Read Lautu Chin Matthai 11 Bible Online

Matthai 11 - Lautu Chin bible

Matthai 11

¹Zingsuv ca ziytuv hlyihning kha bietaana a hnyi khu taayita, capa khypuv chunglie ta pacuv riypa hne phungri riypata capa hmang taa ca a pya.

²Tiynawtuv Johan ca Zingsuv ta a tuepa hmang kaw kha thaw-ing chung taata a thyi tiyta, a hnangziytuv tie'[20]a taakhata

³bie taa te, “Nama hing a vaw riypapaa ta na cuo ma, a cuo li kie cawsaa hrangpa ma huo kalie'a ma?” a pata sa yi.

⁴Zingsuv ta, “Vaa ungla nama thyipa hne nama hmungpa hing Johan ca va chang tie ung:

⁵mingcuepa tie ta ama hmung, a phyi cabiepa tie ta ama cakuo, caahminghmaa[21] a phyapa tie ama pathe, a naa ruepa tie ta ama thyi, a thiypa tie thupakhaa yite a siypasapa tie kha thuophaabie changpa ama cuo.

⁶Kama kawlieta a palung a ra lipa tie ca thluechiypa tana ama cuo,” a ta.

⁷Johan ziytuv tie ama kaa taata Zingsuv ta zaapuv kha Johan kaw a chang yi: “Khaapa mang riypata ma ruochung luo kha nama vaa? Thliy ta a canyipa phiepahlaa kung ma?

⁸Khaapa mang riypata ma nama va pya? Cawsie phasapa a tuepa pakhakha hmung riypata ma? Cawsie phasapa a tuepa tie ca siepahruo ing lie muo ama aw ta.

⁹Khaapa hmung riypata ma nama va pya? Profet ma? Aa hmuo, profet laata a le viepa na a cuo.

¹⁰Johan kaw hing Caapathepa ta, ‘Mang tie, nama cuota luo a sa riypata i biephyatuv kha, na hmie luo i pathlie lu aa,’ a tapa khana a cuo.

¹¹Biehmisi tana ica chang yi: Canung ta ama sapa hrawlieta Tiynawtuv Johan laata a le viepa aw vayi. Cuorasala vuoruo pena chunglie a cawcepa ca Johan laata a le vie.

¹²Tiynawtuv Johan chuo taata ata ning tepa hingta vuoruo pena ca a duna khuopuv ta ang te, a dutuv tie ta hruohra ta la amaa ting.

¹³Johan chuo te khata profet bangkhuo hne Moses phungbie ta vuoruo pena kaw hing ama ri;

¹⁴ca bie ca nama zang khing kieca, Johan hing a vaw riypa Elijah khatana a cuo.

¹⁵Thyina naa a hnyipa ca thyi tie ung!

¹⁶“Ata chuo cawsaa zaw hing khaapa hne tama i pakhingpuo'a yi? Chadawtluo lie a tu yite phuvkha hne phuvkha a khisuepa haatiy tie hne tana amaa lu.

¹⁷‘Ramang maca tungpa yi, cuorasala luo va ungciy. Caana hlaa maacaa ngiypa yi, cuorasala caa va ungciy.’

¹⁸Johan ca ning li dang li pata aa vaw tiyta, ‘khuevuo na a hnyi e ama ta’;

¹⁹Cawsaa Saacapaa ca ningpuo dangpuo te aa vaw tiyta, ‘Mang tie ung, ning a rangpa hne sahmaa a rangpa, ngukhyituv tie hne a suepa tie viesaa tana a cuo,’ ama ta. Cuorasala, singna ca aa hmuo tapa kha a thyipaa na a paluo sa,” a ta.

²⁰Zingsuv ta kharuehaana hmang hluv vie bangkhuo a tuenapa khy ming kha ama suena amaa ngiepachiy li nakawta a mawchie yi.

²¹“Khorazin khy hne Bethsaida khy, na ma cuota ciy aa chiysa hringhruo de! Niema'a lie tuepa kharuehaa hmang hing Tair hne Sidon khy lie tuepa za cuo sala, hluo ning taakhata cawchiepa a tue'a yite, buvcuo a phuv'a yite ama suena kha amaa zaa ngiepachiy'a mangtli.

²²Cuorasala ica chang yi: Bierinapa ning thue ca niema laa hing ta Tair hne Sidon ming cuota nangduena a aw vie aa.

²³Cakhutaa, nama Kapernaum khy, Vuoruo te tama naa pasuo khing? Cuo vyi, hell luo thawpa tana na cuo aa! Nama'a lie tuepa kharuehaa hmang bangkhuo hing Sodom lie tuepa za cuo sala, ata ning te hingta aa hmang aa!

²⁴Biehmisi tana ica chang yi: Bierina ning thue ca niema laa hing ta Sodom cuo tana nangduena a aw vie aa,” a ta.

²⁵Capa cuo ning kha, Zingsuv ta, “I Paa, alyi hne vuoruo Byipa! A singpa hne a thepa tie'a taata na nupa kha a the lipa tie cunglie na paluo sa nakawta icaa law.

²⁶A cuo, I Paa, capaca nama ta cuose tapata na khingpa a cuo.

²⁷I Paa ta hmangting bangkhuo ina pi diy tli. Paa ri li pata Saacapaa kha ahungtahmuo pachang khu vayi, cakhutaa Saacapaa hne Saacapaa ta pachang ra yi se tapata aa tlawpa tie ri li pata ca ahungtahmuo Paa kha pachang vayi.

²⁸“Hmangriy a phyapa hne a rie a thyipa bangkhuo kama'a luo a vaw tie ung, ica pahy sa hyalya'a yi.

²⁹I syihnaa kha a la pata phya ungla, kama'a taahingta a cuv tie ung; tahematapakieca kama ca a nangnepa hne raw a canawpa ta cuo ang te; a pahyna kha nama hmung aa.

³⁰Tahematapakieca i syihnaa phya ca na te i hmang ca aa hy,” a ta.