Read Lashi 1 SAMUELA 22 Bible Online

1 SAMUELA 22 - Lashi bible

1 SAMUELA 22

¹David gi Gad voogung mo phang: thu loo" khare lho: Adulam voogung yam mo lug-ug daloem: khyoo: yhe: loo" bye: da:. Nya: mang: bang: yo' deing da" yhoem: byu dangain" bang: gi: nyang: hau: joyoo moo nyid ga: ziri shoug" gyoo: lang" nyangnu" nyang: ri re" shau" boem ago".

²Sube" wigi zeig zo: zi shoug" mo, jhen: dab zi shoug" mo, nheig koug nheig nge zi shoug" mo, nya: jhang re" wigi byu dangain" myid: shoo: koo: nghoid da:. Nyang: we' nyangnu" da" vhujhung: bue" loo bye:.

³David gi hau: joyoo mo zi Moba mung" Mizpa voogung khyoo: do, yhe: wigi Moba khokham ri «Mangsoo ngoo ri koid nhang: wa ga: ziri ngoo yo" se da" ayo akhyeing ju" sho' nga" yhid yo' ba" ri re" jang" moo nyid nhang: wa shid re" jeju" mo akhang" byid la o"» ga: tid bye:.

⁴Hougsu" yoomo David gi nya: myi phoo ri Moba khokham jhang ab to" wigi nyang: gi lug-ug khoug moo: danyid nyid gi nya: tang: we' hougmoo: nyid nyid da:.

⁵Hau: thang: lapi: Gad gi David jhang re" wigi «hid moo: anyid nyid loo:. Yuda mung" khyoo: dalheing dam loo" we'» ga: tid da:. Houg: yoomo David we' thu' loo" khare" wigi Hered kyoem: khoug: khyoo: yhe: loo" khari" bye:.

⁶Danyid" da" bidnyid ri Sholu gi Gibea voogung mo bouggung moo yug jo, da" Magyeing gam gyid" moo nya: lham: ci: wigi zhung jo, da:. Nya: zoug: yi we' nya: ayam moo yab jo, boem ago". Hau: uri David yo' nya: byu yiri myang sho: too" bye: da" khyoo: ri tid kyoo" bye: da:.

⁷Xo' wigi nyang: gi nya: zoug: yiri «Benyamin byumyu" yi we" tam" gyoo" ge' David gi nanu" dangain" mo, ri tung: yoo yoothung" khyam: joem yo' zabyid khyam: joem yo" byid: wa ein: jho: nyid go" la". Nya: gyidab moo zoug: aya: yo" byid: wa ein: myid jho: nyid go" la".

⁸Hougsu" nghoid yoomo nanu" ngoo ri thougtheung wa khyo" koid go" rhe". Nga" zoo: nyang: David yo' bidnoem koid to" khyoo: ri nanu" hang" we' ngoo ri atid kyoo" goo" nhung. Nga" shid re" dayug we' abo ci' byid: nghoid ago". Nga" zoo: nyang: nyang: ri yoem: byid: wigi ngoo ri said pyam wa shid re" akhid" ju" sho' akhyoo" ayo, sho: nyid da" nga" byu David da" khyoo: ngoo ri atid kyoo" goo" nghoid da» ga: tid da:.

⁹Sholu da" zoug: yi dangain" yo' yab jo, da" Doeg gi nyang: ri David gi Noba voogung moo nyid da" Ahitub nya: zoo: Ahimeleg jhang yhe: ziri ngoo myang.

¹⁰Ahimeleg we' David ri «khasu" koid byid: wa ga: ziri ASEING jhang myid: yu" wigi zooshug dajhi' yo' Philisti byu Goliad da" sham: ri we' David jhang ab byid: kaid da» ga: tid kyoo" bye:.

¹¹Hougsu" nghoid yoomo khokham Sholu gi khainjung Ahimeleg ri we' nya: bidnoem yi dangain" ri we' Noba voogung mo khainjung yiri we' khe: kaid yoomo nyangnu" we' nya: jhang khyoo: re" boem ago".

¹²Sholu gi Ahimeleg ri «Ahimeleg- tam" gyoo: we'» ga: tid. Nyang: gi «ASEING we" tam" gyoo: wa shid re" jen" jen" nghoid nyid bye:» ga: doem phoug tid da:.

¹³Sholu gi nyang: ri «ciwim yoomo nang yo' David ngoo ri thougtheung wa shid re" soin' myid ago" lha". Ciwim yoomo nya: shid re" nang Mangsoo ri myid: yu lho: zooshug yo' sham: dacam" ri byid: kaid lha". Akhid" nyang: ngoo ri doem tau" thougtheung wigi ngoo ri said pyam wa shid re" akhyoo" ayo, sho: wigi lang" nyid da» ga: tid.

¹⁴Ahimeleg gi «re" byu yi dangain" jang" moo David gi re" moo" voin mo, dangain" tho' moo: je loem ge" thang da" zoug: nghoid nhung:. Nyang: gi re" zoomo, we' nghoid. Re" gung ri lhoug zung" su: we' nghoid nyid da:. Khokham vang" moo we' byu dangain" mo, wigi coem phau" myang: su: nghoid da:.

¹⁵Nghoid bye:- nya: shid re" Mangso jhang ngoo myid: byid: zigi akhid" lheing: gi xang: shi" lheing: za: anghoid loo:. Nang ri thougtheung wa moo" zoo" yo' sen: zigi nang ASEING khyo" wigi ngoo ri we' nga" ikoin deungkhu: byu yi dangain" ri we' yooboo yo" foin: wa zi anghoid. He: khyoo: yo' sen: da" ziri ciri: we' ngoo ase' zi nghoid» ga: tid.

¹⁶Khokham gi «Ahimeleg we"- nang yo' re" bidnoem yi dangain" shid: wa zi nghoid» ga: tid.

¹⁷Hau: thang: nyang: gi nya: anam moo yab jo, da" gyi zung" bang: ri ASEING da" khainjung yiri said pyam ge'. Nyangnu" gi David yo' dage" moo" shoin" koid lho: nyang: phang: byug da" khyoo: ri we' se' nyid nghoid loug we' atid kyoo" nghoid da:» ga: tid. Nghoid loug we' gyi zung" bang: gi ASEING da" khainjung yiri said pyam wa shid re" he: pyam nyid boem ago".

¹⁸Hougsu" yoomo Sholu gi Doeg ri «Houg bang: ri nang said we'» ga: tid. Houg: lang" Doeg gi houg bang: dangain" ri said pyam bye:. Hau: nyid" ri nyang: gi xoin" ngei" byizuang void moin: bye: da" khainjung shed xe: wim yug ri said pyam bye:.

¹⁹Xo' wigi Sholu gi Noba voogung moo nyid da" byu yiri we' Khainjung yiri we' myiyi: yuggi- zooshang: yi noug" nu" yi nu:- loo zei: yo' yang dangain" ziri said pyam wa shid re" amyeing" byid: to" ziyo' dayhang: ti" hau: nyid" ri dangain bang: said pyam zi shoug" bye:.

²⁰Nghoid loug we' Ahimeleg da" nya: zoo: dayug nghoid da" Abiatha gi yo" phang: loid lo" wigi David yo' dage" yhe: nyid bye:.

²¹Nyang: gi ASEING da" khainjung yiri Sholu khasu" said pyam khyoo: David ri tid kyoo" bye:.

²²David nyang: ri «Houg moo Doeg ri ngoo myang nyid" ri nyang:- Nyang: gi Sholu ri gyeing" nyang: tid kyoo" wa ein: ziri ngoo se' nyid. Hougsu" nghoid yoomo re" bidnoem yi dangain" shid: zigi nga" yoovoin nghoid da:.

²³Ngoo yo' nyid shang- gyoug anoo". Sholu gi nang yo' ngoo ri said pyam nau nghoid loug we' nang gi ngoo yo' goug: nyu: tung" shoug" nyid wa zi nghoid» ga: tid.