Read Lautu Chin Matthai 16 Bible Online

Matthai 16 - Lautu Chin bible

Matthai 16

¹Farasi tie hne Sadusi tie kha Zingsuv'a luo a vaw yite a suenapa ama patuv khing nakawta, vuoruo taata a cuopa kharuehaa hmang malie tuepa la ama ta.

²Zingsuv ta, “Ning a tla caw ta avuo a se kieca, ‘Ningkhue na a pha aa,’ nama ta.

³Mawdiy ta avuo se te khy a paning kieca, ‘Khy na a saa aa,’ nama ta. Avuo kha mang ung cate ningkhue khaama a lu aa tapa nama ridaw khu, cuorasala ata chuo pamangsana ca a siyluo pachang khu va ungciy,” a ta.

⁴A pha lipa hne Khazing siysaa a ri lipa mingphang ta kharuehaa hmang namaa hie, cuorasala Jonah kharuehaa hmang ri li pata kharuehaa hmang hrangpa tuepa pata cuo'a va ungciy,” a ta. Cakhutaa iema kha thuse yite pya te a cakuo.

⁵Ziytuv tie ca huesuo luo ama va pha tiyta viechuo a phyale kha ama maw.

⁶Zingsuv ta, Farasi tie hne Sadusi tie thiynung kha a raaring tie ung,” a ta yi.

⁷Ziytuv tie ta pakha hne pakha kha, “Viechuo ma phyale li nakaw na ama haahingta bie a ri thlu aa,” amaa ta.

⁸Zingsuv ta khaama ama ri tapa kha a pachang nakawta, “Zangna a cawpa zaw, khaapanakawma viechuo nama hnyi lina kaw kha nama ri nguoluo thluo?

⁹Pachang the tang va ung cama? Viechuo tluo pangaa ta cawsaa thawpangaa duo yi ang te, a hlyipa beke zung khazaa ma nama pakhaw tapa kha a thyi va ung cama?

¹⁰Viechuo tluo sariy ta cawsaa thawpaliy i duo ning yi kha haw a hlyipa beke zung khazaa ma nama pakhaw?

¹¹Viechuo kaw ri vyi tapa kha tuokhaatama pachang li pata nama aw the? Farasi ming hne Sadusi ming thiynung kha a raaring tie ung!” a ta yi.

¹²Cakhutaata ziytuv tie ta, a raaringnapa malie a pipa hing viechuo lie ama hmuopa thiynung cuo li pata Farasi ming hne Sadusi ming pacuvnapa na a cuo tapa kha ama pachang.

¹³Zingsuv ca Sisaria Filipi pe luo kha si te ama lieca ziytuv tie kha, “Cawsaa zaw ta Cawsaa Saacapaa hing ahung ama ta ma?” tapata a hie hriy yi.

¹⁴Iema ta, “Chekha ta tiynawtuv Johan aca ta yi, chekha ta Elijah ne ca ta yite, chekha ta Jeremiah a cuo li kie profet pakhakha tana a cuo, aca ta yi,” ama ta.

¹⁵“Niema haw? Kama hing a ahung ina ta ung cama?” a ta yi.

¹⁶Simon Piter ta, “Nama ca a hringpa Khazing Saacapaa, Messiah[30] tana na cuo,” a ta.

¹⁷Zingsuv ta, “Johan saacapaa Simon, thluechiypa tana na cuo! Tahematapakieca hingpa hing thiy hne saa taata aca pachang sapa cuo vyi, cuorasala vuoruo lie a awpa i Paa taata na a cuo,” a ta.

¹⁸Cacuonakaw ica chang: nama ca Piter[31] tana na cuo, hingpa alungpuvnung[32] cunglie hing i Khrihsaabuv kha padaa'a ang te thiyna tahmuo te khu buo hluo'a vyi.

¹⁹Vuoruo Pena taw kha ca pi'a ang te, alyi lie na khaapa ca vuoruo lie khaapa cuo ra'a te alyi lie na pahawpa ca vuoruo lie pahaw pata a cuo ra aa,” a ta.

²⁰Cakhutaa Zingsuv ta Messiah a cuopa kha ahunghmuo chang li riypata ziytuv tie kha a thlu yi.

²¹Capa cuo taakhata Zingsuv ta ziytuv tie kha, Jerusalem luo vaa'a ang te uvthyi tie, tluobyilepa tie hne phungbiesaya tie kuv lie ruvnaana khuopuv ta i taw aa. Ina thie'a yi, cuorasala ningthungna lieta pathu pakhaapa i cuo aa,” tapa kha a chang yi.

²²Piter ta Zingsuv kha a hrang luo dya cakuo khyi te a chuo. “Abyipa, hingpa hmang hing ca Khazing ta na cunglie patlung sa thi kha se,” a ta.

²³Zingsuv ta a vya pali te Piter kha, “Setaa, i thaa taahing cakuo! Luo naa khuotuv tana na cuo, tahematapakieca na ruenapa hing Khazing'a taata cuo vyi, cawsaa cuona taata a vawpa tana a cuo,” a ta.

²⁴Cakhutaa Zingsuv ta ziytuv tie kha, “Ahunghmuota kama naa ziytuv a cuo khingpa ca iema khingnapa kha thuse pata ama vieluotung kha a puv yi sala na ziy yi se.

²⁵Tahematapakieca ahunghmuota a hringna kha a khuo khingpa ca a hringna kha a sung'a te, kama kawlieta a hringna a sungpa ca hringna kha a hmung aa.

²⁶Cawsaa hingta chuelyi bangkhuo hing cu rahmuo sala a hringna a sung kie khaama a thlahne aa? A hringna kha khaapatahmuo ta calyi pakhaa khu'a va tli.

²⁷Cawsaa Saacapaa hing a Paa rungnaana cangta avuoming hneta a zuv'a te cawsaa bangkhuo kha ama rehriena haakhata a pakaa'a yi.

²⁸Biehmisi tana ica chang yi: Cawsaa Saacapaa hing a pena luo aa zuvpa nama hmung hluo li a thiy li riypa hingpa lie hing nama aw,” a ta yi.