Read Lashi 1 SAMUELA 25 Bible Online

1 SAMUELA 25 - Lashi bible

1 SAMUELA 25

¹Samuela shid: loo" bye: yoomo Israela byumyu" yi dangain" mo, zeing: re" wigi nya: shid re" nheig kug ziyo' nghau nyid boem bye:. Hau: thang: nyang: ri Rama voogung mo nya: yhoem: moo: myhoeb too" bye: da:. Hau: moo" zoo" bain thang: ri David gi Paran kyoem: khoug: khyoo: yhe: loo" khari" bye:.

²Houg: moo: Kharmela voogung ayam mo mougmyid ri seing: da" Maon voogung mo Nabala ga: myheing da" Khaleb da" akung: ako'' mo dayug nyid nyid da:. Nyang: gi gye" yoo" zoo: yoo" shug su: nghoid ziyo' nyang: gi yang soem: khyeing" coidbaid da khyeing" ri seing: too" su: nghoid nyid da:. Nya: yhoem: seing: myhi' Abigela gi yung" ziyo' phajhi" si' su: nghoid. Nghoid loug we' nyang: gi cen" ziyo' nheigloem: thain: su: nghoid da:. Nabala gi Kharmela voogung moo yang moug" yham" nyid ri

⁴Dain" pyoid moo: nyid yen" da" David gi hau: lu dang: ri shoug" gyoo: yoomo

⁵Nyang: gi Kharmela voogung moo nyid da" Nabala ri yhe: shoo: wa shid re" we' nyang: ri David shau" myid ga: ziri yhe: bo tid wa shid re" we' zooyam daxi: yug ri nhang: kaid bye:.

⁶Nyang: gi Nabala ri yhe: tid wa shid re" nyangnu" ri Pyeung: kaid zigi «Nga" byencang" phoo we"- nang we' re" ikoin deungkhu: byu yi we' nang yo' sen: bang: dangain" mo, we' David gi nyang: shau" myid da" khyoo: yo' gye" nheugshid: nheugdeug ziyo' nang ri myid so" da" akhyoo" ri pyeung: kaid da:.

⁷Nang yang moug" yham" nyid ziri we' nyang: shoug" gyoo: bye:. Re" yang zung" bang: ngoonu" yo' dage" nyid uri nyangnu" ri ngoonu" anoug akhyoid akoid nghoid da:. Nyangnu" kharmela moo: nyid nyid uri nyangnu" da" jonu" ciwe' aseing: yu akhau" yu da" khyoo: nang ri si' nhang: nau zi nghoid.

⁸Nyangnu" ri myid: yu" we' nyangnu nang ri tid kyoo" wa zi nghoid. Ngoonu" gi zoo: shug pui" moo ju" bye: zi nghoid wigi Ngoonu" ri goolho' za: lhoem: tau yu wa shid re" we' nang ri David pyeing" kaid. Jeju" mo nang ge bue" yhi' re" dei dei bang: ri we' re" jheddab byencang" David ri we' byid: kaid wa shid re" pyeung: kaid» ga: tid ago".

⁹David da" byu yi we' David da" myeing lang: wigi Nabala ri he: da" lu dang: ri tid kyoo" bye:. Hau: thang: ri nyangnu" hougmoo: lang" nyid boem ri

¹⁰Nabala gi lo" thang ri «David ga: o"- nyang: gi hang" nghoid. Ngoo nya: da" khyoo: dalheing: we' ashoug" gyo: yu" zi nghoid. He: ayo, akhyeing: ri mung" dain moo phang: yen" da" join myoo: sho' nyid nyid da:.

¹¹Ngoo nga" yang moug" yham" bang: shid re" soin nyheing to" da" zooyho yo' gyid- gougnyhoug joem ri yu lho: kha: mo thu' lo zi we' ase' da" bang: ri yo" byid: pyam wa lha"» ga: doem phoug tid bye: da:.

¹²Houg: lang" David da" byu yi we' nya: jhang khyoo: doem lo" wigi Nabala khasu" ga: tid ein: da" ziri nyang: ri lo" tid kyoo" bye: da:.

¹³Houg: lang" nyang: gi «Nanu" da" sham: ri voin ci: looge'» ga: amyeing" byid: kaid lang" nyangnu" dangain" bang: voin ci: bye: zi nghoid. David we' nya: sham: ri voin ci: wigi nya: byu myid shoo: yug koo: yo' dage" thu' loo bye:. Eig shoo: yug koo: gi thang: moo jonu" joem ri zung" nyid kho' da:.

¹⁴Nabala da" dei zoo: dayug gi nya: yhoem: seing myhi' Abigela ri «David gi ngoonu" da" aseing: ri shau" myid khyoo: ri dain" pyoid mo lagyoo: dayham" ri nhang: kaid khyoo: ri nang ashau" gyoo: la'. Nghoid loug we' nyang: gi nyangnu" ri anoug akhyoid koid bye: da:.

¹⁵Khasu" nghoid loug we' nyangnu" gi ngoonu" adang moo: gye" ge ziyo' ngoonu" ri khanham we' akung" keig nghoid da:. Pa: cang nyangnu" yo' ngoonu" dage" nyid yen" da" ayo, ri nghoid loug we' ngoonu" seing: da" jonu" daja: ri we' akhau" yu goo" nghoid da:.

¹⁶Ngoonu" da" gougnyhoug ri zung" wigi ngoonu" yo' nyangnu" dage" nyid da" ayo, moo: we' nyid" ri myen" ri ngoonu" ri lhoug zung" byid: boem ago".

¹⁷Jeju mo he: da" ziri myid yu" wigi khasu" koid wa ein: ziri myid phyed byid: we'. He: moo" zoo" gi ngoonu" da" ASEING yo' nya: yhoem: byu dangain" shid re" yau: khe" ziri ge bui" nhang: nyid da:. Nyang: gi gye" myid thain: wigi hang" tid ziri we' cishu: anhang: nghoid da» ga: tid kyo" da:.

¹⁸Abigela gi zooyho' eig shoo: loem:- Zabyid yeing shooyid thung: eig thung: byeung" byeung"- Kang: kyug bye: da" yang wim: du:- Ashi" bung: zi 31 joid: jain"- zabyid shi" pu" dashoo: pu"- Lafoem shi" kyug yo' koid da" zooyho' eig shoo: ri myab zheing" yu wigi loo zei: joem mo thoo' bye: zi nghoid.

¹⁹Hau: thang: nyang: gi nya: dei zoo yiri shid khyoo: yhi: lang" ge'. Ngoo thang: moo: cang re" wa ga: tid da:. Nghoid loug we' nyang: gi nya: yhoem: seing: phoo ri ci: we' atid too" nghoid da:.

²⁰Nyang: gi loo zei: zhung: lho: yhe: lo" ri Pyo' khyam" dakhyi mo khyoo: guid" daloem: moo: David yo' nya: byu yigi nya: jhang khyoo: re" lo nyid ziri nyeigdain tung" shoug" go" da:.

²¹David gi he: dain" pyoid yoo moo: beingvoo da" jonu" ri ngoo ciwim yoomo lhoug zung" byid: nyid la". Nyang: seing: da" jonu" daloem: ri we' khau" pyam byid: zi angoid. He: zigi ngoo nyang: ri pang" byid: yoomo nyang: ngoo ri doem tau" byid: zi nghoid eung:.

²²Nab soin: aju" shi" da" ayo, ri he: byu joem mo lo" thang yug ri ngoo asaid loo: za: teing to" nghoid rigi Mangsoo wigi ngoo ri baid baja" o" ga: myid soin: yu" nyid da:.

²³Abigela gi David ri myang lang" Loo zei: mo myab myab gyo" wigi David da" khyid: yang: moo: goeb pid lho:

²⁴Nyang: ri «Aseing we"- Jeju" mo ngoo tid da" dang: ri tam" gyoo: byid: la- Yooboo foin: riwe' kham: yu wa bye:.

²⁵Jeju" mo Nabala ri ciwe' asoin: yu lhe". Nyang: gi ciwe' asi' su: danghoid. Nyang: gi nya: myeing yo' dayhang: ti" koo" su: danghoid. ASEING we"- re" dei zoo: yi ju" uri ngoo hougmoo: anyid yoomo danghoid.

²⁶Re" gyivoo yiri said wa ziyo' latoo: phug wa da" myid bo nyid jang" mo hau: ASEING nang ri toem too" yoomo re" gyivoo yi yo' nang ri noo nhang: nau mo, dangain" gi Nabala yhang: ti" dam byid: zi shoug baja" ein: kangso' ASEING jang" moo jham tang: bye: zi nghoid.

²⁷Aseing jeju" mo re" shid re" ngoo yu re" da" jhungshug ri khab yu byid: la o". He: jhungshug joem ri re" byu joem ri byid: we' o".

²⁸Aseing we" jeju" mo ngoo koid shoid da" yooboo joem ri khyoid pyam byid: la o". Nang koem gi nang dei nyid da" ayo, ri age da" moo" zoo" ciwe' akoid ziyo' nya: da" meing: zain: pui" ri zain: byid: nyid yoomo ASEING gi nang ri we' re" akung: ako'' yiri we' khokham bui" nhang: wa zi nghoid.

²⁹Nang ri khaid zain: ziyo' said pyam wa shid re" yoem phain" nyid mo, nyid nghoid loug we' byu gi phau" dab da" jonu" ri lhoug zung" nyid yhang: ti" re" ASEING Mangsoo we' nang ri goug: sho' lhoug zung" wa zi nghoid. Re" gyivoo yi shidre koem gi byu dayug luggo, ri luglhei" pyi' yo' lhei" pyam yhang: ti" nang gi nyangnu" ri we' she: lhei" pyam wa zi nghoid.

³⁰Hau: ASEING gi nang ri dang: soo" khoin" byid: too" bye: ziyo' dayhang: ti" ge da" moo" zoo" dangain" zi bain koid lang" nang ri Israela khokham bui" nhang: wa zi nghoid yoomo

³¹Yooboo abo da" byu ri zang" said pyam yoomo we' nyang: nya: myid yo' latoo: phug pyam yoomo we' vhoo" byed da" myid yo' vhooloo kho" nheigloem: thid kham zo: khyoo: nga" aseing jang" moo aboo baja" o". Hau: ASEING nang ri main byid: uri aseing we"- Jeju" mo ngoo ri we' ato" myhid nyid o"» ga: tid da:.

³²David gi nyang: ri «Akhid" nyid" ngoo yo' shoug goo" wa shid re" nang ri nhang: kaid da" Israela byumyu" yi da" ASEING Mangsoo ri coung" nghei o".

³³Re" ge: da" emyed nheigloem: yoomo byu said youg: yo' nga" myid yo' latoo: phug wa ziri ngoo ri re" toem da" moo" zoo" akhanyid" nang koid bye: yoomo Mangsoo ri jeju" ri boin: so".

³⁴ASEING gi nang ri ngoo yau: khi" byid: wa jang" mo toem pyam bye: zi nghoid. Nghoid loug we' nang nga" jang" moo myab myab are" shoug" nghoid rigi nab soin: no' mo Nabala da" byu dangain" ri said pyam shoug" wa bye:- ein: gi dei nyid da" Israela byumyu" yi da" Mangsoo ri ngoo jham tang: too" bye: zi nghoid» ga: tid da:.

³⁵Hau: thang: David gi nya: shid re" ci: re" da" jhungshug joem ri yu to" wigi nyang: ri «Yhoem: khyoo: doem tau" loo" we'. Ci we' amyed ci' nyid loo:- nang vho: ziri ngoo koid byid: wa» ga: tid da:.

³⁶Abigela gi khokham shid re" zoo: shug pui" koid byid: wa yhang: ti" nya: yhoem: moo: pui" koid nyid da" Nabala jhang khyoo: doem tau" loo" bye:. Nyang: gi yhid: yed lho: gye" pyo: nyid yoomo thang: nab kyoo ju" sho' ciwe' atid loo: nyid da:.

³⁷Akhid nyang: yhid: yed byain: loo lang" Abigela gi nyang: ri akhyoo" dangain" ziri tid kyoo" bye:. Houg: lang" nyang: seing" gug thung" wigi gung joem: shid: lo" byug bye:.

³⁸Hau: thang: daxi: nyid" jain" ri ASEING gi Nabala ri said pyam yoomo nyang: shid: lo" byug bye:.

³⁹Akhid" Nabala shid: bye: ga: da" ludang ri David shoug" goo: lang" nyang: gi «ASEING ri coung" nghei o"- nyang: gi ngoo ri anoug akhyoid koid da" Nabala ri latoo: phug bye: ziyo' shoid da" moo" zoo" ri koid thu wa da" nya: dei zoo: ngoo ri we' toem pyam bye: zi nghoid. ASEING gi Nabala ri nyang: koid da" age da" moo" zoo" yoomo yooboo dam byid: bye: zi nghoid» ga: tid da:. Hau: thang: David gi Abigela ri lo, xo' yu wa shid re" lagyoo: dayug ri nhang: kaid bye:.

⁴⁰Nya: dei zoo: yi we' Kharmela voogung moo nyid da" Abigela jhang khyoo: yhe: wigi nyang: ri «David gi nang ri nya: yhoem: seing: myhi koid wa shid re" yu wa ga: ngoonu" ri nhang: kaid bye:» ga: tid.

⁴¹Abigela gi phyang" gung khyoo: goed pid lho: ngoo gi nya dei: zoo: yi da" khyid: cid" byid: wa shid re" jen" jen" nghoid nyid da" nya: dei zoo: dayug danghoid:.

⁴²Nyang: gi myab myab to' lho: nya: loo zei: moo zhung: bye:. Nya: dei zoo: dang cang: myiyi: yi wim: yug we' David da" dei zoo: yi yo' dage" cang lo" wigi nya: yhoem: seing: myhi lo" bue" nyid bye: zi nghoid.

⁴³David gi Yezrela voogung mo Ahinoam ri lo, bain xo' yu thang: ri Abigela we' nya: yhoem: seing: myhi bue" loo bye:.

⁴⁴Hau: ayo, ri Sholu gi David da" yhoem: seing: myhi bue" yu" bye: da" nya: zoo: Mikhala ri Gilim voogung mo Laisha da" nya: zoo: Palati ri byid: zhoo" bye: zi nghoid.