Read Lashi 1 SAMUELA 23 Bible Online

1 SAMUELA 23 - Lashi bible

1 SAMUELA 23

¹David gi Philisti byu yi Kila voogung ri re" khaid zain: wigi shab zung too" bye: da" gug zoo mei: loem: aseig joem ri khau" yu nyid ga: ziri shoug" gyoo: bye:.

²Hougsu" nghoid yoomo nyang: gi ASEING ri «Philisti byu yiri ngoo yhe: said wa la"» ga: myid: da:. ASEING gi «yhi: we' nyangnu" ri yhe: said wigi Kila voobyu yiri khyoid yu we'» ga: doem phoug tid bye:.

³Nghoid loug we' David da" byu yi gi nyang: ri «Ngoonu" he: Yuda mung" moo hid: yhi ca" nyid ri Kila voogung khyoo: yhe: wigi Philisti byumyu" yiri yhe: said shang ga: zigi je" soem" wa da" moo" zoo" nghoid nyid da» ga: tid ago".

⁴Hougsu" nghoid yoomo David gi ASEING ri dalheing: doem myid: yu" ri ASEING gi nyang: ri «Philisti byumyu" ri yhe: said oung: wa da" akhang" ngoo nang ri byid: wa zi nghoid yoomo Kila voogung ri yhe: khaid zain: we'» ga: tid da:.

⁵Hougsu" nghoid yoomo David yo' nya: byu yi Kila khyoo: yhe: wigi Philisti byumyu" yiri yhe: said bye: ziyo' nyangnu" myoo: sho' ri said pyam wigi nyangnu" da" gougnyhoug joem ri yu lo" boem bye: zi nghoid. Hougsu" wigi David gi hau: voogung ri khyoid yu bye:.

⁶Ahimeleg da" nya: zoo: Abiatha gi phang: loid lo wigi Kila voogung moo nyid da" David yo' shoug" goo" lang" nyang: yo' dage" byizuang ri we' ci: re" abye:.

⁷Kila voogung khyoo: David yhe: loo" bye: ga: khyoo: ri Sholu ri tid kyoo" lang" nyang: gi «Vang khyam: kyam' to" lho: khoem" duang: myoo: sho' jo, da" voogung khyoo: yhe: vang lung" to" lho: nya: shid re" lhid nyang: thoung yu zigi Mangsoo nyang: ri nga" lo, khyoo: ab byid: da" zi nghoid» ga: tid da:.

⁸Hougsu" nghoid yoomo Sholu gi Kila voogung khyoo: yhe: wigi David yo' nya: byu yiri vang: lheung too" wa ga: nya: gyizoo: yiri khe: kaid da:.

⁹David gi Sholu nyang: ri khaid zain: wa shid re" soin nyid ga: ziri shoug" gyoo: lang" nyang: gi khainjung Abiatha ri «Hid: khyoo: xoin" ngei" byizuang yu re" we'» ga: tid da:.

¹⁰Hau: thang: David gi «Israela ASEING Mangsoo we"- re" dei zoo: nghoid da" ngoo nyid nyid yoomo Sholu gi Kila voogung khyoo: gyi phung re" wigi phyo' sain" pyam wa ga: ziri ngoo shoug gyoo: bye:.

¹¹Kila byumyu" yi ngoo ri Sholu da" lo, moo ab byid: goo" wa ga: la". Ngoo shau" gyo: ziyo' dayhang: ti" Sholu gyeing" nyang: re" wa la". Israela ASEING Mangsoo we"- ngoo ri tid kyoo" wa shid re" ngoo nang ri mho' yoid nyid.» ASEING gi «Sholu re" wa zi nghoid» ga: tid.

¹²David gi xo' lho: «Kila voobyu yi nga" byu yi yo' ngoo ri Sholu da" lo, khyoo: ab byid: wa zi nghoid lha"» ga: myid: bye:. ASEING gi «Nyangnu" ab byid: wa zi nghoid» ga: tid.

¹³Hougsu" nghoid yoomo David yo' nya: byu yi khyug shoo: koo: nghoid zi dangain" gi Kila voogung mo zi dalheing: dam thu' phang loo" khari" bye:. Kila voogung mo David phang: loo" khari" bye: ga: ziri Sholu shoug" gyoo: lang" nyang: soin' nyid ziri theing: pyam bye:.

¹⁴David gi boem moug: nghoid da" Zipha nam mo kyoem: khoug: cang goug" nyid yen" da:. Sholu gi nyang: ri khanham we' sho: nyid nghoid loug we' Mangsoo gi David ri nya: lo, khyoo: a ab pyam nghoid da:.

¹⁵Nyang: ri said pyam wa ga: Sholu thu' so" yen ziri David myang bye:. David gi Zipha nam mo kyoem: khoug: moo jo, da" Horesha moo nyid nyid da:.

¹⁶Yonathan we' nyang: nyid jang" moo re" wigi Mangsoo da" lhoug zung" goin coung: jeju gyeing" nyang: yo" kham: yu wa khyoo: yoem: re" byid: da:.

¹⁷Nyang: ri tid nyid zigi «Gyug aca"- Nga" phoo Sholu nang ri pyi: yo" shoo: wa zi anghoid. Israela khokham nang bue" loo wa ziri we' ngoo we' re" vhoo: mo aya: ri shoug" kham: yu wa khyoo: ri nyang: nyeing" za: se' nyid da» ga: tid.

¹⁸Nya: eig tang: gi dayug yo' dayug byencang" bue" nyid wa shid re" deingbyeing" da" dangsoo" to" too" bye: da:. David gi Horesha moo nyid kho' lho: Yonathan gi yhoem: khyoo: loo" khare" bye: da:.

¹⁹Zipha voobyu yi dayham" bang: gi Gibea voogung moo nyid da" Sholu jhang khyoo: yhe: wigi David gi Yuda kyoem: khoug: da" mougpyi: shoid moo jo, da" Hakhila boem atho' ngoonu" moug: nghoid da" Horesha moo: gau" nyid da:.

²⁰«ASEING khokham we" nang nyang: ri myheig yu nau nyid ziri ngoonu" se' wigi ngoonu" da" moug: khyoo: re" loo we' nang nyang: ri gyeing" nyang: yo" myheig yu wa ziri ngoonu" gyeing" loem jeing" nyid» ga: tid kyo" da:.

²¹Sholu gi «Nanu" ngoo ri nheig khyeug nyid yoomo ASEING nanu" ri mainkaid byid: baja" o".

²²Akhid" dalheing: doem lo" yu" yu" ge'. Nyang: khakhyi' moo gyeing" nyid ziri we' Hougmoo: nyang: ri hang" myang ziri we' lo" sho: yu" ge'. Nyang: gi gye" zid" lheug yen" ga: ziri ngoo shau" gyo: da:.

²³Nyang: gau" nyid da" ziri goolho' za: yo" se' yu lang" nga" jhang khyoo: dain: za: lu doem fu" ge'. Houg: lang" ngoo nyangnu" yo' dage thu' lo" lho: hau: moug: cang nyang: danyid shi" nghoid rigi ngoo gi nyang: ri Yuda khyeing" moin gyoo: mo yoo" sho' sho: yu wa zi nghoid.»

²⁴Hougsu" nghoid yoomo nyangnu" to' wigi Sholu da" shidkhoin" khyo" Zipha voogung khyoo: tau" phang: loo" khare" da:. David yo' nya: byu yi koem gi Yuda kyoem: khoug: da" mougpyi: shoid lang: khung" pyoid mo Maon kyoem: khoug: cang nyid yen" boem ago".

²⁵Sholu yo' nya: byu yi David ri cang shoo: wa ga: to' loo nghoid loug we' hau ziri David shoug" gyoo: lang" Maon kyoem: khoug: moo jo, da" lugzeing boem tho' khyoo: loo" nyid. Hau: lu dang: ri Sholu shoug" gyoo: lang" David thang: khyoo: nyang: cang yhe: lo".

²⁶Sholu yo' nya: byu yigi dashoid khyoo: nyid wigi David yo' nya: byu yigi gootu: dashoid khyoo: kho' wigi nyid nyid da:. Sholu yo' nya: byu yi nyangnu" ri myheig wa ga: jhang re" nyid lang" nyangnu" Sholu yo' nya: byu yi jang" mo myab myab tang" phang: lo" da:.

²⁷Hau: uri nyang:- lagyoo: dayug ju" lo wigi Sholu ri «Akhid" nyang: tau" loo we' Philisti byumyu" yi nyha" mung" khoug: khyoo: meing: zain: vang loo bye:» ga: tid da:.

²⁸Hougsu" nghoid yoomo Sholu gi David ri khaid myheig yen" ziri theing: wigi Philisti byu yu ri said wa shid re" to' loo" khari" bye:. Hougsu" yoomo hau: joyoo ri Kang" Pyam Byid: Joyoo ga: myheing to" boem ago".

²⁹David we' hau: joyoo mo thu' lo wigi Engedi moug: khyoo: yhe: wigi goug" jo, bye: da:.