Read Lashi Pang Shug 4 Bible Online

Pang Shug 4 - Lashi bible

Pang Shug 4

¹Hau: thang: ri gootu: da" yoeb, myang daloem: gi moug: khung: khoem" duang" bang" jo, ziri ngoo myang kaid. Hau: lho: laboo" daloem: moid myheung da" thui: te" ziyo' ngoori tid nyid da" dang: ri shau" gyo: zigi He: joyoo khyoo: do, loo we' thang: phyang" bue" loo wa da" moozoo" ri ngoo toin" shid ba, ga: tid nyid.

²Houg: lang" su venyi moo ngoo bo cang: lo" byug bye- moug: khung: mo hau: zhung: tang moo jo, da" joyoo tho' moo byu dayug zhoung: jo,

³Hau: youg da' myonhoo: gi Nagathoi lug nyoug yo' Paiddamya" lug nyoug yhang: ti" lo, lo, bang nyid. Zhung: tang da" loem: lheing khab, moo gi mya' lug nyoug yhang: te" da" seing: yhang: tei" to.

⁴Hau: zhung: tang da" ayam, aqei: lheing khab, moo gi zhung: tang eig xe: myid: loem: bo jo- Hau: zhung: tang tho' moo phyu: gyeung" da" byimi ri void ci: lho: sheing: bidmug zhoung" ci: da" ludaid' eig xe: myid: yug khyam, lheung zhoung: jo, ziri myang.

⁵Hau: zhung: tang mo lhab, myeug nyid ziyo' moug: goem: myheung da" thui: yo' thui: moo" thui: zeing myeung thu lo nyid zhung: tang shid' moo Mangso da" venyi nyhed yug ga: da" myi: bung: nyhed loem: we' dab, jo.

⁶Zhung: tang shid' khoin" moo kyi: myhoo: lug gyeing" yhang: te" da" paid' gyid thoem" deung jo. Hau: tho' mo gootu: zhung: tang da" loem: lheing khab, shoid khang" moo" moo shid' khyoo: thang: khyoo we' dagung goin" su. myojid" koem: da" gougnyhoug myid: ja: we' zheung: nyid nyid.

⁷Xang" shed" mo da" gougnyhoug gi khang khyi, yhang: te" zi nghoid- eig ja: ein: da" gougnyhoug gi Nu jung loo: yhang: te" zi nghoid- soem" ja: ein: wa da" gougnyhoug da" myonhoo: gi byu xang: su: myonhoo: yhang: te" zi nghoid lho: myid: ja: ein: wa da" gougnyhoug gi dang: lheung: yen" da" zoin boung: yhang: ti" du nyid.

⁸Hau: da" gougnyhoug myid: ja: goin" moo dung khyug khyab, khyab, dab, boem wigi gung tho' gung khoug: dangain" jang" moo myojid" za: byeung" sho' sho' dab, ago". Nyangnu" gi nyid" ri myen" ri anoo: ayab, loo: za: " shid' phyang" apyaid' he: da" apyaid' thang: phyang" apyaid' moo ju" sho' danyid nyid da" yoem: moo" bo Aseing: Mangsoo gi gyeungshang: gyeungshang: gyeungshang: nyid o"» ga: wigi coung" nghei nyid boem ago".

⁹Hau: da" gougnyhoug myid: ja: gi zhung: tang tho' moo zhoung: jo, da" apyaid atoo: moo dadei nyid su: ri myonhoo: phung" yoeb yo' phoug" tab ngi shab, byid: lho: jeju" so" da" jikhoin" dang: seig joem yo' khoin" khang" moo"-

¹⁰Ludaid' eig xe: myid: youg bang: gi zhung: tang tho' moo zhoung: jo, apyaid atoo: moo dadei nyid su: da" shid khoin" moo goeb khyo' lho: vhu" pid' peid ago". Nyang: nu" gi nyang: nya: da" bidmug joem ri zhung tang shid khoin" moo khyoid khyo to" lho: tid zigi

¹¹Ngoonu" da" Aseing: yo' Mangso- Nang gi jo, moo jo, ri phain" so: to" lho: wigi hau: gu: dangain" ri nang nyang: myid vho: khyo" dajo, jo, nhang: ziyo' kangso' dei nyid boem nhang: yoomo Nang gi phung" yoeb, myonhoo: yo" lho: phoug" tab ngi shab, byid: da" myonhoo: yoo" moin: nyid o"- ga: coung" nghei nyid boem ago".