Read Lashi 1 SAMUELA 6 Bible Online

1 SAMUELA 6 - Lashi bible

1 SAMUELA 6

¹ASEING da" Dang: Theing Kuid: gi Philisti moug moo lhammoo" nyhed khyab jo, thang: ri

²Philisti byumyu" yigi khainjung yi yo' fa" bang: ri khe: yu wigi «Hau" ASEING da" Dang: Theing Kuid: ri ngoonu" khasu" koid wa lha" ngoonu" hau: ziri nya: joyoo khyoo: foin: kaid wa nghoid rigi khasu" foin: kaid wa lha"» ga: myid: boem ago".

³Nyangnu" gi «Nanu" hau: Israela byumyu" yi da" Mangso Dang: Theing Kuid: ri doem toug" byid: wa nghoid rigi nanu" da" yooboo shid re" jhungshug yo' dage" gyeing" nyang: foin: kaid ca" wa zi nghoid. Dang: Theing Kuid: ri jhungshug aboo loo za: yo" foin: kaid wa zi anghoid. He: akhyoo" khyo" nanu" gi noo ge lo" zi shoug" wa nghoid lho: ciyoomo nyang: gi nanu" ri dam byid: nyid ziri we' se' lo boem wa zi nghoid» ga: tid.

⁴Byumyu" yigi nyang: ri «Ngoonu" ce" noem jhungshug foin: wa lha"» ga: myid:. Nyangnu" gi «Sheing: yo' koid da" shoo" pu' shoo" cab lhoo: wim: loem:- sheing: gyu, wim: du: hau: joem mo daloem: loem: gi Philisti khokham dangain" bang: shid re" nghoid wa zi nghoid. Nanu" dangain" yo' khokham wim yug da" atho' moo nhang: kaid da" vhu" thung" yoem" gi daja: za: danghoid nyid da:.

⁵Hougsu" nghoid yoomo byeing soolhoo: yo' nanu" da" mung" ri lhu: phyo' da" gyu, soolhoo: ri nanu" koid wigi Israela byumyu" yi da" Mangsoo ri phau" myang: khyo" wigi byid: ca" wa zi nghoid. Hougsu" nghoid ri za: nanu" ri we' nanu" da" yu phara" ri we' nanu" da" mung" ri we' nyang: dam byid: nyid jang mo theing byid: abe.

⁶Egutu khokham yo' Egutu byumyu" yi yhang: ti" ciwim yoomo nanu" nheigloem: gyi: nyid boem go" lha". Nyangnu" Israela byumyu" yiri Egutu mung" mo thu loo nhang: da" ayo, ju" sho' Mangsoo gi nyangnu" ri khasu" akoo" adoug: bui" nhang: da" khyoo: ri ato" myhid nyid goo".

⁷Hougsu" yoomo rheing" seig daloem: zhug wigi khanham we yoovoin afoin: yu" shi" da" nu: eig du: ri yu lho: rheing" moo tab wigi nya: zoo: yi rigi nukhoem: moo koin" kaid too" ge'.

⁸ASEING da" Dang: Theing Kuid: ri yu lho: rheing" dang moo ke" wigi hau: ayam mo kuid: daloem: moo nanu" da" yooboo shid re" byid: jhungshug ein: da" nyang: ri foin: kaid sheing: yo' koid da" soolhoo: joem ri kaid too" wa zi nghoid. Rheing" ri nya: khyoo: khyo" wigi so" shid" nhang: lho: nyang: kyeing" za: so" loo" nhang: wa zi nghoid.

⁹Hau: thang: ri hougsu" lo" ziri yu" nyid ge'. Hau: zi Bed Sheme voomoo" khyoo: yhe: lo" nghoid rigi hau: zigi Israela yi da" yu phara" nyhang" ri byid: kaid da" gyoug dain pho" noo phyoo" nghoid ein: da" dang: kang: nghoid. Nghoid loug we' hougsu" anghoid rigi vhuthung" yoem" nyhang" ri abyid: kaid ein: ziri nyhang" yo" se' yu wa nghoid. Hau: zigi bue" ein: yoomo bue" lo zi danghoid» ga: doem tid boem ago".

¹⁰Nyangnu" tid ziyo' dakhyoo" ti" nyangnu" koid abye: go". Nyangnu" gi nu: eig du: ri she: yu lho: rheing" moo tab wigi nu: zoo: yi rigi nukhoem: moo she: kaid to" boem abye:.

¹¹Nyangnu" gi Dang: Theing Kuid: yo' dage" sheing: byeing yo' sheing: gyu, lhoo: kaid to" da" kuid: ri we' rheing" dang: moo vu, ke" boem.

¹²Nu: zeung tang: gi Bed Sheme voomoo" khyoo: yhe: da" khyoo: khyo" wigi lo, kung" lo, yoo khyoo: thung avang loo: za: dain" za: yhe: lo" boem bye:. Nyangnu" gi myeing zoore yhe: lo" boem bye:. Philisti khokham wim yug goin" we' Bedsheme moug: khyoo" moo ju" sho' cang yhi: bye:.

¹³Bed Sheme byu yigi lang: khoug: cang sungsoo: yham" nyid boem uri nyangnu" nyeigdain tung" to' yu" kaid wigi Dang: Theing Kuid: ri myang kaid boem. Nyangnu" gi hau: ziri myang lang" atho' tid loo sho' gau boem da:.

¹⁴Rheing" gi Bed Sheme voobyu Yoshu ga: su: da" yoo moo ju" vang lo" boem bye:. Hau: joyoo mo lug moo" zeing ayam moo lo" theung: jo,. Byumyu yigi seig rheing" ri zain: phyo' pyam boem wigi rheing" nu: tang: rigi said lho: ASEING shid re" myi: nghe' xoin" ngei" byid: boem ago".

¹⁵Levi byu yigi ASEING da" Dang: Theing Kuid: yo' sheing: soolhoo: joem bo da" Kuid: joem ri dang yu wigi lug moo" zeing atho' moo ke" to" ago". hau: thang: ri Bed Sheme voobyu yi we' ASEING ri myinghi xoin" yo' gootu: da" xoin" ri ngei" byid: boem ago".

¹⁶Philisti khokham wim: yug we' hougsu" koid ziri zheung: yu" kho' lho hau: nyid" jang: Ekron voogung khyo: doem loo" khare" boem bye:.

¹⁷Philisti byumyu" yigi ASEING ri nyangnu" da" yooboo khyoid jhungshug ein: khyo" sheing: shoo" pu' shoo" cab' soolhoo: ri voogung daloem: moo daloem: loem: khyo" wigi Ashdod- Gaza- Askhelon- Gad yo' Ekron khyoo: nyangnu" foin: kaid boem ago".

¹⁸Hau: lho: nyangnu" gi sheing: gyu, soolhoo: joem ri we' nyangnu" da" voogung joem yo' vang khyam: joem abo da" voogung eig loem: goin" moo vhoebkhang" da" Philisti khokham wim: yug da" voogung dangain" jang" moo daloem: loem: byid: kaid boem ago". ASEING da" Dang: Theing Kuid: ri Bed Sheme voobyu Yoshu da" yoo mo lug moo" zeing atho' moo nyangnu" too" yoomo hau: joyoo moo ce" noem bue" lid loo" bye: da" khyoo: ri akhid" nyid" ju" sho' sagse: daloem: khyo" dajo, jo, nyid shi".

¹⁹Bed Sheme byu yigi Dang: Theing Kuid: ri phang yu" yoomo ASEING gi byu nyhed xi: yug ri said pyam bye:. Nyangnu" da" akhoug: moo hougsu" zain: go" da" moo" zeing ri ASEING wigi bui" nhang: yoomo byumyu" yigi ngougbyid ngougnhab yo' nheig koug nheig shu: khyoo: bue" nyid boem ago".

²⁰Hougsu" nghoid yoomo Bed Sheme voobyu yigi «Gyeung" shang: da" ASEING Mangso shidkhoin" moo hang" yo" yab jo, wa lha". Ngoonu" jang" mo nyang: ri khakhyoo: yo" nhang: kaid wa lha"» ga: wigi tid nyid boem ago".

²¹Nyangnu" gi Kiriad Yarim voobyu yi jhang khyoo: pyeing: dang: kyoo" mo, ri nhang: kaid wigi «Philisti byumyu" yigi ASEING da" Dang: Theing Kuid: ri re" doem byid: boem abye: go". Gyoo" re" wigi hau: ziri re" yu ge'» ga: pyeung: kaid boem ago".