Read Lautu Chin Matthai 2 Bible Online

Matthai 2 - Lautu Chin bible

Matthai 2

¹Herod siepahruo a cuo nguoluo-ning, Judea pe Bethlehem khy lie Zingsuv a puv khutaa khata ning-chiy luo taata mingsing tie[6] kha Jerusalem luo vya chiy yite,

²“Judah siepahruo, zaa puv thaapa haatiyta ca khaapaliema a aw? A aasiy aa luopa kha[7] hmung pate na ama kha abie riypata ma vya chiy,” ama ta.

³Siepahruo Herod ta capa bie a thyi tiyta a thlaa zang laalaw te Jerusalem khy ming bangkhuo zaw ama thlaa a zangsa ra.

⁴Ama ta tluobyilepa tie hne phungbiesaya tie zaw kha pakiy yite, “Messiah ca khaapaliema a puv aa?” tapata a hiehriy yi.

⁵Iema ta, “Judea pe Bethlehem khy lie,” ama ta. “Profet ta a cape siypa ca:

⁶‘Judah ruo chunglie a awpa Bethlehem, nama ca Judah pe khypuv zaw hrawlie hing a cawcepa ta cuo changchiy vaciy. Na chung taahingta luochiytuv pakha pya'a te i cawsaa Israel ming kha luo a chiy'a[8] yi,’” a ta.

⁷Cacuonakaw Herod ta mingsing tie kha a paruvta tah ku yite khaapa cuo lie kha tama aasiy aa luo tapa kha a hiehriy yi.

⁸Cakhutaata Bethlehem luo kha pathlie yite, “Si ungla haatiy kha a phasa pata va huv tie ung, nama hmung pata a cuo kieca, vaa'a ang te i bie ra khu riypata, kama kha ina pachang sa pakhaa ungciy,” tapata bie a taa yi.

⁹Siepahruopa bie naa ama thlie khu taata amaa thu ca a kya luo ningta ama hmungpa aasiy ca haatiy awna hmang a dadaw lie a daa nate ta ama hmielie kha a sile.

¹⁰Aasiy a daapa ama hmung tiyta ama palung a tluo hringhruo.

¹¹Ingchung luo kha amaa ngie ca haatiy kha a nung Mary hne ama hmung; ama pakhuv pane yite ama kha amaa bie. Ama suethiy thingkaw kha pahaw yite, ama lasaw: siyy, frankinsens ziyhmyi, hne mura ziyhmyi kha ama pi.

¹²Mingsing tie ca Herod'a luo kaa li riypata ama muo lie a raaring pina ama hmung nakawta luo hrang ziy yite ama ruo luo kha ama kaa.

¹³Iema ama si khu taata Abyipa avuoming pakha ca Josef muo lie kha a luo te, “Thu la haatiy hne a nung hing Izipt ruo luo a ruokhyi tie yi. Kama ta kaa riypata ica chang hluo li ama lie kha nama aw aa, tahematapakieca Herod na haatiypa hing thie riypata a huv aa,” a ta.

¹⁴Cakhutaata Josef ca thu te haatiy hne a nung kha Izipt ruo luo zuo ta a ruo khyi yite

¹⁵capa lieca Herod a thiy nate ama aw. Hingpa hing Abyipa ta profet pakaa taata, “I saacapaa ca Izipt ruo taa pya riypata i u,” a tapa bie tlingna riypatana a cuo.

¹⁶Herod ta mingsing tie na naa dung yi tapa a pachang tiyta a hi a haa suesaa. Cacuonakawta mingsing tie'a taata a pachangpa cuo hne tuepuo pata Bethlehem hne a cahriy lie a awpa khy zaw taata haatiy kung hning raw bangkhuo kha thie riypata naw a pi yi.

¹⁷Cahaa cata profet Jeremiah ta a za ripa bie ca a vya tling. A ripa ca:

¹⁸“Ramah khy chunglie ueryi aa thyi. Caana hne khi-una ueryi ta a cuo. Rachel ta a saa zaw kha a caa yi. Panguo khu cuo the vyi, Tahematapakieca ama thiy diy nakaw,” tapata a cuo.

¹⁹Herod a thiy khu taata Izipt ruo lieca Abyipa avuoming pakha Josef muo lie kha a luo te,

²⁰“Thu la haatiy hne a nung kha la yi la Israel ruo luo si tie ung, tahematapakieca haatiy thie a tingpa tie kha ama thiy tli,” a ta.

²¹Cacuonakawta Josef ca thu te, haatiy hne a nung kha la yite Israel ruo luo ama si.

²²Cuorasala Arkhelaus na a paa Herod kha a thle te Judea ruo lie siepahruo a cuo tapa kha Josef ta a thyi tiyta capa luo ca si nguo vyi. A muo lie bie ama changpa haata Galilee pe luo kha a si.

²³Profet tie ta ama za ri ciepa, “Ama ca Nazarethpa tapata a cuo aa,” tapa bie a tling thena riypata Nazareth khy lie kha khy a sa.