Read Lashi 1 SAMUELA 31 Bible Online

1 SAMUELA 31 - Lashi bible

1 SAMUELA 31

¹Philisti byumyu" yigi Israela byumyu" yiri Gilaboa boem moo meing: yhe: zain: da:. Hougmoo: Israela byumyu" myoo" sho' ri said pyam zi shau" wigi deing gu: moo: khokham Sholu yo' nya: zoo: yi ju" sho' phang: boem bye:.

²Nghoid loug we' Philisti byumyu" yigi nyangnu" ri cang khaid wigi Sholu nya: zoo: yi Yonathan- Abinadab yo' Makhishua bang: ri said pyam bye:.

³Meing: zain: go" zigi Sholu da" aqei: ayam' moo gye" thain: lo ziyo' nyang: moo: we' gyivoo myoo: zang" wigi dam zeing dab da:.

⁴Nyang: gi nya: gyizi gyikhoo: ri vu, byid: da" yuggi zoo: ri he: loem jeing" myid abo da" Philisti byumyu" yi ngoo ri yu" gau ziyo' asaid pyam baja". Re" sham: ri she: yu lho: ngoo ri said pyam we' ga: tid. Nghoid loug we' yuggi zoo: gi hougsu" koid wa shid re" gyoug nyid da:. Houg: yoomo Sholu gi nya: sham: ri yu lho: nya: gung nyang: thoug" shid: zo: da:.

⁵Sholu shid: lo" ziri yuggi zoo: myang lang" nyang: we' nya: sham: yo' nyang: thau" yu wigi Sholu yo' dage" shid: loo" bye:.

⁶He: zigi Sholu we' nya: zoo: yi we' yuggi zoo: we' shid: lo" khyoo: nghoid. Sholu da" byu dangain" we' hau: nyid" ri zheing: shid: byug bye:.

⁷Israela gyizoo: yi phang: byug ziyo' Sholu yo' nya: zoo: yiri said pyam bye: khyoo: ri Yezrela langkhung" thei: shoid moo nyid da" Israela byumyu" yi yo' Yodan gyid lang bid thu' shoid khyo: bang: shoug" gyoo: lang" nyangnu" da" voogung ri to" pyam kho' lho: phang: byug boem. Hau: thang: Philisti byumyu" yi voogung joem ri re" seing: yu boem bye:.

⁸Meing: zain: go" thang: nyid" ri shid: mang mo jonu" joem yu wa ga: yhe: lo" ri Sholu yo' nya: zoo: soem" yug da" mang Gilaboa boem moo leung jo, ziri myang boem.

⁹Nyangnu" gi Sholu da" vhuloem ri phyed yu Nya: gyibyi ri we' khyoid yu lho: nyangnu" yu soolhoo: yiri we' nyangnu" mung" byu yiri we' hau: ngei bu lu dang: tid khyoo" wa shid re" hau: jonu" yo' dage" Philisti mung goin" jhang khyoo: lagyoo: joem ri nhang: kaid boem bye:.

¹⁰Hau: thang: nyangnu" gi Sholu da" gyizi gyikhoo: joem ri yu myhi' Astarte da" yhoem: khoug: moo to" to" wigi nya: mang rigi Bed Shan voogung vang khyam: moo: nyangnu" baid jen" zhug too" bye:.

¹¹Philisti byumyu" yi Sholu ri hougsu" koid bye: khyoo: ri Gilead mung" mo Yabesha byumyu" yi shoug" gyoo: lang"

¹²Seing" yang" thang da" byu joem gi Bed Shan voogung khyoo: damyen goin" yhe: loo" khare" bye:. Nyangnu" gi vang khyam: moo baid jen" zhug to" da" Sholu yo' nya: zoo: yi da" mang ri yu lho: Yabesha voogung khyoo: ci: lo wigi nyangnu" ri hougmoo: nghe' pyam bye:.

¹³Hau: thang: shooyoug: joem ri yu wigi voogung khoug mo Magyeing gam khyid: moo myhoeb to" lho: nyhed nyid" ju" sho' zoo: shug zeing: nyid boem bye:.