Read Lautu Chin Matthai 12 Bible Online

Matthai 12 - Lautu Chin bible

Matthai 12

¹Capa cuo ning, Sabbath ning kha Zingsuv ca lu kha capiepaa le te a si. Ziytuv tie ca ama nang a diy nakawta sa-uv kha pahriy paale yite a chuo kha ama baale.

²Farasi ming ta ama hmung tiyta, Zingsuv kha, “Mang tie, caa ziytuv tie ta Sabbath ning tue phung a cuo lipa ama tue hing,” ama ta.

³Zingsuv ta, “David hne a cawsaa zaw ama nang a diy ning kha David ta khaapama a za tue tapa kha ri buo va ung cama?

⁴Khazing ing chung luo kha a ngie te ama cuose, a viesaa zaw cuose, ningphung a cuo lipa, tluobyi tie dyi ta ning riypa, Khazing ama pipa viechuo ama ning pakha.

⁵Cakhutaata Sabbath ning ta tluobyi tie ta Biena-ing chunglie Sabbath phung kha ama para thluo pata a sue tapata ama cuo lipa kha Phungbie caa-uv chunglie ri buo va ung cama?

⁶Biehmisi tana ica chang yi: biena-ing laata a le viepa na hingpa lie hing a aw.

⁷Caapathepa ta, ‘hriykhung a rina laata nangduena na i khing vie,’ a tapa hingta khaapama a ri khing tapa kha pachang ungla ca a sue lipa kha sue phaw'a va ungciy.

⁸Tahematapakieca Cawsaa Saacapaa ca Sabbath Byi tana a cuo.

⁹Zingsuv ca khapa hmang taakhata pya te apungna-ing luo kha a ngie. Capa lieca a kuv a pakyapapaa kha a za aw.

¹⁰Ama a pachie khingpa tie ta Zingsuv kha, “Sabbath ning ta cawsaa patluo sa phung a cuo ma?” ama ta.

¹¹Zingsuv ta, “Abiephungpa ta niema chung taa pakhakha hingta tuv sakhata dyi hnyi ungla, kha nama tuv kha Sabbath ning ta khue chung luo a tla kieca thue li pata nama aw'a ma?

¹²Cawsaa ca tuv laata khatluv tama muo a hnyi vie! Cacuonakaw Sabbath ning ta hmangphapa tue ca a phung ta a cuo,” a ta.

¹³Cakhutaa a kuv a pakyapapaa kha, “na kuv pazuo,” a ta. Pazuo te a kuv ca hrakha luo haakhata a tluo.

¹⁴Farasi ming ca cakuo yite Zingsuv thie khuna riypa kha khue ama khuo.

¹⁵Zingsuv ta capa kaw ca a pachang tiyta capa taacata a pya. Cawsaa hluvpuv ta ziy yite, a pasapa bangkhuo patluo sa yite,

¹⁶ama kaw kha a ahunghmuo chang li riypata a thlu yi.

¹⁷Hinghaahingta a tuepa ca profet Isaiah pakaa taata Khazing ta:

¹⁸I tlawpa i changtaapa ca hingpa lie hingna a aw. I duepa ta cuote a cunglie i palung a tluo. A cunglie i Thlaapa za chi'a ang te, Ama ta a dangna bie kha mingphang bangkhuo'a luo a pathyi aa.

¹⁹Ama ca khuopuv ta khi li'a pata, Ahungtahmuo a ueryi kha Luopuv lieta thyi'a vayi.

²⁰Adangna kha tena a pacuo sa hluo li A tlipa phiepahlaa kung kha thlipachung li'a pata, A thiy'a nangpa myi-ing kha pache'a vyi.

²¹Ama ming ta mingphang bangkhuo kha a ruechuona ama hnyi aa,” a tapa patling sa riypatana a cuo.

²²Cakhutaa Zingsuv'a luo kha khuevuo ta aa hryi nakawta a ming cue te bie a ri khu lipa kha amaa vaw khyi. Zingsuv ta patluo sa te, bie ri khu te a ming zaw a vuo pakhaa.

²³Cawsaazaapuv ca ama nang uo te, “Hingpapaa hing David saacapaa ta a cuo'a ma?” ama ta.

²⁴Cuorasala Farasi tie ta capa bie ama thyi tiyta, “Hingpapaa ta khuevuo a papya khupa ca khuevuo byipa Beelzebul ta naw a pi nakawtana a cuo,” ama ta.

²⁵Zingsuv ta khaapama ama rue tapa kha pachang te, iema kha, “Khaapa ruo hmuo cuose iema hne iema a che yite a dupa tie ca rana luo na ama chiy aa. Cakhutaa khy khykha a cuo li kie ingchung khue khuekha ca a che te iema hne iema amaa du kieca a daa khu'a vayi.

²⁶Cahaa cata Setaa ta Setaa kha a papya kieca ama hne ama a dupa cuo te a ruo ca tuokhaatama a daa khu aa?

²⁷Kama na Beelzebul ming ta khuevuo a papya ang tapata a cuo kieca niema caa ziytuv tie[22] kha haw ahungma khuevuo papya khunapa kha a pi yi? Cacuonakawta iema khana niema cuota bie a chituv a cuo'a yi.

²⁸Cuorasala kama na thlaapa cahrana ta khuevuo a papya ang tapata a cuo kieca Khazing pena ca niema'a luo a vaw tli tanapa tana a cuo.

²⁹Cawsaa thaaruvpapaa kha ciypaki taa li pata ahungma a ingchung luo a ngie pata a chechiy kha a lapa khu aa? A ciypaki taa kiedyi na a la khu aa.

³⁰Kama naa daakhyi lipa ca naa dutuv tana a cuo. Kama kha pahmyapakhaw naa bya lipa ca a cadaapatlaatuv tana a cuo.

³¹Cacuonakaw, biehmisi tana ica chang yi: cawsaa hing ama suena phangting hne Khazing a du pata bie ama rina taata a ngiethe pata ama cuo aa, cuorasala Thlaapa a du pata bie ama ripa ca a ngiethe khu pata cuo'a vayi.

³²Cawsaa Saacapaa a du pata bie a ripa ca a ngiethe khu pata ama cuo aa, cuorasala Thlaapa Pathe a du pata bie a ripa ca ata chuo lie cuose, hmie luo chuo lie cuose a ngiethe khu pata cuo'a vayi.

³³“Thingthyi phapa lu the riypata thingkung phapa hnyi aa hu, a kung a chie kieca thingthyi a chie ra aa. Thingkung ca a thyi ta ma pa chang khu.

³⁴Pariy ciypathla tie zaw, cawsaa chiepa nama cuo pata ca tuokhaatama biephapa ca nama ri the aa? Pakaa ca pathiypalung chunglie a awpa khana a ri.

³⁵Cawsaa phapa taca hmangphapa a pacungpa chung taa khata hmangphapa pachiy te, cawsaa chiepa ta ca hmangchiepa a pacungpa chung taa khata hmangchiepa kha a papya.

³⁶Biehmisi tana ica chang yi: nama pakaa taata biesiysapawpa nama ripa bangkhuo cuo khata khaapanakawma i za ri tapa kha Bierinapa ning thueta ca nama pasie sa a hu aa.

³⁷Niema bie mamaapa khata duopacupa cuo'a ung cate, niema bie mamaapa khata suephawpa nama cuo aa.

³⁸Cakhutaa Phungbie saya tie chekha hne Farasi tie chekha ta, “Saya, kharuehaa hmang suokhakha na tuepa na ma hmung khing,” ama ta.

³⁹Cuorasala Zingsuv ta, “A pha lipa hne Khazing hmiekunglie zangtluo a tla lipa mingphang zaw ma kharuehaa hmang a hie ungciy? Profet Jonah kharuehaa hmang ta li pata kharuehaa hmang suokha hmuo tue'a va ang.

⁴⁰Jonah ta ngapuv riy chunglie ningthung hne zuothung a awpa haakhata Cawsaa Saacapaa zaw alyi chunglie ningthung hne zuothung a aw ra aa.

⁴¹Bierinapa ning thueta Nineveh khy ming kha a daa yite sue aca phaw'a yi, tahematapakieca iema ca Jonah phungripa ama za thyi pata sue amaa zaa ngiepachiy; ica chang yi: ama lie hingna Jonah laata a le viepa a aw!

⁴²Bierinapa ning thueta Sheba siepahruonung kha a daa te sue aca phaw'a yi, tahematapakieca ruo luohlaa puv taata Solomon singna hne a pacuvnapa naathlie repa ta a vya tlaw. Biehmisi tana ica chang yi: ama lie hingna Solomon laata a le viepa a aw!

⁴³“A pyalyipa thlaapa ca cawsaa chung taakhata pya te tiy aw lina ruocaapa chunglie kha a awna hmang huv te aa khie, cuorasala suvkha hmuo hmung vyi.

⁴⁴Cacuonakawta “I vya pyanapa ing luo khana i kaa pakhaa aa,” a ta. A kaa ca a ing kha a hripa, a pathesapa, hne a chikakysa pata a va hmung.

⁴⁵Cakhutaa vaa te ama laata a chie viepa thlaapa chiepa pasariy kha va u yite a vaw yite capa lieca ama aw. Capa cawsaapa aw zya ca a za cuotaana laa khata a chie vie. Cahaapa cana ata chuo cawsaa pha lipa zaw cunglie hing a tlung aa,” a ta.

⁴⁶Zingsuv ta cawsaazaapuv'a lie bie a ri nguoluo ning kha a nung hne a nuta zaw ta ama kha bie rihne riypata ale lie a daa yite ama huo.

⁴⁷Cacuonakaw cawsaa pakha ta, “Na nung hne na nuta zaw na bie rihne riypata ale lie caa huo yi,” a ta.[23]

⁴⁸Zingsuv ta ama paa kyihuo khata, “Ahungma i nung, hne i nuta zaw ta a cuo yi?”

⁴⁹a ta khu taata ziytuv tie kha a kuvdaw ta daw yite, “Iema hingna i nung hne i nuta zaw ta a cuo yi!

⁵⁰Ahunghmuo cuo sala vuoruo lie a awpa i Paa khingnapa a tuepa ca i nuta, i sieta hne i nung ta ama cuo,” a ta.