Read Lashi Pang Shug 10 Bible Online

Pang Shug 10 - Lashi bible

Pang Shug 10

¹Hau: thang: ri yoem: moo" bo da' moug: lagyoo: gootu: dayug gi moug: khung: mo gyoo" lo ziri ngoo myang- Nyang: ri jhoem" moug" thoeb, to" lho: nya: da" vhuloem lheing khab, moo- seing: yhang: lheung kham, to. Nya: da" myonhoo: gi bid yo' du lho: nya: da" khyid: gi myizeing joem ti" du nyid.

²Nyang: gi nya: da" lo, khoug: moo phang to" da" mougsoug" deing: nu" ri ci: to" nya: lo, yo khyid: gi panglai tho' moo lo, koung" khyid: gi tung: gung tho' moo nang: yab, jo, lho:

³Khang khyi, myeung yhang: ti" - nyang: gi thui: zeing yo' nyho: thu' kaid. Nyang: houg: su" ga: nyho: thu' kaid da" thang: ri moug: goem: thui: nyhed, loem: yo' phug tu" myeung thu lo.

⁴Houg: lang" - moug: goem: thui: mo tid nyid da" dang: khoin" ri ngoo lhid" xoem" too" wa ein: soin' nyid uri moug: khung: mo tid thu' lo da" thui: gi alhid" xoem" too"- moug: goem: thui: nyhed loem: mo da" dang: gi zau" too" we' ga: tid ziri ngoo shau" gyo.

⁵Hau: thang: ri panglai yo' tung: gung moo nang: yab jo, da" mau: lagyoo: gi nya: da" lo, yo lo, ri moug: khung: khyoo: tu: kaid' lho:

⁶Apyaid' atoo: moo dadei nyid lho: moug: khung yo' myid jang- panglai yo' ziyoo jo, moo jo, ri phain" to" da" Aseing: ri nghe: lho: jham, tang: yu zigi myang" loo: wa zi anghoid.

⁷Nghoid loug we' nyhed yug ein: da" moug: lagyoo:- nya: laboo" moid kaid' thang: ri Mangsoo gi nya: lapi: dei zoo: yi ri tid fu" nhang: bye: ziyo' dakhyoo" ti"- nya: no, thang da: khyoo: joem ri joeb, byeung" loo nhang: wa zi nghoid nyid ,, ga: tid.

⁸Moug: khung: mo ngoori doem tid thu' lo da" thui: gi ngoo shau" gyo- Yhi: we' Panglai yo' tung: gung moo nang: yab, jo, da" mauglagyo: lo, mo phang to" da" mougsoug" deing: nu" riyu we',, ga: tid.

⁹Houg: yoomo ngoo gi hau: mauglagyo: jhang khyoo: yhe: lho: mougsoug" deing: nu" ngoori byid: wa shid re" mho' - Nyang: ngoori tid zigi " He: mougsoug" deing: nu" ri yu lho: zoo: we' re" voem: doug: moo kyid: kyid: yo' kho" loo" wa nghoid loug we' re" da" nhoid khoug: moo gi byoo: yhid: yhang: ti" mheing" mheing" cau: loo wa zi nghoid ga: tid.

¹⁰Ngoo gi nya: lo, mo mougsoug" deing: nu" ri yu lho: zo: kaid' lang" nga" nhoid moo mheing" mheing" cau:- nghoid loug we' ngoo hau: ziri myhau: kaid' lang" gi nga" voem: doug: khoug: moo kyid: kyid: kho" lo.

¹¹Hau: thang: moo ngooritid zigi " Nang gi mungdain: myoo" sho' byumyu" aja: ja:- Khokham" yi yo' sen: da" Mangso mungdang: ri dalheing: doem tid fu" we',, ga: tid.