Read Lashi Pang Shug 14 Bible Online

Pang Shug 14 - Lashi bible

Pang Shug 14

¹Hau: thang: moo ngoo doem yu" kaid' ri-Zion boem tho' moo yang nu" yab, jo, zirimyang Nya: myeing yo' nya: pho, da" myeing ri ngeilang: moo lhid" tab ci: da" byu yi 144000 yug bang: gi nyang: yo' dage" nyid boem.

²Hau: lho: gyid lung" gyoo" thui: yhang: ti" ti"- moug: goem: thui: yhang: ti" ti" ga: da" thui: zeing gi moug: khung: mo myeung thu' lo ziri ngoo shug" gyo. Hau" da" thui: gi myheung yhang: da" sarhi' yi nyangnu" da" teing joem ri baid' myheung da" thui: yo' du nyid.

³Hau: da" byu 144000 bang: gi zhung: tang shid khoin" mo gougnyhoug myid: du: yo' ludaid' yi da" shid' khoin" moo yab, jo, lho: nyangnu" za: dayo" jhau" yu da" jikhoin" seig ri khoin" nyid boem houg: bang: gi xangsu: byu yi dangain" mo, khyoid khyi: yu zi shau" mo, nghoid.

⁴Houg: bang: gi myi: yi: yi yo' gung shoo" zoem" go" khyoo: akoid loo: sho' nyang: nya: gung ri zeung: kham' nyid mo, zoolu: gyeing" yi zheung: nghoid wigi yang nu" yhe: lo" da" joyoo khang" moo khyoo: yo" bo cang yhi: mo, nghoid- nyangnu" gideung nyid da" xang: su" byu yi dangain" khoug: mo khyen: khyoid yu zi shau" mo, nghoid boem yoomo Phoo, Mangsoo yo' yang nu" shid re" xang: shed" xoin" ngei" byid: zi shau" mo, nghoid ago".

⁵Nyangnu" gikha: nham, we' mhau' da" dang: ase' tid- nyang: nu" moo ce" yooboo we' adab bang: nghoid.

⁶Hau: thang: rimoug: myid mungdain loem: khang" moo" moo nyid da" myeing" acang: joeb, bang:- byumyu" acang: joeb da" bang: ri tid fu" kyoo" wa shid re" apyaid' atoo: mo ngei bu: lu dang: gi ri ci: lho: moug: laid' moo dang: lheung: nyid da" moug: lagyoo: gootu: ri ngoo myang.

⁷Hau" mou: lagyoo: gi Mangsoo dang: phyed wa da" bidnyid ju" loo bye: yoomo Mangsoo ri gyoug phau" lho: nya: da" gyi: myhang: reung: thang khyoo: re" coung" byid: ge'. moug: khung: yo' myidjang: ri we' panglai yo' gyid zoo: lang yi we' phain" so: to" Aseing: ri phau" myang: vhu" pid' ped' nyid ge'. ga: thui: moo" zeing yo' nyho: tid nyid.

⁸Hau: thang: ri eig yug ein: da" moug: lagyoo: gi xang: shed" youg thang: moo cang ju" re" lho: " Babelon voomoo" zeing gi byo, leung loo" bye- nya: aved avhu: koid moo" ein: da" so' thain: da" zabyid yhid: ri byumyu" bain' sho' mo, ri shug nhang: abye:"- ga: tid nyid.

⁹Hau: soem" yug ein: da" mau: lagyoo" gi xang: shed" eig yug ein: da" thang: moo doem cang ju" re" lho: akhyeung" da" gougnyhoug yo' nya: da" soo lhoo: ri phau" myang: vhu" pid' ped' lho: nyang: nya: da" ngeilang: moo anghoid lang" gi lo, moo hau: gougnyhoug da" laxoem" dazid' ri baid' tab ci: mo, hang" we' mauglagyo: lo, mo da" goem moo Mangso wigi byeung" sho' foid kaid' to" da" Mangsoo nheig khoo" yo: da" zabyid yheing ri shau" shug goo" wa zi nghoid.

¹⁰Hau: tho' moo gootu: gyeungshang: da" moug: lagyoo: yi yo' yang nu" da" shid' khoin" mo fang myi: khyoem, moo shen" yhen zi shau" boem wa nghoid.

¹¹Nyangnu" ri nghe, shen" yhen nyid da" fang myikhoug" gi pyaid didu moo daboung" zhoung: to"- hau: akhyeung" da" gougnyhoug yo' nya: soolhoo: ri vhu" pid' pid' mo, yo' hau: gougnyhoug myeing ri lhid" tab ci: bang: hang" we' nyid" ri myen" rimyen, jham" khyoo: jo, loo: wa zi anghoid ga: thui: moo" yo' yoid nyho: nyid.

¹²He: khyoo: gi Mangso da" amyeing" dang: ri cang lho: Aseing: ri loem" jeing" bang: shid re" kham, zeung: yoem: kaid' wa khyoo: ri bue" loo nhang: nyid.

¹³Houg: thang: ri moug: khung: mo da" thui: gi " Lhed" xoem" too" we' Aseung: da" moo" ri voin, vu, lho: shid: loo" bang: gi ngi lho, nyid"- ga: tid thui: ri ngoo shau" gyo:- Houg: lang" Venyi we' " Nghoid gyeing" nyang: nghoid- nyangnu" gi sho" jhen: jamjau ziri kham, lho: zei: da" moozoo" mo doug shau" noo: goo" wa", Khasu" wim gari nyangnu" zei: da" moozoo" mo aphoug" gi nyangnu" moo cang loo bye"- ga: tid.

¹⁴Ngoo doem yu" kaid ri jhoem: phyu: da thei" ri myang- hau" jhoem: phyu: thei" atho' moo byu yhang: te" zi dayug zhoung: jo. Nya: da" vhuloem moo gi sheing: bidmug zhoung" ci: lho: nya: lo, moo gi gye" tho' da" gyen: goem dacam" ri zhoeb, ci.

¹⁵Mouglagyoo: gootu: dayug gi noku yhoem: moo" khoug: mo thu' re" lho: jhoem: phyu: thei" atho' moo zhoung: jo, su: ri " Moug: myid tho' moo gug myeung jo, bye: yoomo gug yham" yo, ju" bye"- re" da" gyen: goem: ri ci: tho:- gug yham" re',, ga: thui: zeing yo' nyho: kaid.

¹⁶Houg: yoomo jhoem: phyu: thei" atho' moo zhoung: jo, su: gi nya: da" gyen: goem: ri mougmyid' tho' khyoo: she: fe: kaid' wigi yham" ge" da' mougmyid ri bain, yham" yu pyam' bye.

¹⁷Hau: thang: ri moug: lagyoo: gootu: dayug gi moug: khung: noku yhoem: moo" khoug: mo thu' re" lho: hau" yug we' gye" tho' da" gyen: goem: dacam" ri ci: nyid.

¹⁸Hau: thang: ri myi: ri vhoeb, da" moug: lagyoo: dayug gi xoin" to' phoin: khoung: mo thu lo. Nyang: gi gye: tho' da' gyen: goem: ri zhoeb, ci: da" moug: lagyoo: ri " re" da" gyen: goem: ri ci: lho: «mougmyid da" zabyid khyam: mo ashi" ri yham" yu re" zabyid shi" joem bain myheung jo, bye"» ga: thui: zeing yo' tid kaid.

¹⁹Houg: su" nghoid yoomo moug: lagyoo: gi nya: da" gyen: goem: ri ci: lho: mougmyid tho' mo zabyid shi" yham" yu bye. Hau' zabyid shi" joem ri Mangsoo nheig khoo" yo: ein: da' zabyid xoem: zhung: moo foid zei, kaid bye.ss

²⁰zabyid shi' joem ri vooyam, gam: moo yhe: pyeug wigi zabyid xoem: zhung: moo nang: jhoeb, wigi houg: mo suid" lang yau, lo. Hau: da" suid" lang gi khyoo: eig shoo: main: sheing: sho' yau, lo" wigi wim: pi: koo: no, jo.