Read Lautu Chin Matthai 19 Bible Online

Matthai 19 - Lautu Chin bible

Matthai 19

¹Capa kaw a ri diy khu taata Zingsuv ca Galilee taakhata pya te riyliy huesuo Judea pe luo kha a si.

²Cawsaa hluvpuv ta ziy yite a pasapa hluvpuv a patluo sa yi.

³Farasi tie chekha ca ama'a luo kha a suena huv riypata a vaw yite; “Suokhakha kawlieta, capaa pakha ca a napuv ma riypa kha phungbie ta a pa-aw ma? tapata ama hiehriy.

⁴Zingsuv ta, “A hruothu ningta Satuvpa ta canung hne capaa a sa tapa kha Caapathepa lie ri buo va ung cama?

⁵‘Capanakaw cata capaa ta a paa hne a nung kha thuse'a yite a napuv hne amaa hlaw aa; pahning ca pangkha ta ama cuo aa.’

⁶Cacuonakawta iema ca pahning cuo va tli yi, pangkha tana ama cuo. Khazing ta a pahlawpa yi ca ahungtahmuo che kha yi se,” a ta.

⁷Farasi ming ta, “Cacuokie khaapanakawma Moses ta, ‘Capaa ta a napuv kha manapa caa pi sala a che se,’ tapata naw malie a pi?’ ama ta.

⁸Zingsuv ta, “Moses ta napuv ma khu riypata aca pa-awpa yi ca pacuv nama ruvtuv nakawtana a cuo. Cuorasala a hruothu ta ca cahaa cata za cuo vyi.

⁹Ica chang yi: Ahunghmuota cuose, zangtluo a tla lina kawlie ri li pata a napuv kha ma te canung hrang hne a hlawpa ca nungvaathingsuena a tuepa tana a cuo,” a ta.

¹⁰Ziytuv tie ta, “Nung hne vaa kawlie hinghaahingta a cuo riypa a cuo kieca, a chiyhie li patana a pha vie,” ama ta.

¹¹Cuorasala Zingsuv ta, “Hing pacuvnapa hing ca cawsaa mekaa ta ziy khu'a vayi, Khazing ta aa tlawpa tie cuo kyalya tana a cuo.

¹²Cawsaa chekha ca amaa zaa puvkhyipa ta napuv a chiy khu lipa cuo yite, chekha ca cawsaa ta ama tuechaw nakawta napuv a chiy khu lipa ama cuo, chekha ca vuoruo pena kawlieta napuv chiy li pata ama aw. Hing pacuvnapa a ziy khupa ca ziy thluo yi se,” a ta.

¹³Cakhutaata haatiy zaw kha ama luv cunglie a kuv khang pata thlaachuopa naaseyi tapata Zingsuv'a luo amaa vawkhyi. Cuorasala ziytuv tie ta a vawkhyipa tie kha ama chuo.

¹⁴Cacuonakawta Zingsuv ta, “Haatiy kha i thaa luo a vaw yi se, thlu kha ung, tahematapakieca vuoruo pena ca hinghaapa zaw cuo hing tana a cuo,” a ta.

¹⁵Ama luv cunglie kha a kuv khang te a cakuo.

¹⁶Luo kha ca Zingsuv'a luo kha cawsaa pakha a vaw te, “Saya, chuozaa hringna hmung riypata khaapa hmangphapa ma i tue aa?” a ta.

¹⁷Zingsuv ta “Khaapanakawma khaapama a pha tapa kaw ca ina hiehriy ciy? A phapa ca pakha kyalya dyina a aw. Hringna luo naa ngie khing kieca phungbie kha ziy tie,” a ta.

¹⁸Satliepapaa ta, “Khaapa phungbie ma,” a ta. Zingsuv ta, “Lie va naw kha; nungvaathingsuena va tue kha; paruv kha; a cuo li pata malie vaa daakhyi kha;

¹⁹na nung hne na paa va ciyzaa yi; nama hne nama naa duepa haata na ingpaa kha va due yi,” a ta.

²⁰Satliepapaa ta, “Hing phungbie bangkhuo hing i ziy diy tli,[42] khaapama i tue lipa a aw kalie?” a ta.

²¹Zingsuv ta, “Cawsaa tlingpa na cuo khing kieca na hnyipa bangkhuo kha zaa la na hmungpa tuokaa kha a siypasapa tie pi tie yi, cacuokieca vuoruo lie sue na hnyi aa; cakhutaa a vaw la na ziy tie,” a ta.

²²Satliepapaa ta capa bie ca a thyi tiyta, a ngie chi te a cakuo, tahematapakieca ama ca a hnyirungsapa ta a cuo.

²³Cakhutaata Zingsuv ta ziytuv tie kha, “Biehmisipa tana ica chang yi: A hnyirungpa tie vuoruo pena chung luo a ngie riypa ca a ruv hringhruo.

²⁴Ica chang pakhaa yi: Kala-uv sakha ciphang naakhue luo a ngiepa laata a hnyirungpa vuoruo pena luo a ngiepa a ruv vie,” a ta.

²⁵Ziytuv tie ta ama thyi tiyta ama kharue haa suesaa te, “Ahung cama khuona a hmung khu aa? amaa ta.

²⁶Cuorasala Zingsuv ta iema kha mang yite, “Hingpa hing cawsaa cuota ca cuo khu vyi, cadyiseca Khazing cuota ca hmangting bangkhuo hing a cuo khu,” a ta.

²⁷Cakhutaa Piter ta, “Hmangting bangkhuo thuse pata nama maca ziy mangtli. Khaapama ma hmung aa? a ta.

²⁸Zingsuv ta, “Biehmisi tana ica chang yi: “Hmangting pathaa pakhaapa a cuo ning, Cawsaa Saacapaa hing i byithude cunglie patupa i cuo thueta, niema naa ziytuv tie zaw hing byithude hlyihning cunglie a tu'a ung cate Israel ming phanghraa hlyihning kha bie nama ripa aa.

²⁹Cakhutaa ahunghmuo cuose kama kawlieta ing cuose, a uvta a nuta cuose, a sieta cuose, a paa cuose, a nung cuose, a saata cuose, a lu cuose a thusepa ca ale zakha[43] ta hmung pakhaa te, chuozaa hringna ru zaw a cu aa.

³⁰Cuorasala atalie hmaa a sapa a hluvpuv hing hnang chuo'a yite, hnang a chuopa a hluvpuv hing hmaa ama sa aa,” a ta.