Read Lashi Pang Shug 2 Bible Online

Pang Shug 2 - Lashi bible

Pang Shug 2

¹Hau: Ephesu phung mo mauglagyo: jhang khyoo:- hidsu" ein: lhid" kaid we' He: da" mungdang: gi lo, yo lo, moo kyi: nyhed cab ci: lho: zhoung: to" da" sheing: myibung: nyhed loem: da" agyoo: moo so" yen" su: jang" mo mungdang: nghoid.

²Nang ci koid lid loo bye: da" moozoo" ri ngoo se'- nang khayhi' yoem: kaid lho: moo" zei: nyid zi nang khayhi' yo" kham zeung: nyid ziri ngoo se' nyid. Nang gi akhyeung" da" byu yi yo' lagyoo: anghoid zi lagyoo: nghoid ga: mhoug mo, ri ca: yu" lho: se' lang" gi khyam" sa abyid: lo: ziri ngoo se.

³Nang gi kham, zeung: lho xang: shed" re sho" jhen: kyi khyeug khyoo: ri gye" kham, bye- nghoid loug we' ce" yoem: ashoin:.

⁴Nghoid loug we' nang ngoori xang: shed" yhang: ti" ajheddab loo: yoomo nang ri yooboo foin: jang: ngoo myang.

⁵Nang khayhi' byed gyoo" loo" bye: ziri se' we' re" da" yooboo mo nheigloem: thed' lo lho: xang: shed" ri cang loo bye: yhang: ti" bdem cang we'. houg: su" nheigloem: athed, loo lo: nghoid rigi re" jhang khyoo: ngoo re" wigi re" da" myibung: ri hau: joyoo mo ngoo yu pyam' byid: wa.

⁶Nghoid loug we' Nikola da" cangzoo: yi da" aved asam" ri ngoo ngheung" nyid yhang: ti"- nang we' bo ngheing" yoomo nang ri coung" byid: cang daloem: bo ashi.

⁷Venyi gi phung yi ri khasu" ga: tid nyid ziri nukhyab' dab, bang: gi gyo: yu goo" baja". Oung: doid loo" bang: ri Mangso khyam: moo youg jo, da" kangso' shi" gam, mo ashi" ri zoo: wa da" akhang" ngoo byid: wa nghoid.

⁸Samurna phung da" moug: lagyoo: jhang khyoo:- hid: su" ein: lhid" kaid we' He: da" dang: gi xang: shed' su: yo' lo" thang su:- shid: lo" lho: kangso' doem dei loo su: youg jang" mo mungdang: nghoid.

⁹Nang thoung" shau" nyid da" sho" jhen: jamjau khyoo: ri ngoo se' nyid nang gi damyoug sho" jhen: nyid nghoid loug we' gyeing" nyang: ga: rigi nang yoo" su: di su: nghoid nyid. Nyang: nya: da" gung ri Yuda byumyu" nghoid ga: tid nyid mo, gi nang ri theung shang" gyi koid mo, nghoid nyid boem ziri ngoo se' nyid. Nyang: nu" gyeing" gyeing" ga: rigi Yuda byumyu" anghoid- satan: da" byumyu" yi danghoid nyid boem ago".

¹⁰Nang shau" kham, zoo: wa da" sho" jhen: jamjau shid re" agyug nyid. yu satan gi nanu" mo dayham" bang: ri thung: moo lhoung to" lho: jham" ca: yu da" sho" jhen: shen" yhen zi shau" goo" wa nghoid loug we' nheigloem: geung: zug jo, we' houg: lang" ngoo nang ri oung: lo" da" kangso' bidmug byid: wa nghoid.

¹¹Venyi gi phung yi ri khasu" ga: tid nyid zigi nukhyab' dab, mo, gi gyo: yu goo" baja"- oung: doidloo mo, gi eig lheing: shid: da" jam joug shau" loo wa zi anghoid.

¹²Pargamu phung da" moug: lagyoo: ri hid: su" ein: lhid" we' he: da" mungdang: gi eig shoid tho' da" lhab, sham: yoo" su- jang" mo nghoid.

¹³Nang nyid da" joyoo ri ngoo se'- hau: joyoo gi satan da" zhung: tang jo, jang: nghoid. Nga" geing: zug da" sagsi: phoo- Antipa ri hau: satan nyid jang: moo said' pyam boem uri lang" nang gi ngoori loem" jeung" khyoo: ri ashe: pyam.

¹⁴Nghoid loug we' nanu" moo yooboo foin: jang: dajhi' bo- Khasu" wim gari Israela byumyu" ri soolhoo: ri teing: byid: da" zoo: noem ri zoo: wa ziyo' avoid avhu: ein: da" youg: shoo: goo" wa shid re" Bala, ri jhoug" byid: balam: da" jhoug" myeing" moo bo cang loo" bang: nanu" moo dayham" bo nyid ago".

¹⁵Houg: yo' dakhyoo" ti"- nanu" da" akhoug: moo Nikola da" cangzoo: yi jhoug" byid: da" akhyoo" moo bo cang loo" mo, we' bo nyid.

¹⁶Houg: yoomo re" yooboo mo nheigloem: myab, htid loo we' nheigloem: athed' lo nghloid rigi amyang" ri ngoo re" wigi nga" da" nhoid mo, thu da" lhab, sham: yo' nyangnu" ri jab, pyam' loo: wa.

¹⁷Venyi gi phung yi ri khasu" ga" tid nyid ziri nukhyab' dab, mo, gi gyo: yu goo" baja"- oung: doid loo" mo, rigi yhoem" to" da" Mana, zoo: yho' ngoo byid: lho: yug du: ngab, ri moin: moin: phyu: da" kyi: myhoo: lug daloem: loem byid: wa. Hau" lug boem mo myeing rigi shau" kham: yu su: mo lid wigi hang" we' ase' bo nghab.

¹⁸Thuatira phung da" mauglagyo: jhang khyoo:- hid: su" ein: lhid" we'. He: mungdang: gi myojid" myiyham: doem ti" dab, nyid wigi nya: khyid: gi gyid: gyeing" yhang: ti" doug bang nyid da" Mangso nya: zo: jang" mo mungdang nghoid.

¹⁹Ngoo gi nang ci koid nyid ziri se'- re" da" jheddab khyoo:- loem" jeung" khyoo: we' re" da" moo" voin khyoo: yo' nheigloem: sheung: khyoo: ri ngoo se. Akhid" nang zei: nyid moo" gi xang: shed" tho mo je ge ziri ngoo se.

²⁰Nghoid loug we' nang gi nya: jhoug" myeing" khyo" nga" cangzoo: yi ri avoid avhu: koid nhang: lho: soolhoo: ri teing: byid: da" zoo: noem zo: shug da" yooboo shoid sho' khyoo: shu" vhang: nhang: su:- myiyi: myhi, Yezebela ri nyid nhang: nyid shi" yoomo, nang ri yooboo foin: jang: jo.

²¹Nyang: ri nya: yooboo mo nheigloem: thed loo wa shid re" ngoo ayo, byid: too" bye- nghoid loug we' nyang: gi nya: avoid avhu: koid khyoo: mo nheigloem: anau htid' loo: nghoid da.

²²Houg: su" nghoid yoomo ngoo gi nyang: yo' dage" myi: shoid lang shoid da" moo" zei: nyid bang: ri gyi" sho' da" noodam' yo' nya: yhoeb cuang tho' moo du" pyam' too" wa nyang: yo' dage" akhyeung" da" moo" zei: lho: nheigloem: athed' loo mo, ri we' ngoo houg: su" nyang: koid loo wa.

²³Nya: thang: cang mo, ri we' ngoo said' pyam loo wa. Houg: lang" ngoo gi yug khang" mo" da" nheigloem: yo' myid soin: khyoo: joem ri myang kyang nyid su: nghoid ziri phung yi dangain" se' lo boem wa zi nghoid. Nyangnu" nya: da" lo, moo" yo' dakhyoo" ti"- aphoug" ri ngoo byid: loo wa zi nghoid.

²⁴Nghoid loug we' Thuatira voo moo deung nyid shi" da" byu yi dayham" gi hid: yhang: te" akhyeung" da" jhoug" myeing" khyoo: ri abo cang mo, yo' satan da" no, thang phajhi" khyau" khyoo: nghoid ga: subi" tid da" khyoo: moo abo cang loo" loo: za: deung nyid mo, nanu" da" tho' moo gootu: yoo: lid: ngoo afoin: loo.

²⁵Nghoid loug we' nanu" gi nanu" nya: da" lo, moo" ri ngoo ju" re" jang" moo ju" sho' geing: geing: teing teing zei: ci: ge'.

²⁶Ngoo vho: da" khyoo: moo lo" thang nyid" ju" sho' beung: abyid cang nyid khyo" yo" oung: loo" mo, ri nga" pho, jang" mo ngoo yo" yu da" amyeing" akhang" yo' dakhyoo" ti" ngoo byid: wa. Hau: da" amyeing" akhang" gi joto' lham: dung: yo' vhoeb, khang" lho: myid' zhoo" yam: joem ri agang gang asi" si"- mhoin' pyam yhang: ti"- nyangnu" gi byumyu" bain sho' tho' moo yo" oung: pyam' wa zi nghoid. Hau: boo" myhu: ri we' ngoo nyangnu" ri byid: shi" wa

²⁹Venyi gi phung yi ri khasu" ga: tid nyid ziri nukhyab' dab, mo, gi gyo: yu goo" baja".