Read Lautu Chin Matthai 15 Bible Online

Matthai 15 - Lautu Chin bible

Matthai 15

¹Cakhutaa Farasi tie hne phungbie saya tie ca Jerusa-lem taakhata Zingsuv'a luo a vaw yite,

²“Khaapanakawma caa ziytuv tie ta mingnungmingpa phungluo ama para? Tahematapakieca sa ning hluo ta ama kuv a siy vayi,” ama ta.

³Zingsuv ta, “Cacuokie, Khaapanakawma niema zaw hing niema phungluo kawlieta Khazing nawbie kha nama para? a ta yi.

⁴Khazing ta, ‘Na nung hne na paa va ciyzaa yi, a nung cuose a paa cuose chie a sapa ca thie pata cuose,’ a ta.

⁵Cuorasala niema ta nama pacuvpa ca, cawsaa pakhakha ta a nung ma, a paa ma bya riypata chechiy a hnyipa kha, ‘Hingpa hing ca Khazing huopa na a cuo,’ a ta kieca a nung cuose a paa cuose a bya a hu va tli, nama ta.

⁶Cacuonakawta nama phungluo kawlieta Khazing bie[28] kha siysaa ri li pata nama aw.

⁷Niema, phahruocuo tie! Profet Isaiah ta niema kaw a ripa hing khatluv tama aa hmuo! Isaiah ta,

⁸‘Hingpa cawsaa zaw hingta ama pakaa dyi ta na pa-uvsathyi yite, ama pathiypalung ca kama hne aa hla hringhruo.

⁹Cawsaa ta tuechawpa phung kha, Khazing bie haata pacuv yite, Kama ina bienapa yi hing Khaahmuo thlahne vyi,’ Khazing ta a ta,” a ta yi.

¹⁰Cakhutaa Zingsuv ta cawsaa-zaapuv kha ama'a luo ku yite, “Naathlie ungla pachang tie ung:

¹¹cawsaa a papya a palyituv hing a pakaa taata a ngiepa cuo li pata, a pakaa taata a pyapa na a cuo,” a ta.

¹²Cakhutaa, ziytuv tie kha ama'a luo a vaw yite, “Na ripa hingta Farasi tie palung a pasa sa yi tapa pachang va cama?” ama ta.

¹³Zingsuv ta, “Vuoruo lie a awpa i Paa ta a ling lipa bangkhuo ca phie pata ama cuo aa.

¹⁴Iema ta tah aw thluo yi se; Iema ca mingcue tie luochiytuv[29] mingcue luochiytuv tana ama cuo. Mingcuepa ta mingcuepa kha luo a chiy kieca ama pahning tana khue luo kha ama thlahne aa,” a ta.

¹⁵Cuorasala Piter ta, “Capa pakhingpuonabie ca a siesa pata a siyluo malie chang tie,” a ta.

¹⁶Zingsuv ta, “Niema zaw hing a ta tepa ta pachang the tang va ung cama?

¹⁷Cawsaa pakaa chung taata a ngiepa hmang ca a riy chung luo kha chiy te ale luo a pya pakhaa.

¹⁸Cuorasala pakaa taata a pyapa ca palung chung taata a pyapa a cuo nakawta cawsaa kha a papya a palyi.

¹⁹A pha lipa ruena, lienawna, nungvaathingsuena, aparuvsuena, paruvna, hangna, cawsaa thuochi rina tapa bangkhuo ca pathiypalung chung taata a pyapa tana ama cuo.

²⁰Hingpa tie hingna cawsaa ca a papya a palyi sa yi, kuv a siy li pata sa ningnapa ta cawsaa kha papyapalyi sa vyi,” a ta.

²¹Zingsuv ca capa hmang taacata pya te Tair hne Sidon pe luo kha a vaa.

²²Capa ruo lie a awpa Kanaan zaanung pakha ca Zingsuv'a luo kha a vaw te, “David Saacapaa, Abyipa, ngie na chi thi tie. I sacanung kha khuevuo ta a hryi te a lalilahie dyina a chiy thluo,” a ta.

²³Cuorasala Zingsuv ta kaa kha hmuo palie vyi. Ziytuv tie ta, “Hingpa nung hing cakuo sa tie, malie paziyle te malie a khisue byalya,” ama ta.

²⁴Cakhutaa, Zingsuv ta, “Kama ca Israel ming hraw taata a viepa tuv tie'a luo kyalyadyi pathliepa tana i cuo,” a ta.

²⁵Cuorasala canungnung ca Zingsuv phyi thabaw lie kha a vya bu te, “Abyipa naa bya thi tie,” a ta.

²⁶Zingsuv ta, “Haatiy sa kha la pata uv pipa ca a hmuo vyi,” a ta.

²⁷Canung nung ta, “Na tapa ca a hmuo, Abyipa; cuorasala a byipaapa cabya taata a tlapa sa diydya ca uv zaw ta ama ning ra taw thluo muo,” a ta.

²⁸Cacuonakaw Zingsuv ta, “Canung nung na zangnapa na a le hringhruo! Na khingpa ca tuepa pata cuose,” a ta. Capa cuota liecata a sacanung ca a tluo.

²⁹Zingsuv ta capa hmang ca thuse khu taata Galilee riyliy kie hraw kha cahraw te tluo luo kha kie te a tu.

³⁰Cawsaa hluvpuv ta ama kha vya pangie yite, a phyi cabiepa, a mingcuepa, a pakyapa, bie a ri the lipa hne a hrangpa a pasapa hluvpuv kha amaa vaw khyi. A phyi thabaw lie kha chi yite a patluo sa yi.

³¹Bie a ri the lipa tie ta bie ama ri the, a pakyapa tie ama tluo, a phyi cabiepa tie ama cakuopa hne mingcuepa tie ta ama hmung pakhaapa kha ama hmung tiyta zaapuv ca ama kharue haasa te Israel Khazing kha ama pathuosa.

³²Zingsuv ta a ziytuv tie kha ku yite, “Hingpa cawsaa zaw hing kama'a lie ningthung chung aw tli yite ata hing sa ning riypa ama hnyi li nakawta i ngie ina chisa yi. Ama nangdiy pata ca cakuo sa khing vayi ang, luopuv liena ama hyle pathlyi aa,” a ta.

³³Ziytuv tie ta, “Hing ruocaapa lie hing tuokhaatama hing zi cawsaa ning riypa sa ma hmung khu aa?” ama ta.

³⁴Zingsuv ta, “Viechuo tluo khazaa ma nama hnyi,” a ta. Iema ta, “Tluo sariy hne ngaa diyta a cawta,’ ama ta.

³⁵Cacuonakaw Zingsuv ta zaapuv kha alyi lie patu sa yite,

³⁶viechuo tluosariy hne ngaa kha la te, Khazing'a luo alawna bie a ri khu taata viechuo kha chechi te, ziytuv tie kha pi yite ziytuv tie ta cawsaazaapuv kha ama re.

³⁷Ama bangkhuo ta ning yite ama riy a bi. Ziytuv tie ta ama ningbuopa kha pakhaw yite beke zungsariy a bi.

³⁸Canung hne haatiy ri li pata a ningpa capaa thawpaliy ama ta.

³⁹Zingsuv ca cawsaazaapuv kha a pathlie khu taayita sawkawpalaw luo kha kie te, Magadan ruo luo kha a si.