Read Lashi Pang Shug 17 Bible Online

Pang Shug 17 - Lashi bible

Pang Shug 17

¹Hau: uri goem nyhed loem: ci: da" moug: lagyoo: nyhed yug mo dayug ngoori tid zigi " Gyid moo" lang myoo" sho' da" ayam, moo zhoung: jo, voomoo" zeing te" da" myeing gyi: nyid shava myhi, da" yoobo khyoo: ri ngoo nang ri tid kyoo" ba.

²Myid' jang: tho' mo Khokham" yi gi nyang: yo' aved, avhu: moo" zheung: zei: nyid yoomo mougmyid' moo nyid da" byu yi gi nya: aved, avhu: koid ein: da" zabyid yeid' ri shug yed, ci: abye: go", ga: tid.

³Hau: thang: ri mouglagyoo: gi ngoori venyi khyo" dain" pyoid yoo khyoo: shu" lam" lo" ri Mangso myeing ri juang" yi da" myeing dagung goin" lhid" tab ci: da" akhyeung" da" gougnyhoug ni, zeing dadu: da" atho' moo myi: yi: myhi, dayug zhoung: jo, ziri ngoo myang- hau: akhyeung" da" gougnyhoug moo vhuloem dab, nyhed loem: dab, lho: khyoug: daxi: khyoug: youg.

⁴Hau" myi: yi: myhi, gi Ni, mi: yo' ni, no, yo, da" byimi void ci: lho: ngei sheing: lug nyoug- Palhe" joem yo' lhoo, yhoung ci:- nyang: youg: sho: to" da" aved, avhu: koid moozoo" yo' byeung" da" sheing: goem, ri nya: lo, moo zei: ci.

⁵Nya: ngeilang: tho' moo gi shava myhi, yi yo' " Moug: gyab, goin" ziri khyoo: shu" vhang: lo" da" nya: myhi' - gyi: thang da" Babelon - ga: wigi gau: thang dang: kang: yo' lhid" to".

⁶Hau: lho: myi: yi: myhi, hau: yug gi Mangso byu yi da" suid" yo' Yesu ri loem" jeing" yoomo said' pyam' zi shug" mo, da" suid" ri shug yed, nyid ziri ngoo myang.

⁷Hau: da" moug: lagyoo: ngoori myed: zigi ce: noem, wim wigi nang mau" nyid lha". Hau" myi: yi: myhi, da" gau: thang dangkang: yo' vhuloem nyhed loem: dab, ziyo' khyoug daxi: loem: youg da" akhyeung" da" gougnyhoug khyoo: ri we' ngoo nang ri tid kyoo" ba.

⁸Hau: akhyeung" da" gougnyhoug gi shid' phyang" dei nyid yu" bye- nghoid loug we' akhid" gi adei nyid loo- nghoid loug we' nyang: gi no, athang da" duang: khuang" mo thu' re" lho: wigi phyo' shoin, pyam' jang" khyoo: yhe: loo" wa zi nghoid. Moug: phain" myid' aphain" shi" mo Nya: kang: so' moug soug" pug moo -myeing abo lhid" kaid' to" da" moug: myid byu yi gi hau: akhyeung" da" gougnyhoug zeing ri shau" myang lang" mau" hang" to" boem wa nghoid. Nyang: gigoo" nham, dei nyid yu" gye- akhid" gi adei nyid loo- nghoid loug we' doem dei loo shi" wa zi nghoid.

⁹Hid: moo lase' phajhi" yo' yeug se' da" phajhi" boo ca"- vhuloem nyhed loem: gi hau" myi: yi: zoo: zhoung: jo, da" boem, nyhed loem: nghoid lho: Khokham" nyhed yug ri we' tid nau zi nghoid.

¹⁰Khokham" wim: yug gi shid: loo" bye- dayug gi dei nyid shi"- gootu: dayug gi apo" thu' loo shi" - po" thu' loo loug we' daso' za: dayo, daboin: za: te: vhoeb khang" wa zi nghoid.

¹¹Hau: lho: goonham: gi kangso' dei nyid nghoid loug we' akhid" gi age dei nyid lo: da" akhyeung" da" gougnyhoug gi nyhed youg khoug: mo dayug nghoid wigi shed' yug ein: wa da" Khokham" nghoid lho: phyo' shoin, pyam zi shau" zo" lo" nyid bye.

¹²Nang shau" myang da" khyoug: daxi: loem: gi ashau" vhoeb, khang" shi" da" Khokham" daxi: yug nghoid. Houg: bang: gi akhyeung" gougnyhoug yo' dage" Khokham" da" amyeing" yoem: so' ri ayo, dana: yi: za: yo" yu mo, bue" lo boem wa zi nghoid.

¹³Hau: da" Khokham" yi daxi: youg bang: gi myid' soin' khyoo: daja: za: bo boem wigi akhyeung" da" gougnyhoug zeing ri nyang: nya: da" yoem: vhoo" yoem: so' yo' amyeing" yoem: so' ri ab, byid: boem.

¹⁴Houg: bang: gi hau: yang nu" yo' meing: zain: goo" wa zi nghoid loug we' hau: yang nu" ginyang: khe: yu too" mo, khyen: yu too" mo, yo' nheigloem: zung" lho: nya: thang: cang mo yo' dage" houg: bang: ri oung: pyam wa zi nghoid. Khasu" wim gari nyang: gi Aseing: yi tho' mo Aseing: - Khokham" yi tho' mo khokham" nyang: nghoid nyid.

¹⁵Hau: thang: ri mau: lagyoo: ngoori doem tid zigi shava myi: yi: myhi, zhoung: jo, da" gyid lang gi mungdain joem mo myeing" cang: joeb, da" byumyu" yi yo' meing: byu yi nghoid boem ago".

¹⁶Nang myang da" akhyeung" da" gougnyhoug yo' Khyoug: daxi: loem: gi shava myi: yi: myhi, ri ngheing" yoomo nya: byimi, dangain" lang: shang: pyam byid: lho: shoo" cen: doem: koid to" boem wa nya: da" shoo" ri zo: pyam' lho: deung gu: rigi myi: moo nghe, jhoem" pyam wa nghoid.

¹⁷Khasu" wim gari Mangso mungdang: joeb, byeung" lo da" bidnyid moo ju' sho' nyangnu" gi dadeing: daloem: za: koid lho: nyangnu" vhoeb, khang" da" amyeing" dang: ri hau: akhyeung" da" gougnyhoug lo, khyoo: ab, byid: khyo" wigi Mangsoo gi nyang: myid soin' khyoo: zei: pyeing byid: nau da" e" myed, ri nyangnu" da" nheigloem: khoug: moo kaid' too" byid: bye.

¹⁸Nang shau" myang da" myi: yi: myhi, gi moug: myid khokham" yi da" atho' moo vhoeb, khang" nyid da" voomoo" zeing nghoid- ga: ngoori tid.