Read Lashi RUTHA 4 Bible Online

RUTHA 4 - Lashi bible

RUTHA 4

¹Bua gi voogung khoem" moo" duang: mo zoebphung: jang: moo yhe: zhung: jo,. Hau: thang: ri Bua tid nyid su: Elimeleg da" jhang thang bidnoem seing: lid loo nyid lang" hau: yug ri Bua gi «Nga" byencang" phoo we" hid: moo lo zhung: kaid yu" shi" we'» ga: khe:. Houg: yug we' lheung: lo lho: lo zhung: jo,.

²Bua gi voogung mo ludaid daxi: yug ri we' khe: yu lho: «Hid: moo zhung: shang» ga: tid. Nyangnu" we' zheung: zhung: jo, uri

³Bua gi hau: mang: nhung" phoo ri «Moba mung" mo doem lo da" Naomi gi ngoonu" da" mang: nhung" phoo Elimeleg da" yoothung" yoogu: ri ung" nau wigi

⁴Hau: da" khyoo: ri nang si' eung: ein: ngoo jho:. Houg: yoomo akhid" hid: moo zhung: jo, mo, ludaid yi da" shidkhoin" moo nang vho: nghoid rigi qei yu we' ein: sham: nau. Nang hau: ziri avho: nghoid rigi avhoo: ein: tid we'. Khasu" wim ga: ri hau: yoothung" ri seing: ein: su: gi xang: shi" moo gi nang seing: eung: nang age bui" lang" gi ngoo moo eung: bye:.

⁵Houg: lang" Bua gi hau: mougmyid ri Naomi da" lo, mo qei yu da" nyid" ri shid: loo" su: da" mid mougmyid nghoid yoomo nya: myeing abyug wa shid re" nya: yhoem: seing: myhi' Moba myiyi: cougmoo" myhi' Rutha da" lo, mo we' nang qei yu ca" wa zi nghoid» ga: tid.

⁶Houg: lang" hau: mang: nhung" phoo gi «Hougsu" nghoid rigi mougmyid ri ngoo ayo" qei yu wa. Ciwim ga: ri houg: mougmyid yi nga" zoo: ri ayo" seing: yu wa nghoid yoomo nghoid. Nang dajha" qei yu we'» ga: tid.

⁷Shid phyang" mo wigi Israela byumyu" yi moo hid: yhang: ti" thung" ri: lhung jo, da" ziri khyoid yu go" khyoo:- zi thid ab go" khyoo: dang: theing go" uri dayug gi dayug da" khyid: baid ri khyoid yu lho: dayug ri lhung ab byid: yu". Hougsu" koid ri she' Israela byumyu" moo sagse: dageung: teung ga.

⁸Hougsu" nghoid yoomo mang: nhung" phoo gi Bua ri «Nang qei yu we'» ga: nya: khyid: baid khyoid yu lho: Bua ri byid:.

⁹Houg: lang" Bua gi zau ludaid yi yo' mung" byu yiri «Elimeleg da" agyid aso: moug: ein: da" Khilion da" agyid asoo: dangain" yo' Mahalon da" agyid asoo: dangain" Naomi da" lo, mo ngoo qei yu bye: da" khyoo: ri akhid" nyid" nanu" gi nga" da" sagse: yi nghoid bye:.

¹⁰Hau: tho' mo gootu: shid: bye: su: da" myeing ri nya: mang: nya: nhung" yi da" phung: mo we' nyang: nyid da" voogung khoug: mo we' athang byug sho' nya: da" agyid asoo: moug: moo nya: myeing ri tab too" wa shid re" Mahalon da" cougmoo" myhi' Moba myiyi: Rutha ri nga" myhi' zeing koid wa ein: ngoo qei yu bye: khyoo: ri we' akhid" nyid" nanu" gi nga" sagse: yi nghoid bye:» ga: tid.

¹¹Hau: khoem" duang: moo bo zhung: jo, da" mung" byu yi yo' zoug: ludaid yi dangain" bang: we' «Ngoonu" gi sagse: nghoid boem bye:. Re" yhoem: moo thu lo da" re" yhoem: seing: myhi' gi Yaku ri zooshang: myoo" sho' khu: byid: da" myiyi: Rakhela yo' Lea yhang: ti" bue" jo, sho' ASEING wigi soin' byid: zi nghoid bye:. Nang we' he: da" Ephrad moo yoo" zo: yoo" shug lo wigi Bedlehem: moo myonhoo: ngilang: bugthu sheing" jhu" loo baja" o".

¹²Apyaid we' agyi: shi" he: myiyi: moo ASEING byid: loo wa da" byumyu" yoomo re" da" byumyu" akung: ako' yi moo Yuda da" yhoem: seing: myhi' Thama ri khu: kaid da" Phared akung: ako' joem yhang: ti" nghoid loo baja" o"» ga: mainkaid byid: dang: ri tid ago".

¹³Houg: yoomo Bua gi Rutha ri nya: yhoem: seing myhi' khyo" shu" yu bye:. ASEING gi nyang: ri mainkaid byid: yoomo nyang: gi zoonu" gung bue" lo lho: yug gi zoo: ri khu: kaid bye:.

¹⁴Hougsu" nghoid yoomo myiyi: myi' da" byencang" yigi Naomi ri «Akhid" nyid" re" da" yhoemkhung: myidzoo: ri byid: da" ASEING gi ngi: lhoo' dang: khab nyid baja". Akhid" khu: loo su: we' Israela byumyu" moo myonhoo: bugthu sheing" jhu" loo baja"» ga: tid boem.

¹⁵«Re" dumoo" gi nang ri jheddab ziyo' yug gi zoo: nyhed yug tho' akyu" je bo da:. Akhid" nyang: gi zooshang: khu: byid: bye:. Hau zooshang: gi re" da" byunyid gyung: khyoo: aseig doem yo" loo nhang: wa su:- nang ri pyaid thang sho' yo" goin coung: byid: wa su: bue" loo wim bye:» ga: mainkaid dang: ri tid byid: boem bye:.

¹⁶Naomi gi hau: zoonu" ri vu, yu lho: nyang: yo' tab did" nyid lho: shu" gyi: kaid.

¹⁷Nya: yhoem: kyoo" cang" myiyi myhi' yi gi «Naomi gi yuggi zoo: yoo" bye:» ga: boem. Houg: zoonu" ri Obed ga: myeing myheing byid: boem bye:. hau: yug gi David da" nya: phoo Yese ri khu: kaid bye:.

¹⁸He: mhoomyid: gi Phared mo David moo ju" sho' da" akung: ako' yi mhoomyid: nghoid. Houg gi Phared- Hezron- Ram- Aminadab- Nashon- Salmon- Bua- Obed- Yese- David bang: nghoid.