Read Lashi 1 SAMUELA 14 Bible Online

1 SAMUELA 14 - Lashi bible

1 SAMUELA 14

¹Danyid" da" ayo, ri Yonathan gi nya: da" gyi jonu" vu, byid: da" zooyam zoo: ri «Philisti dab khyoo: yhe: yu" shang» ga: tid. Nghoid loug we' Yonathan gi nya: phoo ri atid kyoo".

²Sholu gi Gibea voogung yo' athei" ve: da" Migron joyoo mo lamei shi" seiggam khyid: cang dab koid lho: nyid. Nyang: yo' dage" gyizoo: khyug shoo: koo: nyid boem ago".

³(Shilo voogung mo ASEING da" khainjung nghoid da" Eli myid: zoo: Phineha da" zoo: Ikhabo nya: mang: Ahitub da" nya: zoo: khainjung byikua" void ci: da" Ahiya we' bo nyid da:.) Yonathan thu lo" byug ziri hang" we' ase' kaid nghoid boem ago".

⁴Yonathan gi Mikmasha boem gyoo: khyoo: khyo" lid wigi Philisti dab khyoo: yhe: lo" ri hougmoo lug moo" zeing eig loem: jo, da:. Dasoid khyo: da" lug moo" zeing rigi Boze ga: myheing wigi thang: dashoid khyo: da" lug moo" zeing ri Sene ga: myheing to" ago".

⁵Daloem: gi mougzhung: shoid mo Mikmasha khyoo: shu: to" wigi thang: daloem: gi mougpyi: soid mo Geba khyoo: shu: to" da:.

⁶Yonathan gi zooyam zoo: ri «Thei: shooyid thang: ayham" da" Philisti byumyu" yi da" dab khyoo: yhe: yu" shang. Hau: ASEING nyha" tang: ri bo pang" wa zi nghoid. Hougsu" nghoid yoomo nyha" tang: ri oung: doid nhang: wa nghoid rigi nyha" tang: byu amyoo: nghoid loug we' nyha" tang: ri nyangnu" yo" toem' too" wa zi anghoid» ga: tid.

⁷Zooyam zoo: gi «Nang vho: khyo" koid we' ngoo nang yo' dage" nyid wa» ga: doem phug tid bye:.

⁸Yonathan gi «Nghoid bye: nyha" tang: thei: tab khyoo: dab yhe: wigi Philisti byumyu" yiri myang nhang: yu" shang.

⁹Nyangnu" nyha" tang: jhang khyoo: ri" wa ga: wigi nyha" tang: ri toem nghoid rigi nyha" tang: ju" nyid jang" moo theing: nyid wa.

¹⁰Nghoid loug we' nyangnu" jhang ri" wa shid re" nyangnu" nyha" thang: ri khe: nghoid rigi nyha" tang: yhi: shang. Ciwim gari nyangnu" ri oung: wa akhang" ASEING nyha" tang: ri byid: bye: ein: da" laxoem" nghoid nyid da» ga: tid.

¹¹Houg: yoomo nya: tang: gi Philisti bang: shidkhoin" moo yhe: nyid shug wigi Philisti bang: gi «Yu" ge' Hebre byu yi dayham" gi nyangnu" goug" jo, da" lug ug mo thu lo boem bye» ga: tid boem.

¹²Hau: thang: nyangnu" gi Yonathan yo' zooyam zoo: ri «Hid: khyoo: do, loo ge'. Ngoonu" nanu" ri daja: tid kyoo" wa» ga: khe: kaid da:. Yonathan gi zooyam zoo: ri «Nga" thang: moo cang we' nyangnu" ri Israela byumyu" yi gi oung: doid wa da" akhyoo" ri ASEING byid: bye:» ga: tid.

¹³Yonathan gi do: lho: do, loo" khari" bye:. Nya: zooyam zoo: we' nya: thang: khyoo: cang do, lo" nyid da:. Yonathan gi Philisti byu yiri zain: said toem" pyam bye: ziyo' nya: zooyam zoo: we' nyangnu" ri bo cang said pyam da:.

¹⁴Xang: shi" khaid zain: lheing: ri Yonathan yo' zooyam zoo: gi eka dago" yi" koo bo da" jang" moo byu eigxi: koo: said pyam bye: da:.

¹⁵Boem moug: moo nyid da" Philisti byumyu" dangain" bang: we' gyoug dain nyid ago". Dab moo nyid wigi meing: zain: wa da" gyizoo: yi we' gyoug nain" nyid boem. Mougmyid noin" loo" sho' gyoug dain nyid boem.

¹⁶Sholu da" byu yi Benyamin moug: mo Gibea joyoo moo zung" yu" nyid ri Philisti byu yi amyhoo: asain" tang" phang: yen" ziri myang bye: zi nghoid.

¹⁷Houg: yoomo Sholu gi nya: byu yiri «Gyizoo: yiri nghab yu" ge'. hang" byug ziri sho: yu" ge'» ga: tid. Nyangnu" sho: yu" ri Yonathan yo' nya: gyizi gyikhoo: vu byid: da" zooyam zoo: tang: byug nyid ziri shau" myang: sho: yu" da:.

¹⁸Sholu gi khainjung Ahiya ri «Hau: khainjung adang byikua" hid: khyoo: yu lo we'» ga: tid da:. Hau nyid" ri Ahiya gi Israela byumyu" yi da" shidkhoin" moo hau: ziri vu, ci: da:.

¹⁹Hau: khainjung phoo ri Sholu khe: nyid ri Philisti dab khyoo: amyhoo: asain" je wim lo wigi Sholu gi nyang: ri «ASEING ri myid: yu" wa da" ayo, akhyeing: ayoo" loo:» ga: tid.

²⁰Hau: thang: nyang: yo' nya: byumyu" yi we' Philisti byumyu" yiri khaid zain: wa ga: meing: zain: jang: khyoo: cang do, lo" ri Philisti yi nyangnu" nyang: cang" nyang: amyhoo: asain" bue" nyid boem.

²¹Philisti shoid khyoo: bo lho: nyangnu" dab khyoo dage" cang lo" da" Hebre dayham" gi dalheing: dam thid wigi Sholu yo' Yonathan bang: shoid khyoo: shoin" lo boem ago".

²²Ephrim boem moug: cang goug" nyid da" gootu: byu yi we' Philisti byu yi phang: loo" bye: ga: ziri shoug" gyoo: lang" nyangnu" we' shoin" lho: Philisti byumyu" yiri bo vang zain: wigi

²³Bethaven lid sho' khyoo: khyo" cang khaid bye:. ASEING we' Israela byumyu" yiri hau: nyid" ri khyoid yu bye: zi nghoid.

²⁴«Nga" da" goem lau gyi joem ri ngoo latoo: ayo" phug shi" ri akhanyid" da" bidnyid ri zoo: shug zoo: mo, hang" nghoid loug we' nheing" zi shoug" baja"» ga: Sholu jham' tang: wigi amyeing" byid: too" yoomo hau nyid" ri Israela byumyu" yi zooyoid wigi yoem: yoem" nyid boem. Hougsu" nghoid yoomo danyid" goin" hang" we' ciwe' azoo: loo nyid boem.

²⁵Nyangnu" dangain" seig moo" yoo khyoo: vang so" yen" yu" ri khyi' khang" moo" moo byoo: zei: jo, zi myang boem.

²⁶Sholu da" nheing" dang: khoin" ri gyoug yoomo seig khung" cang byooyhid: byeung" sho' boo nghoid loug we' hau: ziri hang" we' azoo: goo" nghoid da:.

²⁷Nghoid loug we' byumyu" yiri nya: phoo tid kyug to" ziri Yonathan ashau" gyoo: yoomo nyang: ci: da" vasi" yo' byooyho' akhoug: khyoo: thau" kaid wigi byooyhid: dajhi' ri yu zoo: bye:. Dalheing: dam nyang: yoem: bo lo.

²⁸Nghoid loug we' byu dayug gi nyang: ri «Ngoonu" dangain" mo, zooyoid wigi yoem: yoem" nyid zi nghoid nghoid loug we' re" phoo ngoonu" ri akhid" nyid" da" bidnyid ri zooshug zo: da" bang: dangain" nheing" zi shoug" wa» ga: tid ziri tid kyoo" bye:.

²⁹Yonathan gi nga" phoo gi ngoonu" byumyu" yiri gyoug pho" moo" zoo" koid too" bye: nhung:. Yu" ge' akhid" ngoo byooyhid: dajhi' zoo: yoomo ngoo khayhi' yoem: bo la".

³⁰Goem lau gyi yiri nyangnu" meing: zain: oung: thang: ri nyangnu" da" zooshug nyha" byumyu" yi shau" zo: nghoid rigi akhanyid" khayhi' yoem: bo wa. Myid yu" ge' Philisti byumyu" yiri khamyhoo' yo" said pyam shi" wa la"» ga: tid boem.

³¹Hau: nyid" ri Israela byumyu" yigi Philisti byumyu" yiri Mikmasha mo zi Aiyalon ju" sho' khaid said wigi meing: zain: oung: bye:. Hau: ayo, ri Israela byumyu" yi zooyoid lho: yoem: yoem" nyid yoomo

³²goem lau gyi yi jang" moo nyangnu" shoug" lhoid yu da" yang yo' nu: zoo: joem ri hau: joyoo moo nyang: said to" wigi shoo" yo' suid" zo: boem ago".

³³Sholu we' «Yu" we' he: byumyu" yigi shoo" ri suid" yo' dage" zo: wigi ASEING ri shoid boem abye: go"» ga: tid kyo" boem. Sholu gi «Nanu" gi dang: ri atam" gyoo: bang: nghoid goo" nhung:. Nga" shid re" hid: moo lugmoo" zeing daloem: doin: lheing: byid: too" ge'» ga: yoid tid.

³⁴Hau: thang: nyang: gi gootu: amyeing" ri doem byid: zigi «Byumyu" yi jhang khyoo: yhe: wigi nyangnu" da" yang yo' nu: joem hid: khyoo: yu ri" wa shid re" nyangnu" dangain" bang: ri tid we'. Hau: joem ri hid: mo said wigi hid: moo zoo: wa zi nghoid. Shoo" yo suid" ri zo: wigi ASEING ri nyangnu" yo" shoid wa zi anghoid» ga: tid. Hougsu" yoomo hau: myen nyangnu" dangain" we' nyangnu" da" nu: joem she: re" wigi hau: joyoo mo said boem.

³⁵Sholu we' ASEING shid re" xoin" to' jang: daloem: koid bye:. Hau: zigi nyang: xang: shi" koid da" xoin" to' jang: nghoid.

³⁶Sholu gi nya: byu yiri «Nyhang" gyoo" lo" wigi Philisti byumyu" yiri damyen goin" yhe: khaid zain: shang. Moug: boo" sho' cang lhoid yu lho: nyangnu" dangain" ziri said pyam shang» ga: tid. Nyangnu" gi «Nang ge wim jho: da" gu: ciri we' koid we'» ga: phug tid boem ago". Nghoid loug we' khainjung phoo gi «Mangsoo ri shi" myid: gyo: yu" shang» ga: tid.

³⁷Hougsu" yoomo Sholu gi Mangsoo ri «Ngoo Philisti byu yiri yhe: khaid said wa la". Ngoonu" ri nang oung: nhang: wa la"» ga: myid:. Nghoid loug we' Mangsoo gi hau: nyid" ri atu" byid:.

³⁸Hau: thang: Sholu gi byumyu" yi da" vhujhung: yiri «Hid: khyoo: ri" ge'. Akhanyid" khate" da" yooboo koid shoid too" bye: ziri phuid: sho' yu" goo" shang.

³⁹Nga" zoo: Yonathan nghoid loug we' yooboo koid shoid yug nghoid rigi said pyam zi shoug" wa ein: Israela byumyu" yiri oung: doid nhang: da" kangso' ASEING jang" moo ngoo dang: theing too" bye: zi nghoid» ga: tid. Nghoid loug we' hang" we ciwe' atid goo" nghoid da:.

⁴⁰Hau: thang: Sholu gi nyangnu" ri «Nanu" dangain" mo, thei: shoid khyoo: yab yu" ge'. Yonathan yo' ngoo gi he: shoid khyoo: yab wa» ga: tid bye:. Nyangnu" gi «Nang ge ein: jho: da" gu: ciri we' koid we'» ga: tid.

⁴¹Sholu gi Israela byumyu" yi da" ASEING Mangsoo ri «ASEING we" nang ciwim yoomo akhanyid" ngoo ri atu" koid nyid la". Israela byumyu" yi da" ASEING Mangsoo we"- deingbyeing" da" lugzeing khyo" wigi ngoo ri tid kyoo" byid: we' o".Yonathan anghoid lang" ngoo moo yooboo shoid nghoid rigi Urim shoid khyo" si nhang: we'. Nghoid loug we' re" Israela byumyu" yi shoid khyoo: eing nghoid rigi Thumin shoid khyo" si' nhang: we' o"» ga: tid bye:. Yonathan yo' Sholu nyid shoid khyoo: toin" shed nyid bye: yoomo byumyu" yigi yooboo mo loid byoin lo" ago".

⁴²Hau: thang: Sholu gi «Nga" zoo: Yonathan yo' nga" agyoo: moo dang: phyed byid: we'» ga: tid lang" hau: zigi Yonathan moo eing loo" bye: zi nghoid.

⁴³Hau: thang: Sholu gi Yonathan ri «Nang cenoem koid shoid bye: la"» ga: myid: yu" ri Yonathan gi «Ngo nga" lo, khoug: moo ci: da" voosi" yo' thau" wigi byooyhid: dajhi' zoo: bye: zi nghoid. Ngoo hid moo nyid ngoo shid: wa jen" jen" nghoid bye:» ga: phoug tid bye:.

⁴⁴Sholu gi nyang: ri «Nang akhid" nyang: ashid: nghoid rigi Mangsoo gi hau: tho' agoo" koid baja"» ga: tid.

⁴⁵Nghoid loug we' byumyu" yigi Sholu ri «Israela byumyu" yi shid re" hid yhi' gyi: da" oung: pui" ri byid: da" Yonathan gi shid: ca" wa zi nghoid la". Hougsu" anghoid. Nya: da" vhuloem mo xam: dakhaid we' ayo" byug wa ziri kangso' ASEING yo' ngoonu" dang: theing to" too" bye:. Akhanyid" nyang: koid da" moo" zoo" gi Mangsoo da" pang" thoug ziyo' yo" koid pyam bye: zi nghoid» ga: tid boem. Hougsu" yoomo byumyu" yigi Yonathan ri shid: wa jang" mo khoid yu bye: zi nghoid.

⁴⁶Hau: thang: ri Sholu gi Philisti byumyu" yiri khid said khyoo: ri: theing: lho: nyangnu" da" mung" shoid khyoo: doem tau" lo" boem bye:.

⁴⁷Sholu gi Israela khokham bue" thang: ri khyi khang" moo" moo nyid da" nyang: ri gyi koid bang: Moba byumyu" yi Amon yo' Edom byumyu" yi Zoba khokham joem yo' Philisti byumyu" yiri yo" khaid zain: bye:. Nyang: meing: zain: da" joyoo khang" moo" oung: doid zi shoug" yu bye: zi nghoid.

⁴⁸Nyang: gi seing" yang" myid yo' khaid zain: yoomo Amaleg byumyu" yiri we' oung: pyam bye: zi nghoid. Nyang: gi Israela byumyu" yiri khaid said lo da" gyivoo yi lo, mo khyoid yu bye: zi nghoid.

⁴⁹Sholu da" yuggi zoo: yigi Yonathan- Ishvi yo' Makhishua bang: nghoid ago". Nya: zoo: myiyi: nu" gyi: thang yug gi Merab ga: myheing wigi nge yug rigi Mikhala ga: myheing da:.

⁵⁰Nya: yhoem: seing: myhi' gi Ahimaza da" nya: zoo: Ahinoam nghoid da:. Nya: gyizoug: gi nya: laid Nera da" nya: zo: da" yhoem: vhoo: yhoem: tho' datang: ho' yi du da" Abna nghoid nyid da:.

⁵¹Sholu da" nya: phoo Kisha yo' Abna da" nya: phoo Nera gi Abiela da" nya: zo: tang: nghoid.

⁵²Sholu nyang: kangso' dei gu: dangain" moo Philisti byumyu" yi yo' meing: gye" zain: goo" ca" zi nghoid. Hougsu" yoomo yoem: bo lho: seing" yang" bang: dangain" ri myang khang" moo" nya: gyizoo: phung: moo: myheig kaid yu yu koid nyid.