Read Lashi RUTHA 2 Bible Online

RUTHA 2 - Lashi bible

RUTHA 2

¹Akhid" Naomi da" yhoem: seing: phoo Elimeleg ga: su: da" akung: mo gye" yoo" zo: da" mang: nhung" phoo dayug nyid. Nya: myeing gi Bua ga: zi nghoid.

²Danyid" da" bidnyid moo Moba myhi' Rutha gi nya: nid Naomi ri «Ngoo yoo khyoo: yhe: lho: dajhi' loem gi" mo, yoo moo gug gyoo" sho: koid: wa lhe"» ga: tid. Houg: lang" Naomi we' «Nga" dumoo" we" yhi: we'» ga: tid kaid bye:.

³Rutha we' yhe: lo" wigi gug yham" bang: da" thang: moo gug gyoo" cang koid: da:. Nyang: gi Bua da" yoo moo aboin: asoo" zang" yhi: byid:.

⁴Houg: lang" Bua gi Bedlehem: voogung khyo" ju" re" wigi gug yham" bang: ri re" shau" da:. «ASEING gi nanu" yo' dage" danyid nyid baja" o"» ga: tid da:. Nyangnu" we' «ASEING gi nang ri mainkaid byid: baja" o"» ga: doem tid boem.

⁵Hau: thang: ri Bua gi «He: myiyi: zoo: gi khayo- hang" nghoid lha"» ga: gug yham" bang: da" lagung" phoo ri myid: yu".

⁶Lagung" phoo gi «Moba mung" mo Naomi jang" moo bo cang lo da" tungbau myiyi: zoo: nghoid» ga: tid kyo".

⁷Nyang: we' «Ngoo gi gug yham" bang: da" thang: moo gyo" jo, da" gug gyoo" cang koid: wa lhe"» ga: tid lho: cang koid: yen". Akhanab mo zi akhid" daso' shi" zang moo byam theung: jang" mo ju" sho' koid: abye:» ga: tid.

⁸Houg: lang" Bua we' Rutha ri «Nga" zoo: we" tam" gyoo: we' yoo gookhyang" moo ayhe: koid:. Hid: moo athoid loo: za: nga" dei zoo: myiyi: nu" yi yo' zoem" nyid we'» ga: tid to".

⁹«Nyangnu" yham" lo" da" lo, zoo" ri yu" lho: nyangnu" da" thang: moo cang we' yug gi zoo: yi nang ri zoo: zi" azi" wa shid re" ngoo tid too" bye:. Nang gyid shed lang" gyid yam: moo yug gi zoo: yi kham: to" zi shug we'» ga: nyang: ri tid.

¹⁰Houg: lang" Rutha gi myidjang moo goeb khyo' lho: Bua ri «Nang ci: yoomo ngoo ri houg: yhi' gyeing" goin coung: lha". Ciyoomo tungbau byumyu" myiyi: zoo: za: date: nghoid ri nang aseing: ngoo ri houg: yhi' gyeung" nheig khyeug shoo" myen: lha"» ga: tid.

¹¹Houg: lang" Bua gi «Re" yhoem: seing: phoo shid: thang: ri re" nid ri nang dei zhoo" dei zhug da" khyoo: we' nang gi re" myhi' phoo yo' co' phyid moug: ri too" kho' lho: shid phyang" asi' go" da" byumyu" yi jhang khyoo: ju" re" da" khyoo: we' ngoo ri jid" jid" nug nug zheung: tid kyo" boem bye:.

¹²Re" lo, moo" yoomo ASEING gi nang ri mainkaid byid: baja". Coung: goem byid: wa shid re" nang nghe: khoug: vang lo da" Israela Mangsoo gi nang ri myo: tham: da" aphoug" shang" byid: nyid baja" o"» ga: nyang: ri tid.

¹³Rutha we' «Aseing: we" nang gi ngoo ri gye" nheig khyeug shoo" myen: abye: da:. Ngoo gi re" dei zoo: myiyi: nu" yi yo' lang" adu go" ziri aseing: nang gi dang: main dang: coug: yo' ngoo ri nheig teing byid: lho: re" join myhi' ri gau yi nhang: bye:» ga: tid.

¹⁴Hau: lho: voem: zoo: yo, moo Bua gi Rutha ri «Loo we' voem: lo zoo: we'. He: gyid xoin" jhen: yeing moo zooyho' joem lho: zoo: we'» ga: tid. Houg: lang" gug yham" bang: yo' dage" lo zhung: jo, lho: Bua we' nyang: ri gug gyoo" byid:. Nyang: we' zo: gyi: lho: deing lang" deung ashi".

¹⁵Rutha gi gug gyoo" koid: shi" wa ga: to' yhe: lo" uri Bua gi nya: dei zoo: yiri «Hau: myiyi: zoo: gi gug deing: mo gyo" da" gug gyoo" ri cang koid baja" nyang: ri atoem' goo". Gug gyoo" cang koid wa gug dayham" ri we' nya: shid re" teung too" khoo' byid: ge'. Nyang: ri koid: nhang: ge'» ga: pyeing: to".

¹⁷Rutha we' hau yoo moo myen" thang: ju" sho' cang koid: zi baid yu ri sungsoo: gug dabung koo: su" shau" koid: yu.

¹⁸Hau: ziri voin, lho: voogung khyoo: doem lo". Nyang: shoug" koid: da" gug nya: nid ri ci: shug. Nyang: zo: lho: deung lo da" lazoo: lashug we' lo" byid:.

¹⁹Houg: lang" nya: nid gi «Akhid" nyid" khayoo: yhe: koid: lha". Khayoo: yhe: zei: lha". Nang ri lhoem: goin coung: beung" se' yu su: gi ngilho' nyid baja" o"» ga: lhoem: tid. Rutha we' «Akhanyid" ngoo gug gyoo" yhe: koid: da" yoo seung: myeing gi Bua ga: zi nghoid» ga: nya: khyoo: nya: nid ri tid kyo".

²⁰Hau: thang: ri Naomi gi «ASEING gi Bua ri mainkaid byid: baja" O"» «Dei nyid mo, ri we' shid: jo, mo, ri we' jeju" byid: wa angheung" da" ASEING gi mainkaid byid: nyid baja"» ga: tid. Hau: lho: Naomi gi «Hau: su: gi nyhang" yo' je" jhang da" byumyu" akung: mo yha" yhoem: dakhyam" bang: nghoid» ga: nyang: ri tid kyo".

²¹Rutha doem xo' wigi «Hau: yug gi gug bain yham" sho' nga" dei zoo: yi yo' zoem" lho: gug gyoo" koid: yu we'› ga: tid» ga: tid kyo".

²²Naomi we' «Nga" dumoo" we" nang Bua yoo mo myiyi: nu" dei zoo: yi yo' zoem" ri je" ge'. Yoo gookhyang" moo nang yhe: nghoid rigi akung" akeig shoug" wa» ga: dumoo" Rutha ri tid da:.

²³Houg: yoomo nyang: gi gug yo' yoono, ri bain yham" shoung: ayo, ju" sho' Bua da" dei zoo: myiyi: nu" yi yo' zoem" lho: gug gyoo" sho: zoo" ri nya: nid yo' dage" danyid nyid.