Read Lautu Chin Matthai 14 Bible Online

Matthai 14 - Lautu Chin bible

Matthai 14

¹Capa cuo ning ca uvtuv Herod ta Zingsuv kaw kha thyi te;

²a kuv rawlie abyi tie kha, “Hingpapaa hing tiynawtuv Johan tana a cuo, thiyna taa na a thupakhaa, cacuonakaw tana hingpa kharuehaa hmang hing a tue khu” a ta yi.

³Herod ta a nuta Filip napuvnung[26] Herodias kawlieta Johan kha patuv te, a cakhiy sa khu taayita thaw a za pathla.

⁴Tahematapakieca tiynawtuv Johan ta Herod kha, Herodias naa hlawpa hing a phung ta cuo vyi,” a za ta nakawta a cuo.

⁵Herod ta a thie khing raalaa pata zaapuv kha a ciy yi, tahematapakieca iema ta Johan kha profet tana a cuo tapata ama rue.

⁶Cuorasala Herod puvnapa ning a vya chiy tiyta, Herodias sacanungnung ca zaapuv hmie lie kha luo te Herod ca a palung a tluo hringhruo

⁷nakawta ama kha khaapa aa hie zaw pi riypata chie a sa te bie aa kuo.

⁸A nung ta a pasupa haata,” Hingpa daapakhue hingta tiynawtuv Johan luv kha na pi tie,” a ta.

⁹Siepahruopa ca a ngie a chi, cuorasala chie a sa te bie aa kuopa hne a khyche tie hmie a mang nakaw yi ta pi riypata naw pi yite,

¹⁰thaw-ing chunglie Johan luv kha a pate sa yi.

¹¹Johan luv ca daa pakhue ta vya cyi yite lesaanung kha ama pi, ama ta a nung'a luo kha a cyile.

¹²Johan a ziytuv tie kha a vaw yite a riy ca la yite ama paby; cakhutaata vaa yite Zingsuv kha ama va chang.

¹³Zingsuv ca Johan thuohlaa a thyi tiyta capa hmang taacata pya te sawkawpalaw ta ruocakung luo kha ama seta a vaa. Cuorasala cawsaa ta capa thuo ca ama thyi tiyta ama khy cyicuo taata pya yite ama kha ama ziy.

¹⁴Zingsuv ca sawkawpalaw taata kya cung te cawsaazaapuv kha a hmung yi ca, iema kha ngiechi hringhruo yite, a pasapa kha a patluo sa yi.

¹⁵Capa ning zuoluo ta ziytuv tie ca ama'a luo kha a vaw yite, “Ning ta a ngie tli, ruocakung na lie a cuo. Cawsaa hing pathlie yi la, ma cahriy lie a awpa khy luo hing iemata tah ning riypa vaa calyi yi se,” ama ta.

¹⁶Zingsuv ta, “Iema cakuo a hu vyi, niema ta ning riypa suokhakha pi tie ung,” a ta yi.

¹⁷Iema ta, “Ma hnyipa bangkhuo ca viechuo tluo pangaa hne ngaa sahning hingna a cuo,” ama ta.

¹⁸Zingsuv ta, “Kama'a luo vya cyi ung,” a ta yi.

¹⁹Cakhutaa cawsaa ca aphuv cunglie a patu sa yi. Viechuo tluo pangaa hne ngaa sahning kha la te, vuoruo luo kha ang te Khazing'a luo alawna bie a ri khu taata viechuo kha chechi te ziytuv tie kha a pi yi, ziytuv tie ta zaapuv kha ama re.

²⁰Ama bangkhuo ta ning yite ama riy a bi. Ziytuv tie ta ama ning buopa kha pakhaw yite beke zung hraa hlyihning a ta.

²¹A ningpa ca canung hne haatiy ri li pata capaa seta thawpangaa hraw ama ta.

²²Cakhutaa Zingsuv ta cawsaazaapuv a pathlie nguoluo ning yi kha ziytuv tie ca sawkawpalaw luo kha pakie sa yite riyliy huesuo luo kha a pasi sa lu yi.

²³Cawsaa a pathlie diy khutaa yi khata, tluocung luo kha thlaa chuo riypata ama se ta a kie. Zingsuv ca khy a zing nate khata ama lieca ama se ta a aw.

²⁴Sawkawpalaw ca riyliy cunglie kha a hlapuv a chiy tli pata hmiepachaw ta a vya hruopa thliy aa taw nakawta tiylaw ta a cathlule ciemuo.

²⁵Zingsuv ca mawdiy khata tiy cunglie vya cakuole te ziytuv tie'a luo kha a vaw.

²⁶Ziytuv tie ta, tiy cunglie a phyi ta a vya cakuo pakha ama hmung tiyta ciy hringhruo yite, “Athlaa!” ta yite ama ciylung ta ama khi.

²⁷Zingsuv ta sungkha bala ta iema kha, “Nama thlaa zang kha se, Kama tana i cuo, ciykha ung,” a ta yi.

²⁸Piter ta, “Abyipa, nama ta na cuo pakieca tiy cunglie vya cakuo pata nama'a luo kha na pavaw sa tie,” a ta.

²⁹Zingsuv ta, “A vaw tie,” a ta. Cacuonakaw Piter ca sawkawpalaw chung taa ca cung te tiy cunglie ca a phyi ta cakuo te Zingsuv'a luo ca a vaa.

³⁰Cuorasala khuopuv ta thliy a hruopa[27] kha a hmung tiyta ciy te tiy chung luo kha a tlale ca, “Abyipa, Na khuo tie!” tapata a khi.

³¹Zingsuv ta yikha ta va paza te a va patuv khu taata, “Na zangnapa na a caw hringhruo de! Khaapanakawma palung luolue pata na aw,” a ta.

³²Ama pahning ta sawkawpalaw luo kha kie yite thliy ca a die.

³³Cakhutaa ziytuv tie ta sawkawpalaw chunglie ca abie yite, “Nama ca Khazing Saacapaa hmisi tana na cuo,” ama ta.

³⁴Riyliy kha va te yite Genesaret ruo luo kha ama va chiy.

³⁵Capa hmang lie cawsaa zaw khata Zingsuv ca ama pachang. Cacuonakaw a kiecahriy khy bangkhuo kha bie pathyi sa yite a pasapa bangkhuo kha Zingsuv'a luo ca amaa vaw khyi.

³⁶A pangpeta chuo ama hrie the riypata Zingsuv ca paakie yite, a pangpe a hriepa bangkhuo ca ama tluo.