yhoem: byu yiri jeju" ase' boin: soo" loo: nghoid ago".