Read Lashi TARHA" AGYI 9 Bible Online

TARHA" AGYI 9 - Lashi bible

TARHA" AGYI 9

¹Gideon da" yuggi zoo: Abimeleg gi nya: myhi' da" bidnoem seing" cang" dangain" nyid boem da" Shekhem voogung khyoo: yhe: da:. Houg lho: nyangnu" ri

²«Nanu" ce: ja: vhoo: nau go" lha". Gideon da" yuggi zoo: yi nyhed xi: yug wigi vhoebkhang" ziri vho: rhe". Anghoid lang" dayug wigi kyeing" vhoebkhang" ziri vho: rhe". Abimeleg gi nanu" nya: suid" shoo" nghoid ziri myid boin: ge'» ga: Shekhem voobyu yiri myid yu" wa shid re" tid da:.

³Nya: myhi' da" bidnoem seing" cang" yigi he: khyoo: yo' sen: wigi nya: shid re" Shekhem voobyu yi yo' doem go" da:. Shekhem voobyu yigi Abimeleg thang: cang wa shid re" myid phyed ago". Ciwim gari nyang: gi nyangnu" da" bidnoem seing" cang" nyang: nghoid yoomo nghoid da:.

⁴Nyangnu" gi Bala da" dang: theing yhoem: mo ngei nyhed xi: pyi" nyang: ri byid: ago". Hau: ngei wigi nyang: gi ce: phoug" adab da" byu koo" daphung: ri nya: thang: cang goo" wa shid re" vhoo" kung: lhung: yu da:.

⁵Nyang: gi Ophra mo nya: pho yhoem: khyoo: yhe: lho: Gideon da" nya: yuggi zoo: yi nya: mang: nhung" nyhed xi: yug ri lug moo" boem daloem: adang moo za: said toem" pyam da:. Nghoid loug we' Gideon da" zoothang yuggi zoo: Yotham gi gau" jo, yoomo said pyam zi ashoug" nghoid da:.

⁶Hau: thang: Shekhem voobyu yi dangain" yo' Bethmilo moo nyid bang: dangain" gi zeing: foem: lho: Shekhem mo gyeing" lho' Shookhi" gam khyoo: yhe: wigi houg: moo: nyangnu" gi Abimeleg ri khokham koid nhang: ago".

⁷He: khyoo: ri Yotham shoug" gyoo: lang" nyang: gi Gerizim boem gung moo yhe: yab jo, wigi «Shekhem bang: we" tam" gyoo: ge'- nanu" ri we' Mangso tam" gyoo: baja".

⁸Goonham' dalheing: moo seiggam joem gi nyangnu" shid re" khokham khyen: wa shid re" yhe: lo" ago". Nyangnu" gi zhainloin: gam ri «Ngoonu" khokham koid wa» ga: tid ago".

⁹Zhainloin: gam gi nanu" ri vhoeb wa shid re" yu phara" joem yo' byu joem ri ngi: shab jang" moo ci: da" xu: thu jang" mo theing: pyam ca" ga: tu" ga:.

¹⁰Hau: thang: seiggam joem gi lafoem gam ri «Nang ngoonu" khokham re" koid we'» ga: tid ago".

¹¹Nghoid loug we' lafoem gam gi «Nanu" ri vhoeb wa shid re" cau: da" nga" shi" zei: ziri theing: pyam ca"» ein: tu" ga.

¹²Houg: lang" seiggam joem gi zabyid nei ri «Ngoonu" khokham re" koid la"» ga: tid ago" ga.

¹³Nghoid loug we' zabyid nei gi ‹Nanu" ri vhoeb wa shid re" yu phara" joem yo' byu yiri gau nhang: da" nga" zabyid yeing thu ziri theing: pyam ca" wa› ga: doem tid ga.

¹⁴Hau: thang: seiggam joem gi zukyen: gam ri «Ngoonu" khokham re" koid la» ga: tid ago" ga.

¹⁵Houg: yoomo hau: zukyen: gam gi «Nanu" ngoo ri nanu" khokham gyeing" nyang: koid nhang: nau go" nghoid rigi nga" bid shoem: ri re" khoug: nyid ge'. Nanu" hougsu" akoid nghoid rigi nga" zukyen: gam joem mo myi: thu re" wigi Lebanon boem mo shamu gam joem nge" pyam goo" wa» ga: tu" da:.

¹⁶Yotham gi xo' lho: akhid" nanu" Abimeleg ri khokham koid nhang: boem uri gyeing" nyang: nheigloem: deing: deing: main: main: nghoid go" lha". Nyang: koid lid lo da" moo" yo' moin: yi" sho' Gideon ri phau" myang: myid boin: asoo" koid wigi nya: yhoem: byu yiri deing: deing: main: main: koid bye: la".

¹⁷Nga" phoo gi nanu" shid re" gyi zain: byid: loo bye: ziri myid boin: ge'. Nyang: gi Midian lo, mo nanu" ri khyoid yu wa shid re" nya: kangso' ri ab wigi koid lo da:.

¹⁸Nghoid loug we' akhid" nyid" nanu" gi nga" phoo da" yhoem: byu yiri gyi koid abye: go". Nya: yuggi nyhed xi: yug ri lug phoug tho' daloem: dang moo za: nanu" said pyam abye:. Dei zoo: myhi' yo' yo" da" yuggi zoo: Abimeleg gi nanu" da" bidnoem seing" cang" nghoid da" gang mo za: nyang: ri Shekhem moo: khokham koid nhang: bye:.

¹⁹Houg: lho: akhid nanu" Gideon yo' nya: yhoem: byu yiri koid da" lo, moo" gi nheigloem: deingmain" lho: koid boem nghoid rigi Abimeleg yo' dage" ngei bu ge'. Nyang: ri we' nanu" yo' dage" ngei bu: nhang: ge'.

²⁰Nghoid loug we' hougsu" anghoid rigi Abimeleg mo myiyham: thu re" lho: Shekhem yo' Bethmilo bang: ri nge" pyam baja". Shekhem yo' Bethmilo bang: mo myiyham: thu re" lho: Abimeleg ri nge" pyam baja"» ga: tid da:.

²¹Hau: thang: Yotham gi nya: mang: nhung" phoo Abimeleg ri gyoug yoomo phang: lo" wigi Bera moo lo" nyid da:.

²²Abimeleg gi Israela mung" ri soem" zain vhoeb da:.

²³Hau: thang: Mangsoo gi Abimeleg yo' Shekhem bang: ri nyang: cang" gyi bui" nhang: da:. Houg: lho: nyangnu" gi Abimeleg ri gyi koid thougtheung boem ago".

²⁴Hid: su" bue" zigi Abimeleg yo' nyang: ri yoem: byid: wigi Gideon da" yuggi zoo: nyhed xi: yug ri said da" Shekhem bang: ri nyangnu" byu said moo" shid re" aphoug" tau" byid: wa shid re" bue" zi nghoid.

²⁵Shekhem bang: gi Abimeleg ri gyi koid wigi boem gung joem moo byu yiri lhoem: nhang: to" ago". Nyangnu" gi lid loo" bang: dangain" da" zi yoo ri: lhoid yu ago". He: khyoo: Abimeleg ri tid kyo" ago".

²⁶Hau: thang: Ebed da" yuggi zoo: Gala gi nya: mang: nhung" yi yo' Shekhem khyoo: ju" re" lho: Shekhem bang: gi nyang: ri lhoem: nghe: khau: ago".

²⁷Nyangnu" dangain" bang: nyangnu" da" zabyid khyam: joem khyoo: yhe: lho: zabyid shi" joem ri yhe: phyo' yu wigi hau: joem ri zabyid yhid: koid yu lho: pui" koid ago". Nyangnu" gi nyangnu" da" yu phara" yhoem: khyoo: vang yhe: lho: houg: moo zoo: shug wigi Abimeleg ri yi juang" pyam ago".

²⁸Gala gi «Ngoonu" Shekhem bang: gi cite" zi nghoid lha". Ngoonu" ciwim yoomo Abimeleg ri dei byid: nyid lha". Gideon da" yuggi zoo: gi cite" yug nghoid lha". Zebula gi nya: amyeing" ci: su: nghoid da:. Nghoid loug we' ngoonu" ciyoomo nyang: ri dei byid: wa lha". Nanu" byumyu" kung: ajhung: nghoid da" nanu" phoug" phyid" Hamora ri phau" myang: ge'.

²⁹He: byumyu" yi da" vhujhung: ngoo nghoid yoo: o". Ngoo gi Abimeleg ri yu pyam wa. Ngoo gi nyang: ri ‹Re" gyidab ri gyizoo: lung: lho: re" thu zain: we' ein: tid wa› ga: tid.

³⁰Voo zoug: Zebula gi Gala tid da" dang: ri shoug" gyoo: lang" nheig yo: da:.

³¹Nyang: gi Aruma moo nyid da" Abimeleg jhang lagyoo: yiri nhang: kaid lho: «Ebed da" nya: zoo: Gala yo' nya: mang: nhung" yigi Shekhem moo re" ju" nyid boem wigi nyangnu" gi nang ri voomoo" khoug: khyoo: avang loo" nhang: wa.

³²Houg: yoomo akhid nang yo' re" byu yigi myen" ri re" lho: siyoo cang re" gau" nyid ge'.

³³Nab yo nyid" nab soin: bidxain" zoo" ri to' lho: voomoo" ri nyeigdain tung" re" khaid zain: ge'. Houg: lho: Gala yo' nya: byu yi nang ri gyi re" zain: boem lang" nanu" ge bue" da" yhi' gyi zain: ge'» ga: tid da:.

³⁴Houg: yoomo Abimeleg yo' nya: byu yigi myen" ri re" wigi myid: phung: kho' lho: Shekhem vooyam moo re" gau" nyid ago".

³⁵Abimeleg yo' nya: byu yigi Gala thu re" lho: voomoo" khoem" moo" duang: moo re" yab jo, ziri myang lang" nyangnu" gi nyangnu" gau" jo, da" joyoo mo to' ago".

³⁶Gala gi nyangnu" ri myang lang" Zebula ri «Yu" we' boem gung joem mo byu joem gyoo" lo nyid ago"» ga: tid da:. Zebula gi «Byu joem anghoid. Boem joem mo bid yoeb gyo" zang" zi danghoid» ga: tid.

³⁷Gala gi «Yu" we' byu joem gi boem gung moo gyoo" re" nyid wigi daphung: gi boid phyed bang: da" Shookhi" gam khyoo: cang wigi re" nyid ago"» ga: doem tid.

³⁸Hau: thang: Zebula gi nyang: ri «Nang gye" phau: tid da" dang: gi akhid" khamoo: lha". Nang gi he: Abimeleg ri ngoonu" ciwim dei byid: wa lha" ga: myid: su: nghoid da:. Houg: bang: gi nang wigi yi juang" pyam da" bang: nghoid ago". Akhid" thu yhe: lho: nyangnu" ri yhe: zain: we» ga: tid.

³⁹Gala gi Shekhem bang: ri shu" thu yhe: lho: Abimeleg ri yhe: khaid zain: da:.

⁴⁰Abimeleg gi Gala thang: cang khaid lho: Gala gi tang" phang: lo" da:. Voomoo" khoem" moo" duang: moo za: lang" myoo" sho' bang: dam dab ago".

⁴¹Abimeleg gi Aruma mo nyid wigi Zebula gi Gala yo' nya: mang: nhung" yiri Shekhem voomoo" mo khaid thu pyam yoomo nyangnu" houg: moo ayo" nyid boem loo: nghoid ago".

⁴²Thang: nyid" Abimeleg gi Shekhem voobyu yi pa: dam khyoo: yhi: wa soin' to" boem khyoo: ri si' yoomo

⁴³nyang: gi nya: byu yiri shu" yu lho: soem" phung: kho' wigi pa: dam moo gau" lang" nyid. Voobyu yi thu re" ziri myang lang" houg: bang: ri said pyam wa shid re" nyang: thu re" da:.

⁴⁴Abimeleg yo' nya: phung: bang: voomoo" khoem" moo" duang: ri yhe: zung" wa shid re" tang" yhe: lo" nyid uri gootu: eig phung: gi pa: dam mo voobyu yiri khaid zain: lho: nyangnu" dangain" ri said pyam ago".

⁴⁵Gyi khaid pui" gi nyid" goin" nghoid nyid da:. Abimeleg gi voomoo" ri oung: yu pyam lho: voobyu yiri said pyam. Voomoo" ri phyo' sain" pyam da:. Voo ri xoo" yo' nghoeb pyam da:.

⁴⁶He: khyoo: ri Shekhem gyi khoug: zung moo nyid da" vhujhung: yi dangain" shau" gyo: boem lang" nyangnu" gi Bala dang: theing yhoem: moo" moo gyidab koid wigi yhe: gau" nyid ago".

⁴⁷Nyangnu" houg: moo foem: nyid boem ziri Abimeleg shoug" gyoo: lang"

⁴⁸Nya: byu yi yo' dage" Zalmon boem khyoo: do, yhe: lo" da:. Houg: moo nyang: gi voozung: dacam" ri yu lho: seig kung: joem ri phyed yu wigi nya: kootho' moo vu, da:. Nyang: gi nya: byu yiri hougsu" myab myab koid wa shid re" tid da:.

⁴⁹Houg: yoomo yugkhang" moo" gi seig kung: joem ri phyid vu, da:. Hau: thang:- Abimeleg thang: cang yhe: lho: hau: thang" ri dang: theing yhoem: moo yhe: boem to" ago". Byu yi akhoug: moo lung" jo, jang" moo nyangnu" gi hau: ziri myi: nghe' kaid ago". Hau: Shekhem pyuzung khoug: moo nyid bang: dangain" shid: ago". Houg: bang: gi yuggi myiyi: dakhyeing" koo: nghoid da:.

⁵⁰Hau: thang: Abimeleg gi Thebe khyoo: yhe: lho: hau: voomoo" ri yhe: vang: lheing lho: seing: yu pyam da:.

⁵¹Hougmoo gye" geing: da" gyi pyuzung jo, da:. Houg: yoomo hau: voomoo" mo myiyi: yuggi dangain" mo, yo' vhujhung: yigi hau: akhoug: khyoo: tang" vang yhe: ago". Nyangnu" nyang: nyang: khoem" kyang lhoung wigi yhoemkhung: tho' khyoo: do, lo" ago".

⁵²Hau: gyi pyuzung ri Abimeleg re" khaid zain: uri nyang: gi pyuzung ri myi: nghe' pyam wa shid re" khoem" moo" khyoo: do, yhe: lo" da:.

⁵³Nghoid loug we' myiyi: dayug gi lug lheing: lugzeing wigi nya: vhuloem khyoo: du" khyo' kaid lho: Abimeleg da" vhuloem du" khyam" pyam da:.

⁵⁴Houg: lho: nyang: gi nya: gyi jonu" ci: byid: da" zoolu: phoo ri myab myab khe: yu lho: «Re" sham: she: yu wigi ngoo ri said we'. Ngoo ri myiyi: wigi said pyam ga: wa ziri ngoo avhoo:» ga: nyang: ri tid da:. Houg: yoomo hau: zoolu: phoo gi thoug" kyang said pyam da:.

⁵⁵Israela byumyu" yigi Abimeleg shid: bye: ziri myang lang" nyangnu" dangain" bang: yhoem: khyoo: tau" lo" ago".

⁵⁶Hougsu" yoomo he: zigi nya: mang: nhung: nyhed xi: yug ri said khyo" nya: phoo ri thougtheung shoid vhang: da" yooboo shid re" Mangsoo gi Abimeleg ri yooboo dam doem tau" byid: zi nghoid.

⁵⁷Gideon da" nya: yuggi zoo: Yotham nyangnu" ri nheing" khoin" kaid to" ziyo' dakhyo"- Mangsoo gi Shekhem bang: ri we' nyangnu" da" akhyeing" da" moo" shid re" yau: khi" kham zoo: nhang: da:.