Read Lashi 1 SAMUELA 20 Bible Online

1 SAMUELA 20 - Lashi bible

1 SAMUELA 20

¹Akhid" David gi Rama meing: Nayud voogung mo phang: thu' lo" wigi Yonathan ri «ce: noem koid shoid bye: la". Re" phoo ngoo ri said pyam noug sho' nyang: ri ngoo ce: noem koid shoid bye: la"» ga: myid: da:.

²Yonathan koem gi «Mangsoo gi nang shid: wa ziri avhoo: nghoid da:. Nga" phoo gi yhouggyen: loug we' ayhouggyen: loug we' nyang: koid wa da" zi dangain" ngoo ri atid kyoo" loo: koid wa zi anghoid. He: zigi ajoo nghoid da:» ga: doem phoug tid.

³Nghoid loug we' David gi «nang ngoo ri khayhi' jheddab nyid ziri re" phoo nyeing" za: se' nyid yoomo nang moo ju" sho' anoo nhang: noug yoomo za: nyang: khasu" lheing: nyid ziri nang ri asi nhang: loo: za: nyang: myid phyed too" bye: zi nghoid. Ngoo gi shid: wa lo, mo dabyi koo: daca" lo: ein: kangso' ASEING moo: ngoo nang ri theung to" byid: zi nghoid.»

⁴Yonathan gi «nang vho: khyo" cinghoid loug we' ngoo koid byid: wa zi nghoid» ga: doem tid bye:.

⁵David gi «Nab kyoo' gi lhammoo" xain" da" pui" bidnyid nghoid nyid wigi khokham' yo' dage" voem: shoin" zoo: wa nghoid ein: ngoo jho: nyid. Nghoid loug we' nang myid veing" nghoid rigi sang: phe: nyid" myen" thang: ju" sho' dain" pa: cang ngoo yhe: phang: nyid ba.

⁶Voem: zoo: jang: moo ngoo abo zhoung: zi re" phoo si' lang" nga" deungkhu: shid re" zain khang" moo" koid nyid da" xoin" to' wa da" ayo, ju" yoomo Bedlehem yhoem: khyoo: myab myab loo" wa akhang" yoo" sho mho' bye: khyoo: nyang: ri bo tid byid: we'.

⁷Nyang: nghoid bye: ga: tid nghoid rigi ngoo yo" loid wa zi nghoid. Nghoid loug we' nyang: nheig yo: zigi said wa shid re" nyang: myid phyed too" bye: ein: ziri nang se' too" we'.

⁸Je" ju" mo ngoo ri bo myid byid: shi" la o". Nang ngoo ri byid: bye: da" deungbyeung" da" dang: theing khoin" ri koid pyeing nyid we' o". Nghoid loug we' ngoo yooboo yoo" su: nghoid rigi nang nyang: ngoo ri said pyam we'. Ngoo ri said pyam wa zi da nghoid rigi ciwim yoomo re" phoo jhang khyoo: shu" loo" ca" wa la"» ga: doem phoug tid.

⁹Yonathan gi «houg yhang te" zi myid nyang: amyid shoid nyid. Nga" phoo nang ri said wa shid re" myid phyed to" ziri ngoo gyeing" nyang: se' nghoid rigi nang ri atid kyoo" loo: nyid wa rhe"» ga: doem phoug tid da:.

¹⁰Hau: thang: David gi «Re" phoo nang ri nheig yo: ziyo' phoug tid lo nghoid rigi ngoo se' sho' hang" re" tid kyoo" wa la"» ga: doem myid: bye:.

¹¹Yonathan gi «David pa: khyoo: yhe: yu" shang» ga: tid. Houg: yoomo nya: tang: thu yhe: wigi

¹²Yonathan gi David ri «Israela byumyu" yi da" ASEING Mangsoo gi nyha" eig tang: da" sagse: bui" baja". Nab yo nyid" yo' sang: phe: nyid" he: yo, ri nga" phoo ri ngoo myid: yu" shi" wa. Re" adang moo nyang: myid nyid da" zi ge nghoid rigi ngoo nang ri re" kyoo" wa zi nghoid.

¹³Nyang: nang ri shid: nhang: nau da" myid bo nghoid rigi hau: zi yoomo ngoo nang ri asi' nhang: ziyo' gye" gau: khyo" ayo" phang nhang: nghoid rigi ASEING ngoo ri shid: sho' yug baja" o". Hau: ASEING gi nga" phoo yo' dage" nyid yu" bye: ziyo' dayhang: ti" nang yo' we' dage" nyid nyid baja" o".

¹⁴Xo' wigi ngoo dei nyid shi" uri jeju" mo nyha" tang: da" deungbyeung" da" dang: theing ri cang pyeing wigi nga" jhang dang: zung" bo nyid we'. Nghoid loug we' ngoo shid: byug rigi

¹⁵Nga" deungkhu: da" adang moo: houg yhang: te" dang: zung" khyoo: apyaid atoo: daci: shug nyid we' o". ASEING gi re" da" gyivoo yi bain sho' ri said toem" pyam nghoid loug we'

¹⁶Nyha" eig tang: agyoo: moo to" to" da" dang: theing gi dageing: teing jo, shi" baja" o". Hau: dang: theing byo, lo" nghoid rigi ASEING nang ri dam byid: baja" o"» ga: tid da:.

¹⁷Yonathan gi David ri nya: gung ri yhang: ti" nyang: gye" jheddab nyid yoomo nyang: ri jheddab nyid khyoo: ri dang: theing dalheing: doem to" too" bye:.

¹⁸Hau: thang: Yonathan gi nyang: ri «Nab kyoo' gi lhammoo" xain" da" pui" bidnyid nghoid nyid ziyo' dayhang: ti" hau: zoo: shug pui" moo nang abo nghoid rigi nang anyid ziri yo" si' wa zi nghoid.

¹⁹Sang: phe: nyid" tho' mo jain" lang" nang anyid ziri yo" si' wa zi nghoid. Hougsu" yoomo nang ajang" yhe: gau" nyid da" joyoo khyoo: yhe: lho: hougmoo: jo, da" lugboem zung nungthang moo yhe: gau" nyid we'.

²⁰Hau: lugboem zung ri thang" thi: yhang: ti" koid wigi myoo: soem" khaid ri ngoo beig kaid wa zi nghoid.

²¹Houg: lang" nga" dei zoo: ri nhang: kaid wigi hau: yug ri yhe: shoo: nhang: wa zi nghoid. Houg: lang" nyang: ri ‹yu" we' myoo: joem gi re" nam moo za: danghoid nyid da:. Hau: myoo: joem ri koid: we'› ein: tid kaid lang" hau: zigi nang goug: nyu: tung" nghoid nyid ziyo' yo" thu' lo" ein: da" dang: nghoid. Houg: lang" nang moo gyoug ca" zi ciwe' aboo ein: ziri kang: so' ASEING ri: ngoo jham' tang: too" wa zi nghoid.

²²Nghoid loug we' ngoo nyang: ri ‹hau: myoo: joem gi gooshoid khyoo: danghoid› ein: tid lang" ASEING gi nang ri vi: khyoo: phang: nhang: nyid zi nghoid yoomo thu' loo" we'.

²³Akhid" nyha" eig tang: agyoo: moo to" too" bye: da" dang: theing yo' dayhang: ti" hau: ziri nyha" tang: apyaid atoo: yo" cang pyeing loo" baja" ASEING gi gyeing" nyang: koid byid: baja"» ga: tid bye:.

²⁴Hougsu" nghoid yoomo David gi dain" pa: cang goug" yen" bye:. Akhid" lhammoo" xain" pui" nyid" ri khokham Sholu gi voem: zoo: re" wigi

²⁵Pyiyam shoid khyo: khanham we' nyang: lhoung zhung: da" zhungtang moo zhoung: jo, da:. Abna gi nya: ayam moo zhung: wigi Yonathan gi nya: shid voem: zoo: jang: dashoid moo zhung: da:. David da" joyoo moo: akoem: bue" jo, da:.

²⁶Nghoid loug we' Sholu gi nyang: daja: ja: bui" bye: nyang: gi pui" thung" khyo" wigi gyeing" nyang: agyeungshang: loo:» ga: myid jho: nyid yoomo hau: nyid" ri nyang: ciwe' atid loo: nyid nyid da:.

²⁷Thang: nyid" nghoid da" lhammoo" xain" pui" thang: nyid" ri David da" joyoo moo akoem: xo' bue" jo, shi" yoomo Sholu gi Yonathan ri «Anyid" nab we' akhid" nyid" we' ciwim yoomo David voem: are" zoo: la"» ga: myid: bye:.

²⁸Yonathan gi nyang: ri Bedlehem voogung khyoo: yhi: nhang: wa shid re" ngoo ri nyang: akhang" mho' da:.

²⁹«Nyang: gi nga" ikoin deungkhu: byu yi hau: voogung moo: xoin" to' xoin" ngei" pui" koid nyid yoomo we' hau: joyoo khyoo: yhe: wa shid re" nga" mang: pyeung: kaid yoomo we'- Nyang: gi ‹nga" byencang" gi nyang: nghoid yoomo nga" bidnoem yiri lo" shoug" wa shid re" jeju" mo ngoo ri loo" wa akhang" byid: we' o"› ga: tid yoomo nyang: he: zoo: shug jang: mo nya: joyoo moo aju" zhoung: zi nghoid» ga: doem phoug tid bye:.

³⁰Sholu gi Yonathan ri nheig yo: ziyo' nyang: ri «Gyi koid ziyo' dang: azung" da" re" myhi' gi khasu" nghoid nyid la". Re" gung nyang: we' re" myhi yhang: ti ngoo ri sho' phu" nhang: wa shid re" David shoid khyoo: nang bo nyid zigi akhid" ngoo si' bye:.

³¹David dadei nyid cang cang gi: he: mung" dain moo nang khokham khanham we' ashau" koid wa ein: ziri nang ashau" myid rhe". Akhid" hid: khyoo: yhe: shu" loo we' nyang: ri said pyam wa zi nghoid» ga: tid.

³²Yonathan gi «Nyang: ciwim yoomo shid: wa la". Nyang: ce: noem koid too" bye: la"» ga: doem phoug tid bye:.

³³Hau: akhyeing: ri Yonathan ri said pyam wa ga: Sholu nya: lham: ri goin tang" kaid yoomo nya: phoo gi David ri gyeing" nyang: said pyam wa ga: myid phyed too" bye: nhung: ziri nyang: myid boin: bye: da:.

³⁴Yonathan nheig yo: ziyo' zoo: shug jang: mo to' loo" khare" wigi eig nyid" ein: da" hau: lhammoo" xain" pui" nyid" danyid" goin" ciwe' azoo: nghoid da:. Sholu gi nyang: ri sho' ze" phu" wigi David shid re" nyang: atho' tid loo: sho' nheig myid koug nyid da:.

³⁵Thang: nab kyoo' ri Yonathan gi David ri shoug" wa shid re" pa: dain" khyoo: nya: tang: tid go" to" da" akhyeing: ri yhe: loo" bye:. Nyang: gi zooshang: dayug ri nyang: yo' dage" shu" wigi

³⁶Nyang: ri «ngoo beig kaid da" myoo: ri tang" wigi yhe: sho: koid: we'» ga: tid da:. Zooshang: hau: yug tang" loo" khari" lang" Yonathan gi thang: khyo" myoo: dakhaid beig kaid bye: da:.

³⁷Myoo: gyo" da" joyoo moo: hau: zooshang: cang myhi: yhe: lang" Yonathan gi nyang: ri «Myoo: gi lid loo" khari" bye:.

³⁸Hougmoo: kyeing" ayab jo,- myab tang" we'» ga: nyho: tid. Houg: lang" zooshang: gi myoo: koid: ci: wigi nya: yhoem: seing: jhang khyoo: doem tau" loo bye:.

³⁹Hougsu" koid da" dang: kang: ri asi' nghoid loug we' Yonathan yo' David gi se' nyid zi nghoid.

⁴⁰Yonathan gi zooshang: nu" ri gyizi gyikhoo: ri ab byid: wigi voogung khyoo: yu tau" loo" wa shid re" byid: kaid bye:.

⁴¹Hau: zooshang: nu" loo" khare" thang: ri David gi lugboem zung nungthang mo thu' lo: wigi: myidjang khyoo: soem" lheing: goeb pid da:. Nyang: yo' Yonathan nya: tang: nyang: cang" babug bug wigi ngoug go" nyid da:. David gi Yonathan tho' je" nheig koug nyid da:.

⁴²Hau: thang: Yonathan gi David ri «Mangsoo gi nang yo' dage" nghoid baja" o". Hau: ASEING gi nang yo' ngoo ri we' re" akung: ako'' yiri we' nga" akung: ako'' yiri we' nyha" tang: agyoo: moo to" too" bye: da" deingbyeing" dang: theing ri apyaid atoo: geing: teing nyid nhang: wigi gyeing" nyang: deingbyeing" loo nhang: baja" o"» ga: tid bye:. Hau: thang: David thu' loo" khare" lho: Yonathan we' voogung khyoo: doem tau" loo" bye:.