Read Lashi Pang Shug 3 Bible Online

Pang Shug 3 - Lashi bible

Pang Shug 3

¹Sardi phung da" mauglagyo: jhang khyoo:- hid: su" ein: lhid" we'. He: da" dang: gi Mangso Venyi nyhed yug yo' kyi: nyhed cab, yoo" su: jang" mo mungdang: nghoid. Nang koid nyid da" moozoo" ri ngoo se. Nang gi kangso' dei nyid ga: fu" nyid nghoid loug we' shid: jo, su: nghoid nyid.

²Re" da" moozoo" gi nga" Mangso da" shid' khoin" moo ajoeb, abyeung" shi" ziri ngoo myang. Houg: yoomo too' we' re" da" kangso' bain sho' athang shi" uri yoem: kaid' we'.

³Houg: yoomo nang jhau" kham: yu bye: ziyo' shau" gyo: kham: yu bye: da" khyoo: joem ri doem myed boin: lho: houg: moo cang zei: loo" we'. Re" yooboo mo nheigloem: thed' loo we' nang alhid' nyid nghoid rigi khoug" su: yhang: ti" ngoo re" jang" moo ri" wa. Ngoo ju" ri" wa da" ayo, ri lang" nang se' wa zi anghoid.

⁴Nghoid loug we' Sardi voo moo nyang: nya: byimi moo aco' ajhloid alhu: lhu" ci: mo, dajhi' nyid houg: bang: gi moin: yi" mo, nghoid yoomo Byimi phyu: joem ri void ci: lho: ngoo yo' dage" shau" so" yen" boem wa.

⁵Oung: loo" su: gi houg: yhang: te"- phyu: young" da" byimi shau" void lho: nya: myeing ri we' Kangso' mougsoug" pug mo ngoo soid, pyam byid: wa zi anghoid. Nyangnu" gi nga" da" lagyoo: yi nghoid ein: nyang:- nga" phoo yo' nya: moug: lagyoo: yi da" shid khoin" moo- ngoo yhen: yu wa nghoid.

⁶Venyi gi phung yi ri khasu" ga: tid nyid zigi nukhyab' dab, mo, gi gyo: yu goo" baja".

⁷Philadephia phung da" moug: lagyoo: jhang khyoo: hid: su" ein: lhid" we'. He: da" dang: gi gyeungshang: ziyo' deingmain" su: jang" mo mungdang: nghoid. Nyang: gi David da" khoem" thoug" ci: su: nghoid. Houg: yoomo nyang: wigi khoem" ri phang too" lang" hang" we' ayo" myhid" loo- hau: lho: nyang: wigi khoem" ri myhed" too" lang" gi hang" we' ayo" phang lo: su:- jang" mo mungdang: nghoid.

⁸Nang zei: nyid da" moozoo" ri ngoo se'- nang gi yoem: so' dajhi' zoo: boo nghoid loug we' ngoo tid poin" da" dang: ri cang lho: nga" tho' moo geing: zug loem jeung" nyid khyoo: ri ngoo se' Re" shid' mo hang" we' ayo" myhed" to" da" khoem" daduang: ri ngoo phang too" byid: bye.

⁹Yu" ge'. nyang: nya: da" gung du: ri yuda byu nghoid ga: mhau' tid yen" mo, satan da" phung: moo boo mo, ri re" da" khyid: yang: moo lo goeb pid' nhang: wa houg: lang" nang ri ngoo jheddab khyoo: nyangnu" se' lo boem wa.

¹⁰Khasu" wim gari nang gi nga" da" dang: ri jhug zug cang nyid yoomo mougmyid gyab, goin" mo xang: su: byu yi ri jham" ca: yu" jam jau byid: lo da" bidnyid ayo, moo nang ri ngoo goem loem zung" lhug yu wa.

¹¹Ngoo phyed za: ju" ri" wam: bye- re" da" oung: lo" jhung: shug aphoug" gi hang" we' ayo" lhoid yu baja"- nang yo" yu bye: zi ri geing: geing: dazoem: ci: we'.

¹²Oung: doid loo" su: rigi nga" Mangso noku yhoem moo" khoug: mo khung: voin, zeing bung: daloem: bue" jo, nhang: wa nyang: gi houg: mo khanham we' thu' loo" loo: wa zi anghoid. Moug: khung: tho' nga" Mangso jang" mo ju" gyoo" lo da" Yerusalem voo gung seig ein: da" voo myeing ri we' nga" Mangso myeing ri we' ngoo nya: da" myeing seig ri we' nya: da" tho' moo lhid" tab too" byid: wa xo' lho: nya: da" tho' moo ngoo nya: myeing seig ri we' lhid" tab too" byid: wa.

¹³Venyi gi phung yi ri khasu" ga: tid nyid ziri nukhyab' dab, mo, gi gyo: yu goo" baja".

¹⁴Ladoki phung da" mauglagyo: jhang khyoo: hidsu" ein: lhid" we' He: da" mungdang: gi Mangsoo phain" to" da" ziyoo dangain" da" apoem: ayang: geung: teung jo, ziyo' deing byeung" da" sagsi: phoo- Amen, ga: su: jang" mo mungdang: nghoid.

¹⁵Nang moo" zei: nyid ziri ngoo se'- nang gi ngi" we' anghoid- jham" we' ajham"-su: nghoid nyid ziri ngoo se' nyid nang gi ngi" lang" nge" zi jham" lang" gi jham" ziri ngoo vho: nyid.

¹⁶Nghoid loug we' akhid" nang gi nge" zi we' anghoid- jham" zi we' anghoid-i, i, za: nghoid nyid yoomo nang ri nga" nhoid khoug: mo byi" thu' pyam loo wa.

¹⁷Ngoo gi yoo" su: di su: nghoid yoomo ci: we' aca" loo:- ga: nang tid nyid. Nghoid loug we' nang gi khayhi' gyeung" da" asho" ajhen: nheig khyeig cang boo su: nghoid nyid ziri Nanyang: gi ase' nhung: lha". Nang gi sho" jhen: su:- byumi adab su: myo, jed, nu loem: su: danghoid nyid.

¹⁸Houg: su" nghoid yoomo nang gi yo" loo de, loo wa shid re" sheing: gyeing" ri nga" jang" mo qei yu wa shid mo ngoo phajhi" byid - hau: tho' mo gootu: asho, ashid: da" shoo" cen: doem: moo goo wa shid re" yo' Nanyang: void wa shid re" phyu: gyeung" da" byimi ri nghoid loug we' nga" jang" mo qei yu we'.

¹⁹Ngoo gi ngoo nyang: jheddab mo, dangain" ri jhau" mho' lho: yoobo dam kaid' nyid houg: yoo mo nang gi yhoug: gyen: khyo" koid nyid lho: re" yooboo mo nheigloem: thed' loo re.

²⁰Yu" we' ngoo gi khoem" duang: moo yab, jo, lho: khoem" ko' nyid. nga" da" thui: ri shau" gyo: lho: khoem" ri phang byid: su: da" yhoem: khoug: khyoo:- ngoo vang lo" lho: nyang: yo' dage" zo: shug wa nyang: we' ngoo yo' dage" shau" zo: shug nyid wa.

²¹Ngoo gi oung: doid lo" wigi nga" pho, da" zhung: tang tho' moo nyang: yo' dage" shau" zhoung: jo, yhang: ti"- oung: doid loo" su: ri we' nga" zhung: tang tho' mo nga" nam, moo zhoung: jo, wa da" akhang" ngoo byid: wa.

²²Venyi gi phung yi ri khasu" ga: tid nyid ziri nukhyab' dab, mo, gi gyo: yu goo" baja".