Read Lautu Chin Matthai 18 Bible Online

Matthai 18 - Lautu Chin bible

Matthai 18

¹Capa cuo ning ca ziytuv tie kha Zingsuv'a luo a vaw yite, “Vuoruo pena lie ahungma a lece?” tapata ama hiehriy.

²Zingsuv ta haatiyta pakha kha ku te ama hmielie a padaa khu taata,

³“Biehmisi tana ica chang yi: a thle ungla haatiyta haahingta nama cuo li kieca vuoruo pena luo a ngie khu buo hluo'a va ungciy,” a ta yi

⁴Cawsaa raw canaw te hingpa haatiyta haahingta a cuopa na vuoruo pena chunglie a lecepa ta a cuo.

⁵Ahunghmuota kama ming ta hinghaapa haatiy a cuhluopa ca kama naa cuhluotuv tana a cuo,” a ta.

⁶“Ahunghmuo cuose hingpa haatiyta pakhakha hing kama ina zangna taata luo a papiesatuv ca a rue lie sacuo rienapa alungtung ciypuo pata riyliy luo thawpa cuo sala a cuota a pha vie aa.

⁷Chuelyicung cuota ciy a chiysa hringhruo tahematapakieca zangna a papiesatuv hmang na a hluvsa a aw. Hingpa hmang hing a cuo pari aa, cuorasala cahaapaapa a pacuosatuv cuota ca ciy a chiysa hringhruo.

⁸“Na kuv a cuo li kie na phyi ta na zangna aca papie sa kieca te la thaw tie! Kuv hrahning hne phyi hrahning hneta chuozaa myi chung luo tlapa laata ca kuv hrakha a cuo li kie phyi hrakha aw lipa ta hringna luo a ngiepa ca a pha vie aa.

⁹Cakhutaa na ming ta na zangnapa aca papie sa kieca, thue la thaw tie. Ming hrahning hneta hell[37] myi chung luo tlapa laata ca ming hrakha dyi ta hringna luo a ngiepa ca a pha vie aa.

¹⁰Hing haatiyta a ahung hing hmuota mangbung kha ung. Ica chang yi: iema a vetuv avuoming kha vuoruo i Paa hmiekunglie ama aw pari.

¹¹Cawsaa Saacapaa ca a viepa khuo riypatana aa vaw[38]

¹²Tuokhaatama nama rue? Tuv khietuv pakha ta tuv zakha hnyi sala, sakha a vie kieca, sawcakysacaky kha tluocung lie thuse'a te, a viepa sakha kha a va huv aa cuo vama?

¹³Biehmisi tana ica chang yi: a hmung tiyta a vie lipa sawcakysacaky tie cunglie laa khata a viepa sakha cunglie kha a palung a tluo vie.

¹⁴Cahaa cata vuoruo lie a awpa nama[39] Paa ta hing haatiyta zaw pakha hing hmuo vie riypa pahya vyi.

¹⁵Na uvnu pakhakha ta na cunglie suena a tue kieca vaa la niema seta nama awna lie kha a suenapa kha va chang tie. Na ri a caa ngie kieca na uvnu ta na pacuo sa khu pakhaa tana ta a cuo.

¹⁶Cuorasala na ri a caa ngie khing li kieca, ‘bie bangkhuo ca pachangkhyituv pahning a cuo li kie pathung hmie lieta pacu sapa cuose,’ a tapa haata bie bangkhuo caa thyikhyi riypata pakha ma pahning ma a chiy tie yi.

¹⁷Iema bie zaw kha a cuhluo khu li kieca, bie bangkhuo kha Khrihsaabuv luo chiykhyi tie. Khrihsaabuv bie kha hmuo a cuhluo khu li kieca, ama ca Jentail ming a cuo li kie ngukhyituv pakha haakhata va rue tie.

¹⁸Biehmisi tana ica chang yi: alyi lie nama thlupa ca vuoruo lie zaw thlupa cuo ra'a te, alyi lie nama pa-awpa ca vuoruo lie zaw pa-awpa a cuo ra aa.

¹⁹“Biehmisi tana ica chang vie yi: hing alyi lie pahning ta palung a lusa pata thlaa chuo ung cate nama hie kieca, nama hiepa hmang ca vuoruo lie a awpa i Paa ta aca pi'a yi.

²⁰Pahning a cuo li kie pathung i ming ta amaa hmyana lie, ama hrawlie kama i aw ra” a ta.

²¹Cakhutaa Piter ca Zingsuv'a luo kha a vaw te, “Abyipa, i uvnu pakhakha ta i cung lie suena a tue kieca, yi khazaa ma i ngiethe aa? Yi sariy te ma? a ta.

²²Zingsuv ta, “Yi sariy cuo vyi. Yi sawsariy-lesariy, a ta.

²³Cacuonakawta vuoruo pena ca a sii zaw rehriena cazing kha mang a tingpa siepahruo pakha hne tana aa lu.

²⁴Re a pathupa hneta tuokaa talent[40] thawhraa a uopa a sii pakha kha ama'a luo ca a maa vaw khyi.

²⁵Lyibuo kha a thung khu li nakawta a byipaapa cata, ama, a napuvnung, a saa zaw hne a hnyipa bangkhuo kha zaa diy pata, lyibuo thung riypata bie a pi yi.

²⁶Cacuonakawta a siipaapa ca a phyi thabaw lie kha a pakhuv pane te, ‘Ngie na chi la naa ngie caw thi tie, ica thung diy aa,’ tapata paa a kie.

²⁷A byipaapa ta ngie a chi nakawta a lyibuo kha a ngiethe te a pathlie.

²⁸Cuorasala a pya pahne ta tuokaa denarii[41] zakha a uopa a viesaa sii a cuo rapa pakha'a luo kha vaa te, a rue kha hmi te, ‘I naa uopa cakha na pi tie,’ a ta.

²⁹Sii a cuo rapa a viesaapa cata a pakhuv pane te, ‘Ngie na chi la naa ngie caw thi tie, ica thung aa’ a ta.

³⁰Cuorasala khing li pata, a lyibuo a thung diy hluo li thaw a pathla.

³¹Sii a cuo rapa a viesaa tie ta khapa hmang a cuopa bangkhuo kha ama hmung tiyta ama palung pha li pata ama byipaapa'a luo kha vaa yite ama va chang diy.

³²Cacuonakaw a byipaapa cata ku te, ‘Sii pha lipa, paa ina kie nakaw cata inaa uopa bangkhuo icaa ngiethe diy.

³³Kama nang ica duepa haakhata na viesaa sii cunglie kha nangduena na hnyi ra riypa cuo vama? ta te,

³⁴a byipaapa ca a hi a haa laalaw nakawta a lyibuo bangkhuo a thung diy hluo li thaw a pathla.

³⁵Cacuonakawta nama uvnu kha pathiypalung hmisi ta namaa ngiethe li pata a cuo kieca vuoruo lie a awpa i Paa ta niema zaw kha cahaa cata a ca tue ra'a yi,” a ta.