Read Lautu Chin Matthai 17 Bible Online

Matthai 17 - Lautu Chin bible

Matthai 17

¹Ning caruv khu taata Zingsuv ta Piter hne uvcanu tie Jeim hne Johan kha tluocung luo kie khyi yite iema selaw ta ama aw.

²Ama ming hmungna lie kha Zingsuv ca a hminghmie a thle; a hmie ca ning haata khe te a caw ca ming khepahli nate ta a ruo.

³Sungkhabala ta Moses hne Elijah zaa luo yite Zingsuv hne bie ama rihnepa kha ama hmung.

⁴Cacuonakaw Piter ta Zingsuv kha, “Abyipa, hingpa lie ma awpa hing a pha hringhruo! Na khingpa a cuo kieca, thluodaa suothung; nama cuo suokha, Moses cuo suokha, Elijah cuo suokha i[33] sa aa,” a ta.

⁵Cahaa cata bie a ri nguoluo ning kha amyi ruopa ta buv yite, amyi chung taa ueryi suokha ta, “Hingpapaa hing i Duepa i Saacapaa na a cuo, i palung naa hmung ciemuopa tana a cuo, a ri kha a ngie tie ung,” a ta.

⁶Capa ueryi ca ziytuv tie ta ama thyi tiyta ama thlaa zang suesaa te alyi lie kha a maa bu.

⁷Cuorasala Zingsuv kha a vaw te a hrie khu taayita, “Thu tie ung, nama thlaa zang kha se,” a ta yi.

⁸Cacuonakaw ama kya mang ca ahunghmuo hmung li pata Zingsuv dyi ama hmung.

⁹Tluocung taa ama za cungpuo pata Zingsuv ta, “Hing nama hmungpa muocuo hing Cawsaa Saacapaa thiyna taata pathu pakhaapa ta a cuo hluo li ahunghmuo chang'a va ungciy,” a ta yi.

¹⁰Cakhutaa ziytuv tie ta Zingsuv kha, “Khaapanakawma phungbiesaya tie ta Elijah na a vaw taa riypata a cuo ama ta?” ta yite ama hiehriy.

¹¹Zingsuv ta, “Elijah ca a vaw taa sasaw'a te hmangting bangkhuo kha a ting pacie diy aa.

¹²Cuorasala ica chang yi: Elijah ca a vaw mangtli, cadyiseca cawsaa ta pachang va laa yite ama khing ta ama tue. Cahaa cata Cawsaa Saacapaa zaw hing iema kuv chunglie ruvnaana a ang ra aa,” a ta.

¹³Cakhutaa ziytuv tie ta tiynawtuv Johan kaw muo malie a chang ta tapa kha ama pachang.

¹⁴Cawsaazaapuv'a luo ama vya kaa pahne ta cawsaa pakha ca Zingsuv'a luo kha a vaw te a hmiekunglie kha a pakhuv vya pane te,

¹⁵“Abyipa, i saacapaapa hing ngiechi thi tie, ama ca siypatyi the te a rie a thyi hringhruo, a siy kyry ta myi chung luo hne tiy chung luo zaw aa lie taw.

¹⁶Na hnang caa ziytuv tie'a luo a vawkhyi raalaa ang te patluo khu vayi,” a ta.

¹⁷Zingsuv ta, “Niema zangna a hnyi lipa, a pali a pahnaa ta a hringpa phang, kha cuo ma niema'a lie i aw kalie a hu aa? Kha cuo ma ica aw puo kalie yi a hu aa? Haatiypapaa ca kama'a luo a vaw khyi tie ung,” a ta yi.

¹⁸Zingsuv ta khuevuo ca chuo te haatiypapaa chung taata a pya, capa cuo taacata haatiypapaa ca a tluo.

¹⁹Cakhutaa ziytuv tie ca Zingsuv'a luo kha iema se ta a vaw yite, “Khaapanakawma khuevuo ma papya khu va,” tapata ama hie hriy.

²⁰Zingsuv ta, “Nama zangnapa a caw nakaw na a cuo. Biehmisi tana ica chang yi: Uotuo hmung tie zangna nama hnyi kieca, hingpa tluo hing, ‘A hnyi,’ ta ungla a hnyi thluo aa. Niema cuota a cuo khu lipa aw'a vyi,” a ta yi.

²¹Cuorasala hingpa phang hing ca thlaachuona hne sa-uvna ta ta li pata ca khaapatahmuo papya khu vyi,” a ta.[34]

²²Ziytuv tie Galilee lie amaa tawpakhaw taata[35] Zingsuv ta, “Cawsaa Saacapaa hing cawsaa kuv luo a catli pata pipa cuo'a te,

²³ama thie aa; cuorasala ningthungna lieta pathu pakhaapa ta a cuo aa,” a ta yi. Ziytuv tie ca ama ngie a chi hringhruo.

²⁴Kapernaum khy ama vya pha tiyta biena-ing ngukhyituv pakha ca Piter'a luo a vaw te, “Na sayapa hing biena-ing ngukhyi pi vama? a ta.

²⁵Piter ta, “A pi ne,” a ta. Piter ingchung luo a zaa ngie pahne Zingsuv ta vya thukhyi taa te, “Simon tuokhaama na rue? Chuelyi siepahruo tie hing a ahung ma ruohrang chechiy a ngiekhyi muo hne ngukhyi a pi yi? Ruochung ming ma a cuo li kie ruohrang ming? a ta.

²⁶Piter ta, “Ruohrang ming,” a ta. Zingsuv ta, A pha, cacuokieca ruochung ming ca pi a hu vyi.

²⁷Cadyiseca hing cawsaa zaw ama palung pasa sa li riypata riyliy luo kha vaa la kyipa va pathla tie; na thue taapa ngaa a pakaa kha cakang la ngu tuokaa[36] phiekha na hmung aa; capaca la la nama hne kama cuota va pi tie yi,” a ta.