Read Lashi Pang Shug 16 Bible Online

Pang Shug 16 - Lashi bible

Pang Shug 16

¹Hau: thang: ri noku yhoem: moo" khoug: mo thui: zeing myeung thu' lo- Hau" da" thui: gi " Moug: myid tho' khyoo: Mangsoo nheig gyed" zi bo da" goem nyhed loem: ri ci: thu' yhe: lho: foid shoin" kaid ge",, ga: moug: lagyoo: nyhed youg bang: ri tid zi ngoo shau" gyo.

²Mouglagyoo: xang: shed" yug thu' yhe: lho: moug myid tho' khyoo: nya: goem, ri foid khyo' kaid. Houg: lang" akhyeung" da" gougnyhoug zeung da" myeing ri tab ci: zi shau" mo, yo' nya: khyang du soolhoo: rino" mo, moo gye" gyoug pho" da" khe" no, moug: byeing myoug lo boem.

³Hau: lho: eig yug ein: da" moug: lagyoo: gi nya: da" goem, ri Panglai gyid thoem" moo" moo foid khyo' kaid- hau" gyid thoem" gi byu shid: yi da" suid" yhang: ti" bue" lo. Hau: gyid thoem" khoug: moo nyid da" dei noem, gi suid" gyid bue" lo.

⁴Soem" yug ein: da" moug: lagyoo: gi nya: da" goem, ri gyid moo" lang joem yo' gyid bug yi da" atho' moo foid khyo' kaid. Houg: lang" gyid dangain" gi suid" gyid bue" lo.

⁵Houg: lang" gyid ri vhoeb, khang" da" moug: lagyoo: gi nang koid da" dang: phyed khyoo: gi deing nyeung" da" khyoo: nghoid- nang gi akhid" pyaid lid loo" bye: apyaid' moo nyid nyid da" gyeungshang: su: gi nang kyeing" za: nghoid- ga: tid.

⁶Houg: bang: gi gyeungshang: Mangso byu yi yo' nya: lapi: yi da" suid" ri foid shoin: pyam' byid: boem bye: yoomo Nang gi nyangnu" ri suid" doem shug nhang: bye- houg: gi nyangnu" kham, moin: da" dam nghoid bye:- ga: tid nyid ziri ngoo shau" gyo.

⁷Hau: thang: ri xoin" to' phoin: mo thu lo da" thui: gi " Athang agoin yoem: moo" bo da" Aseing: Mangso- Nang dang: phyed' nyid da" khyoo: gi deingmain" da" khyoo: yo' deing nyeung" khyoo: nyang: nghoid bye"- ga: tid nyid ziri ngoo shau" gyo.

⁸Hau: thang: ri myid: yug ein: da" moug: lagyoo: gi nya: da" goem, ri bid, da" atho' moo foid gyoin: kaid' Houg: lang" bid gi byu xang: su: yiri gye" nge" da" myiso' yo' nge" kyu" pyam' nhang: zi shau" bye.

⁹Nyang: nu" gi thain: da" myiso' yo' ngi" yoomo hau: shid: gyoin, amyeing" byid: su: Mangsoo ri damyeung nheung" nyid aloo: go. Nghoid loug we' nyangnu" da" yooboo yoomo houg: yhi' gyeung" da" shen" yhen jamjau shau" nyid boem nghoid loug we' nheigloem: athed' lo boem ziyo' Nya: da" gyi: myhang: khyoo: ri acoung" anghei' byid: nghoid ago".

¹⁰Wim: yug ein: da" moug: lagyoo: gi nya: goem, ri akhyeung" gougnyhoug da" zhung: tang tho' moo foid shoin" kaid. Houg: lang" akhyeung" gougnyhoug zeung da" mungdain gi moug: coid' teing: no, loo" khare" lho: nya: mung" byu yi we' khe" no lo boem yoomo nyang: nya: da" yhoo: ri ngaid' zeug ci: boem bye.

¹¹Nyang: nya: da" gyi: thain: khe" no nyid moug: byeing yoomo moug: khung: mo Mangsoo ri nheung" nyid boem ago". Nghoid loug we' nyangnu" gi nyang: nya: da" akhyeing" ashoeb da" khyoo: joem mo nheigloem: athed' lo boem, shi" nghoid ago".

¹²Hau: thang: ri khyug yug ein: da" moug: lagyoo: gi nya: da" goem, ri Uphraid gyid lang moo foid zei, kaid- Houg: lang" bidthu shoid mo Khokham" yi ri" wa da" khyoo: bang" loo" baja" ga: gyid moo" lang gi kyoug kain" loo" bye.

¹³Hau: thang: ri ngoo gi poo" lheig yo' du go" da" agyeing" ashang: da" venyi soem" du: ri myang- nyangnu" gi main jung: ni, zeung da" nhoid mo we' akhyeung" gougnyhoug joem da" nhoid mo we' mhau' yen" da" lapi: yi da" nhoid mo we' zheung: thu' lo zi nghoid.

¹⁴Nyangnu" gi main: yu joem da" soo" byoo, joem nghoid wigi alhoo: again joem ri yo" koid shug. Hau" venyi soem" du: gi yoem: moo" bo Mangso meing: zain: da" bidnyid' zeing mo, gyipui" khyoo:- mougmyid gyab, goin" moo nyid da" - Khokham" yi ri dage" khe: zheing" wa shid re" thu' lo" boem.

¹⁵Gyo: yu" ge'. ngoo gi khoug" su: ju" re" yhang: ti" ju" ri" wa Houg: yoomo byimi avoid shoo" cen: doem: nghoid nyid ziyo' sube" da" shid khoin" moo sho' athu' wa shid re" gyeung: boin: nyid wigi nyang: nya: da" byimi, ri zung" nyid su: gi ngi: lhoo' wa zi nghoid.

¹⁶Hau: thang: moo hau" venyi joem gi Khokham" yi ri Hebre myeing" khyo" Armagedon ga: da" joyoo moo khe: zheung" phoung too" bye.

¹⁷Hau: thang: ri nyhed yug ein: da" moug: lagyoo: gi nya: da" goem, ri lid' moo foid tang" kaid- houg: lang" noku yhoem: moo" khoug: moo jo, da" zhung: tang mo thu' lo da" thui: moo" da thui: gi " Moozoo" bain' bye",, ga: tid thu' lo.

¹⁸Houg: lang" gi lhab, myeug zi moug: goem: goem: da" thui: joem yo' thui: moo" zeing myeung thu' lo ziyo' gyoug pho" da" myid' leig zeing we' leug thu' loo bye. Byu phain" shed" da" bidnyid mo wigi houg: yhi' gyeing" gyi: da" myid' leig zeing gi khanham we' aleug yu" shi".

¹⁹Babelon voomoo" zeing gi soem" gang go, gyam: gyo" pyam' bye- moug: myid tho' moo voomoo" joem dangain" we' byo, yoin" lo" pyam' bye. Mangsoo gi Babelon voomoo" ri myid boin: nyid zoore"- nya: da" goem, mo nheig gyed" ein: da" so' thain: thang da" zabyid yhid" ri shug nhang: abye:.

²⁰Gu: gyoo: kang: joem yo' boem, lang joem dangain" we' byug. shang loo" khari" bye.

²¹Houg: lang" moug: laid' mo dacab, ri70 joid" koo: koo: su" bo da" leig voo cab, joem gi byu yi da" atho' moo vo, gyoin: lo. Houg: mo bue" thu' lo da" gyoug pho" shid: gyoin, yoomo byu yi gi Mangsoo ri nheung" nyid boem abye: go.