Read Lautu Chin Matthai 13 Bible Online

Matthai 13 - Lautu Chin bible

Matthai 13

¹Capa ning ngiethie cata Zingsuv ca ing taakhata pya te riyliy kielie kha a tu.

²A vya hmyasuepa cawsaazaapuv kha ama hluv tuv nakawta sawkawpalaw chung luo kha kie te aa tu, zaapuv ca ngiekuo lie kha amaa tu.

³Pakhingpuonabie a hluvsa kha hmuo te a pacuvpa yi ca: “Naa thlie tie ung! Saciy a vaatuv pakha saciy vaa riypata a si.

⁴Saciy kha a vaa tiyta, chekha ca luopuv lie tla te pavaa ta amaa haa.

⁵Chekha ca alyi a cawta dyi a aw napa lungdaa lieta ama tla. A lyi kha a chaa li nakawta saciy ca a pu paluo.

⁶Ning kya chiy te sadaa kha a e ca a thariy aa thuv li nakawta aa uv diy paluo.

⁷Saciy chekha ca a ahling hraw luo kha ama tla. Ahling khata kya le te a kalaa.

⁸Saciy chekha ca alyi pha napa lie kha tla te a che ta le zakha, a che ta le sawcaruv, a che ta le sawthung ama vyi.

⁹Naa[24] a hnyipa ca thyi tie ung,” ta te a pachuo sa.

¹⁰Cakhutaa ziytuv tie ca Zingsuv'a luo kha a vaw yite, “Khaapanakawma cawsaa kha bie na chang tiy yi ta pakhingpuonabie ta na chang yi?” tapata ama hiehriy.

¹¹Zingsuv ta, “Niema ca vuoruo pena kaw bieparuv pachang khuna kha pi pata nama cuo, cuorasala iema ca cuo vayi.

¹²A hnyipa kha pichiy hryly pata cuo'a te, cuorasala a hnyi lipa kha a hnyi tlakuopa hmuo lapa pata a cuo aa.

¹³Iema'a lie pakhingpuonabie i hmuonapa siyluo ca, ‘a mang ca mang raalaa yite hmung vayi, naa ca thlie raalaa yite thyi vayi, a pachang zaw pachang ra vayi.’

¹⁴Cacuonakaw profet Isaiah ta a ripa profet-biephu ca ama cunglie a tling. Naa ca nama thlie aa, cuorasala thyi the buo va ungciy, A mang ca nama mang aa, cuorasala hmungpasie buo va ungciy.

¹⁵Tahematapakieca ama palung ca ping te, ama naa ta thyi khu li pata ama ming kha ama pasing; Caca ama ming kha hmung li pata, ama naa zaw thyi li pata, ama palung ta pachang the li pata, Kama'a luo kha amaa vya pali the li riypa hne, Kama ta i patluosa li riy'apa yi khatana a cuo.

¹⁶Cuorasala niema ca thluechiypa tana nama cuo, tahematapakieca nama ming ta hmung te nama naa ta a thyi.

¹⁷Biehmisi tana ica chang yi: profet hluvpuv hne cawsaa aa dangpa tie hluvpuv zaw ta niema nama hmungpa hing ama za hmung khing hringhruo, cuorasala za hmung vayi, ama za thyi khing hringhruo, cuorasala za thyi vayi.

¹⁸“Cakhutaa, saciy a vaatuv pakhing-puonabie siyluo hing naathlie tie ung.

¹⁹Luopuv lie a tlapa saciy ca cawsaa pakha ta vuoruo pena kaw kha thyi raalaa te a siyluo a pachang li tiyta, a pha lipapaa kha a vaw te ama palung chunglie tuvpa saciy ca a lapa yi.

²⁰Lungdaa cunglie a tlapa saciy ca vuoruo pena kaw kha ama thyi pahne ta palung tluosa pata a cuhluopa tie kha ama cuo.

²¹Cahaapaapa cawsaa zaw chunglie ca aa thuvpuv ta hruo a thla li nakawta a syi ru vyi. Capa bie kawlie ruvnaana hne hrisaathieruena aa vaw pahne ta amaa palise paluo.

²²Ahling hrawlie a tlapa saciy tapa ca vuoruo pena kaw kha thyi raalaa te cuorasala hing chuelyi khysatungbangna kaw, hne sue hne thiy khingnapa ta capa bie ca a kalaa nakawta, thyipaa hnyi khu vayi.

²³Alyi phanapa lie a tlapa saciy tapa ca vuoruo pena kaw kha thyi te a siyluo zaw a pachangpa kha ama cuo. Thyipaa kha hnyi te chekha ta le zakha, chekha ta le sawcaruv, chekha ta le sawthung ama vyi.

²⁴Zingsuv ta pakhingpuonabie hrangpa kha a chang yi: “Vuoruo pena ca a lu chunglie saciypha a vaa papaa hne tana aa lu.

²⁵Cawsaa bangkhuo amaa hmung chung khata, cariepa pakha a vaw te saciy hrawlie kha lubi ciy vaa te dya a ruo se.

²⁶Cacuonakawta sakung ca kya le te a uv tiyta lubi kung ca aa kya luo ra.

²⁷Ingziypa a sii zaw ca a vaw yite, ‘Abyipa, na lu lie kha saciy phapa na na vaa cuo vama? Cacuokie khaapa taata ma lubi hing ama kya pu?’ ama ta.

²⁸Ama ta, ‘Hing hmang a tuetuvpa ca ma cariepa na a cuo,’ a ta yi. Iema ta, ‘lubi hing ma va phie'a maw? ama ta.

²⁹Ama ta, ‘phie'a va ungciy, tahematapakieca lubi nama phie pata sakung kha phiepuo pathlyi'a kie ungciy.

³⁰Sa hrie tiy a ta nate le hne thluo yi se. Sa hrie cuo thueta sa a hriepa tie kha, lubi ca pakhaw ungla myipung luo thaw riypata cataw tie ung, cuorasala sa ca sa-ing luo kha raw tie ung, i ta'a yi, a ta,” a ta yi.

³¹Zingsuv ta pakhingpuonabie hrangpa kha a chang yi: “Vuoruo pena ca cawsaa pakha ta uotuo ciy kha la te a lu lie a vaapa hne tana aa lu.

³²Saciy hrawlie ta a cawcepa saciy ta a cuo, cuorasala a kya le tiyta sakung hrawlie a lecepa ta a cuo, pavaa zaw kha a vaw yite ace lieta buv amaa vya tue,” a ta.

³³Zingsuv ta pakhingpuonabie hrangpa suokha a chang kalie yi: “vuoruo pena ca canung pakha ta la te muomuo beke zungkha lie a pyapa, capa muomuo a pathu sa diypa thiynung a cawta hne tana aa lu,” a ta.

³⁴Zingsuv ta hingpa hmang bang-khuo hing zaapuv kha a chang tiy yi ta pakhingpuonabie kha a hmuo, pakhingpuonabie hmuo li pata suokha hmuo chang vayi.

³⁵Hinghaahingta a ripa ca profet ta[25] a ripa a tlingna riypatana a cuo. Pakhingpuonabie hmuopa ta iema kha bie i chang'a yi; Chuelyi hruothu baataata za nupa hmang kha i phu aa,” a ta.

³⁶Cakhutaata, Zingsuv ca cawsaa-zaapuv kha thuse yite ingchung luo a ngie. Catiyta ziytuv tie kha ama'a luo a vaw yite, “Lu chunglie lubi pakhingpuonabie a siyluo kha malie chang tie,” ama ta.

³⁷Zingsuv ta, “Saciypha a vaatuv ca Cawsaa Saacapaa ta a cuo.

³⁸Lu ca chuelyicung ta a cuo; saciypha ca vuoruo pena a cutuv zaw ta ama cuo. Lubi ca cawsaa pha lipapaa saata zaw ta ama cuo.

³⁹Saciy pha lipa a vaatuv cariepa ca Setaa ta a cuo. Sa hrie cuo ca chuelyi cuochuona cuota cuote sa a hrietuv tie ca avuoming ta ama cuo.

⁴⁰Lubi ca pakhaw yite myipung luo ama hmaw pahaakhata chuelyi cuo chuo thue ca a cuo ra aa.

⁴¹Cawsaa Saacapaa ta a avuoming kha za pathlie'a yite, a pena chunglie phalina a tuetuv bangkhuo hne cawsaa a pasue satuv bangkhuo kha pahmya'a yite,

⁴²caana hne haariena a awnapa myipung chung luo kha ama thaw aa.

⁴³Cakhutaata aa dangpa ca ama Paa pena chunglie kha ning haata ama khe aa. Naa a hnyipa ca thyi tie ung,” a ta.

⁴⁴“Vuoruo pena ca lu chunglie ama nupa sue sungnaapa hne tana aa lu. Cawsaa pakha ta a hmung tiyta nu siy te, palung tluosa pata ing luo kaa te, a hnyipa bangkhuo kha zaa te capa lu ca a calyi,” a ta.

⁴⁵“Vuoruo pena ca palelungvaa phapa a huvpa sung a palipa pakha hne na aa lu.

⁴⁶Palelungvaa muosung ciemuopa kha a hmung tiyta a hnyipa bangkhuo kha zaa te capa palelungvaa ca a calyi,” a ta.

⁴⁷“Vuoruo pena ca tiyliy chung luo vaa yite ngaa phangtling a pa-uopa asue hne tana aa lu.

⁴⁸Ngaa a bi pahne ta asue kha ngiekuo luo a da pathla yite, a tu yite ngaa kha ama che, a phapa tie kha ama sawpaa chung luo pasuo yite a chiepa tie ca ama thaw.

⁴⁹Cuo chuonapa ning thueta ca capa haa ca tana a cuo aa. Avuoming kha vaale'a yite cawsaa phapa hraw taata cawsaa chiepa kha pache'a yite,

⁵⁰caana hne haariena a awnapa myipung chung luo kha ama thaw aa,” a ta.

⁵¹Zingsuv ta, “Hingpa bangkhuo hing nama thyi the ma?” a ta yi. Iema ta, “Ma thyi the,” ama ta.

⁵²Caacuonakaw Zingsuv ta, “Vuoruo pena cuota cawpa pata a cuo tlipa phungbie saya ca, a suethiy china ing chung taata suethiy thaapa hne suethiy hlungpa a papyapa ingziypa hne tana aa lu,” a ta yi.

⁵³Zingsuv ca pakhingpuonabie bangkhuo a chang khu taayita capa hmang taacata a pya.

⁵⁴A khy luo kha vaa te apungna-ing lie kha a pacuv yi ca ama kharue ta haasa te, “Hingpa cawsaa hingta hingpa singna hne hmang tue khuna hing khaapa taata ma a hmung?

⁵⁵Lettamaapa saacapaapa khata cuo vama? A nung kha Mary ama ta cuo vama? Jeim, Josef, Simon hne Judas kha a nuta zaw cuo vayi ma?

⁵⁶A sieta zaw bangkhuo hinglie hingna ama aw diy cuo vama? Khaapa taata ma hingpa bangkhuo hing a hmung aa? ta yite,

⁵⁷Zingsuv ca cuhluo khu vayi. Cuorasala Zingsuv ta, “Profet ca a khy lie hne a ingchungkhue lie ri li pata hmangting lieta ama pa-uvsathyi,” a ta.

⁵⁸Zangna ama hnyi li nakawta capa lieca kharuehaa hmang a hluvsa tue vyi.