Read Lautu Chin Matthai 10 Bible Online

Matthai 10 - Lautu Chin bible

Matthai 10

¹Zingsuv ta ziytuv hlyihning tie kha ku yite a pyalyipa thlaapa tie papya khuna hne pasana bangkhuo patluo sa khuna kha a pi yi.

²Hingpa hing lucuotuv hlyihning tie ming ta a cuo: pakhana ta Simon (Piter ama tapa paa) hne a nuta Andru; Zebedi saacapaapa Jeim hne a nuta Johan;

³Filip hne Bartholomew; Thomas hne ngukhyituv Matthai, Alfeas saacapaapa Jeim, hne Tadias;[17]

⁴Phangcuo Simon hne Zingsuv a lyituv Judas Iskariot ta ama cuo.

⁵Zingsuv ta pahraahlyihning tie kha pathlie yite a raw luo haahingta bie a taa yi: “Jentail ming ruo luo cuose, Samaria ming khy luo cuose a ngie kha ung.

⁶Cuorasala Israel mingphang chung taata a viepa tuv zaw'a luo kha vaa tie ung.

⁷Vaa ungla thuophaabie kha va phu tie ung, ‘Vuoruo pena ca aa ngie tli!’

⁸A pasapa kha patluo sa tie ung, a thiypa kha pathu pakhaa ung, caahminghmaa[18] ta a pasapa kha pathe sa ungla khuevuo kha papya tie ung. Niema ca a selawpa ta nama hmung, cacuonakaw a selawpa ta pi tie ung.

⁹Siy, ngu hne thiyhring tuokaa kha a cake kha ung.

¹⁰Khy tlawna riypa sahrie, buohryi zunghning, phyipakaw hne khuecahryi zaw kha a phya kha ung. Rehrietuv ca amaa hupa kha ring riypa ama cuo.

¹¹Tuokhaapa khypuv cuose khyta cuose namaa ngie tiyta palung tluosa pata ingtlung caa pa-awpa tie'a luo kha a ngie ungla nama si hluo li ama ing lie kha va aw ung.

¹²Ama ingchung luo namaa ngie tiyta bie a chang ung.

¹³Capa ing ca aa phuv kieca ama cunglie diena tlung sala, aa phuv li kieca diena ca niema'a luo vya kaa se.

¹⁴Pakhakha ta niema kha ca cuhluo lipa yi ta, nama bie zaw kha naa a thlie li kieca, khapa ing a cuo li kie khy kha nama sise tiyta nama phyipazaa lie buvcing kha a cakhawsue siy tie ung.

¹⁵Biehmisi tana ica chang yi: Bierinapa ning thueta ca Sodom hne Gomorrah khy khana capa khy laa cata a diy vie aa.

¹⁶Naathlie tie ung! Cahnie hraw luo pathliepa tuv haatana niema kha ica pathlie yi. Cacuonakawta pariy haata sing ungla thuvruv haata nama nang ne se.

¹⁷A raaring tie ung! Bierina zung luo ca chiykhyi'a yite apungna-ing lie kha asung ta aca tuv'a yi.

¹⁸Kama kawlieta iema hne Jentail ming cunglie tehte cuo riypata uvtuv byi hne siepahruo hmie luo kha aca chiykhyi'a yi.

¹⁹Bierina zung luo aca chiykhyi tiy yi ta tuokhaatama i ri aa tapa hne khaapa ma i ri aa tapa kha nama palung rie thyi kha se. Na ri riypa ca khapa cuo lie kha pi pata na cuo aa.

²⁰Bie a rituv hing niema cuo va ungciy, cuorasala nama Paa'a taata Thlaapa ta niema hmuo pata bie a ri patana a cuo.

²¹Uvcanu mamaa kha thie riypata malie kuv luo a pi'a yite, nung hne paa zaw ta saata kha cahaa cata ama tue aa, saata zaw khata nung hne paa kha a du'a yite thie riypata malie kuv luo kha ama pi aa.

²²Kama kawlieta cawsaa mekaa ta aca hue'a yi. Cuorasala a chuona te ta a ang pathla khupa ca khuo pata ama cuo aa.

²³Khy kha lieta hrisaathieruena nama ang kieca khy hrang luo kha a ruo tie ung. Biehmisi tana ica chang yi: Cawsaa Saacapaa aa zuv hluo ta Israel ruo khy bangkhuo hing patlung diy hmuo'a va ungciy.

²⁴“Siengaachie ca a saya laata le vie vyi, sii zaw a byipaapa laata le vie vyi.

²⁵Siengaachie pakha ca a saya tluv a ta kieca aa de, sii pakha zaw a byipaapa tluv a ta kieca aa de. Ingchungkhue lie a luv ce kha Beelzebul ama ta kieca, ingchungkhue ming changchiy ca khatluv tama thuo pachipa ama cuo aa,” a ta.

²⁶Cacuonakaw iema kha ciy kha ung. Pahruvpa bangkhuo hing pahawpa cuo'a te, a paruv ta tuepa bangkhuo hing pachang pata a cuo aa.

²⁷A zingna chunglie ica changpa yi hing a khena chunglie va ri ungla a paruv ta nama thyipa kha ingcung taata phu tie ung.

²⁸Pangpa dyi thie khu te thlaapa a thie khu lipa kha ciy kha ung, pangpa hne thlaapa a suohning ta hell[19] chunglie a thie khupa kha ciy vie tie ung.

²⁹Mingbaw sahning ca piesepa suokha tana ama zaa cuo vama? Cuorasala khapa mingbaw sakha kha hmuo nama Paa pachang li pata alyi luo tla'a vyi.

³⁰Nama luv lie nama suobuv hmuota a ri diy.

³¹Cacuonakawta nama thlaa zang kha se, niema ca mingbaw a hluvpuv laata nama sungnaa vie.

³²“Cacuonakawta cawsaa hmielie kama naa cuokhyipa ahunghmuota vuoruo i Paa hmiekunglieta i cuokhyi ra aa.

³³Cuorasala malie hmielie naa thawpa ca vuoruo i Paa hmielie ama zaw kha i thaw ra aa,” a ta.

³⁴“Alyi luo diena phya riypatana aa vaw tapata na rue kha ung. Diena phya riypata a vaw va ang, cuorasala zueziy phya riypatana i vaw.

³⁵I vaw hnuochuopa ca saacapaa kha paa padu sa riypa, sacanung kha nung padu sa riypa hne, munung kha navaapa nung padusa riypatana a cuo.

³⁶Nama carie tie ca nama chungkhue cawsaa mamaapa khatana ama cuo aa.

³⁷“Kama laata a paa a cuo li kie a nung a due viepa ca kama hneta a phuv vyi; a saacapaa a cuo li kie a sacanung a due viepa ca kama hneta a phuv vyi.

³⁸Ahunghmuo cuose a vieluo kha a puv pata kama hnang naa ziy lipa ca kama hneta a phuv vyi.

³⁹Ahunghmuo a hringnapa kha pabang a khingpa ca a hringnapa kha pahli'a te, cuorasala kama cuota a hringnapa a pahlipa ca hringna kha a hmung aa.

⁴⁰“Niema caa cuhluopa ca kama kha na cuhluo te, kama naa cuhluopa ca kama naa pathliepa kha a cuhluo.

⁴¹Profet kha profet a cuo nakaw ta a cuhluopa ca profet lawmuo kha hmung'a te, aa dangpa cawsaa kha aa dang nakawta a cuhluopa ca a dangna lawmuo kha a hmung aa.

⁴²Biehmisi tana ica chang yi: ahunghmuo cuose hing lieta a cawcepa pakha hing kama naa ziytuv a cuo nakawta tiy cakaapa nuokha a pipa ca lawmuo kha hmung li pata aw'a vyi,” a ta.