Read Lashi 1 SAMUELA 11 Bible Online

1 SAMUELA 11 - Lashi bible

1 SAMUELA 11

¹Lhammoo" dakhyab kyo: thang: ri Amon khokham Nahasha gi nya: gyizoo: yiri shu" lho: Gilead mung" mo Yabesha voogung khyoo: yhe: lho: vang: lheung too" bye:. Yabesha byumyu" gi Nahasha ri «Ngoonu" yo' myid veung" da" dang: thang" cab daloem: koid too" shang. Hougsu" nghoid rigi ngoonu" nang ri ngoonu" da" vhoebkhang" su: khyo" lhoem: kham: yu wa zi nghoid» ga: tid ago".

²Nahasha gi «Akhyoo" daloem: da" dang moo nanu" yo' ngoo dang: thang" cab too" goo" wa zi nghoid. Byu dangain" bang: da" lo, ri yug khyau" lho: myojid" ri thau" phug wigi Israela byumyu" yi dangain" ri tid phue: pyam nhang: wa zi nghoid» ga: doem phug tid.

³Yabesha da" vhujhung: yigi «Israela mung" goin" jang" moo lagyoo: joem ri yo" nhang: kaid wa shid re" bidnyid nyhed nyid" ngoonu" ri byid: shi" we' hau: uri ngoonu" ri pang" wa zi hang" we' anyid loo nghoid rigi re" jang" moo ngoonu" asoem" kham: yu wa zi nghoid» ga: tid ago".

⁴Hau: lagyoo: yigi Sholu nyid da" Gibea voogung moo: ju" wigi hau: lu dang: nyangnu" ri tid kyoo" lang" byumyu" yigi nheigloem: thang lho: zheung: ngau lo boem ago".

⁵Sholu gi nya: nuloo: joem yo' yoo khyo" akhid" shi" ju" lo wigi nyang: gi «Ce: noem, shoid bye: la". Ciyoomo dangain" mo, ngau nyid go" la"» ga: myid: bye:. Nyangnu" gi Yabesha voogung mo lagyoo: yi tid kyo" da" lu dang: nyang: ri tid kyo" ago".

⁶Sholu gi hau: lu dang: ri shoug" gyoo: lang" Mangsoo Venyi gi: nyang: ri vhoebkhang" nyid ziyo' nyang: gi atho' tid lo: sho' nheigloem: byo, lo" da:.

⁷Nyang: gi nuloo: zoo: eig du: ri said wigi shoo" akhyi' khyi' yham" lho: lagyoo: yigi hau: shoo" khyi' joem ri dang ziyo' Israela damung" goin" jang" moo he: zid" nhang: da" dang: yo' dage" nhang: kaid bye:. Zid" nhang: kaid da" dang: gi «Sholu eig yug Samuela yo' dage" meing: zain: jang: khyoo: acang bang: hang" ri nghoid loug we' he: nuloo: tang: yhang: ti" bui" wa zi nghoid» ga: tid. Israela byumyu" yigi ASEING gi khasu" koid wa la" ga: gyoug: yoomo dayug we' adeung gyoo" loo za: nyangnu" gi dage" dangain" bang: thu yhe: lo" boem.

⁸Sholu gi nyangnu" ri Bezeg moo foem: phung: too" nhang: ri Israela byumyu" mo 300,000 yo' Yuda byumyu" mo 30,000 yug nghoid.

⁹Nyangnu" gi Yabesha mo ju" re" da" lagyoo: yiri «Nab yo nyid" nyid" gung aju" shi" ri nyangnu" ri khyoid yu zi shoug" wa khyoo: ri nanu" da" byumyu" yiri lo" tid kyoo" ge'» ga: tid boem. Yabesha byumyu" yi we' hau: lu dang: ri shoug" gyoo: lang" ase' tid loo: sho' gau yi nyid boem ziyo'

¹⁰Nahasha ri «Nab yo nyid" nang ri ngoonu" asoem" byid: wa. Nang vho: khyo" ngoonu" ri nang yo" koid wa nghoid» ga: tid.

¹¹Thang nab kyoo' no' mo Sholu gi nya: byu yiri soem" phung: kho' lho: nyangnu" nab soin: no' re" gyidab khyoo: dalheing: dam tang" vang yhe: boem wigi Amon byumyu" yiri khaid zain: lo" boem bye:. Nyid" gung ju" ri gyivoo ri yo" said toem" pyam boem bye:. Deung nyid shi" bang: we' nyang: tu: nyang: se' jang" khyoo: phang: sain" lo" byug boem bye:.

¹²Hau: thang: ri Israela byumyu" yigi Samuela ri «Sholu gi ngoonu" da" khokham koid wa zigi amoin: yi" ga: tid da" byu yi khayoo: nyid la". Ngoonu" da" lo, moo ab byid: ge'. Ngoonu" gi nyangnu" ri said pyam wa» ga: tid boem.

¹³Nghoid loug we' Sholu gi «Akhid" nyid" da" byid nyid gi ASEING gi Israela byumyu" yiri khyoid yu da" bidnyid nghoid yoomo dayug we' said pyam zi shoug" wa agi» ga: tid.

¹⁴Samuela gi nyangnu" ri «Nyhang" dangain" bang: Gilgala khyoo: doem yhe: lho: Sholu gi nyha" da" khokham nghoid bye: ein: yhe: tid fu" shang» ga: tid.

¹⁵Hougsu" nghoid yoomo nyangnu" dangain" bang: gi Gilgala khyoo: yhe: wigi Sholu gi khokham nghoid bye:- ein: ziri hau: deing byeung" da" joyoo moo tid fu" boem bye:. Nyangnu" we' zoem" khau: da" xoin" ri ngei" byid: boem wigi Sholu yo' Israela byumyu" yi dangain" pui" koid nyid boem bye:.