Read Lautu Chin Matthai 20 Bible Online

Matthai 20 - Lautu Chin bible

Matthai 20

¹“Vuoruo Pena ca mawdiy ta pya te a mingsuv diedung chunglie re a hrie riypa tie a huvpa Luruo a hnyituv pakha hne tana aa lu.

²Ningkha thavie[44] muo ngu tuokaa denarii phiekha pi riypata a palung a tlingpa rehrietuv tie kha a mingsuv dung luo a pathlie yi.

³Maw siymaluo pacaky ta chadawtluo luo kha a pya tiyta cawsaa chekha ca khaahmuo hrie li pata amaa daathluopa kha a hmung yi ca,

⁴“niema zaw hing i mingsuv dung luo kha vaa ungla re va hrie tie ung, aa de pata ninghlue ica pi'a yi,’ a ta. Cacuonakawta ama vaa.

⁵Ningchung siymaluo hlyihning hne zuoluo siymaluo pathung lie zaw kha pya pakhaa te, cahaa ngiethie cata a tue.

⁶Zuoluo siymaluo papangaa hraw ta a pya pakhaa ca cawsaa chekha amaa zaa daa thluopa kha hmung yite, ‘Khaapanakawma khaahmuo hrie li pata ningaw ta hingpa lie hing namaa daa cakhaw? a ta yi.

⁷‘Ahunghmuota rehrie malie ama chang li nakawtana a cuo,’ ama ta. ‘Cacuokieca i mingsuv dung luo kha vaa ungla re va hrie tie ung,’ a ta yi.

⁸Zuoluo a vya chiy tiyta diedung a hnyituvpapaa ta tluotlakhuekhuotuv kha u te, ‘Rehrietuv tie kha ku yi la a hnangcawce ce ta re changpa tie taakhata patha la a patangce ta re changpa tie te khata ama ninghlue kha pi tie yi,’ a ta.

⁹Zuoluo siymaluo papangaa hraw ta rehrie a pathupa tie kha a vaw yite, ngu tuokaa phiekha law a pi yi.

¹⁰Cacuonakawta a patangce ta re changpa tie kha ninghlue thu riypata amaa vaw ra tiyta a hluv vie ma hmung thlu'a tapata ama rue; cuorasala iema zaw kha ngu tuokaa phiekha law a pi ra yi.

¹¹Ama tuokaa kha a la yite luruo a hnyituv cunglie kha amaa cie.

¹²‘A hnangcawce ta re changpa tie ca siymaluo pakha chung ta dyina re ama hrie, ninghlue malie na pi tiyta ningling lie ningaw ta re a hriepa kiema hneta aa khing pata na pi yi,’ ama ta.

¹³Cuorasala ama ta iema hrawlie pakha kha, “Viesaa, na cunglie a cuo lipa tue vade ang. Ningkha ninghlue ngu tuokaa phiekha hmung riypatana palung a za tling cuo vama?

¹⁴Na huopa hing a la la ing luo cakuo tie. A hnangcawce ta rehrie changpapaa hing nama zaa tana i pi ra khing.

¹⁵I tuokaa cieciepa lie hing kama khing ta tue khuna i hnyi cuo vama? Cacuolikie i pahyasa nakawta nama hie tlie kanaa? a ta yi.

¹⁶Cacuonakaw Zingsuv ta, hnang a chuopa ca hmaa sa'a yite, hmaa a sapa ca hnang ama chuo aa,” a ta.

¹⁷Zingsuv Jerusalem luo a khaw ningta a ziytuv hlyihning kha a hrangta tah ku yite ama cakuopuole pata bie aa rue yi.

¹⁸“Naa thlie tie ung, Jerusalem luo khaw'a pate Cawsaa Saacapaa hing tluobyilepa tie hne phungbie saya tie kuv luo pi pata cuo'a te thie riypata bie ama chi aa.

¹⁹Cakhutaata eseluelaa pata tue riypa, tuv riypa hne vieluo lie thie riypata Jentail ming kuv luo kha ama pi aa. Cuorasala ningthungnapa lie pathu pakhaapa ta a cuo aa.

²⁰Cakhutaata Jebedi napuvnung ca Zingsuv'a luo kha a saacapaa zaw hneta a vaw yite; a hmiekunglie kha a pakhuv pane te hmang aa hu.

²¹Zingsuv ta, “Khaapama na khing?” tapata a hiehriy. “Siepahruo na cuo thueta i saacapaa pahning tie hing na cacuo luo kuo ta pakha, na cavyi luo kuo ta pakha amaa tu riypata bie pathyi sa tie,” a ta.

²²Cuorasala Zingsuv ta, “Khaapama maa hie tapa pachang va ungciy. I dang riypa panuo hing nama dang khu'a ma?” a ta yi. Iema ta, “Ma dang khu aa,” ama ta.

²³Zingsuv ta, “I dang riypa panuo hing nama dang khu ra sasaw aa, cuorasala i cavyi luo hne i cacuo luo a tu riypa hing ca kama ta i pikhupa cuo vyi, i Paa ta a tingpa paciepa tie huotana a cuo,” a ta.

²⁴Capa kaw ca ziytuv pahraa tie khata ama thyi tiyta uvcanu pahning tie cunglie kha ama hi a haa.

²⁵Cuorasala Zingsuv ta ku yite, “Nama pachangpa haata, Jentail byi tie ca ama uvpa tie cunglie ta a chi yite, uvtuv tie ta uvpa tie cunglie kha ama khing ta ama aw sue taw.

²⁶Niema hrawlieca cahaa cata cuo'a vyi, cuorasala niema hrawlie a lepa a cuo khingpa ca, nama changtaapa a cuo na a hu.

²⁷Niema hrawlie pakhanapa a cuo khingpa ca, nama sii a cuo na a hu.

²⁸Cawsaa Saacapaa ca hriepa pa cuo li pata, hriepatuv cuo riypa hne cawsaa hluvpuv a thla riypata a hringna pi riypata muo aa vaw ta, a ta.

²⁹Zingsuv hne ziytuv tie Jeriko taata ama pya ningtakha cawsaa hluvpuv ta ama paziy.

³⁰Luopuv kielie a daapa mingcue pahning ta Zingsuv na a vya sile tapa kha ama thyi tiyta, “David Sapaa, Ngie malie chi thi tie, Abyipa,”[45] tapata ama khi.

³¹Cawsaazaapuv khata chuo yite a dieta tah aw riypata ama chang, cuorasala iema ta, “Ngie malie chi thi tie, Abyipa, David Saacapaa,” tapata khuo vie ta ama khi hryly.

³²Zingsuv ta a daa te a ku yi. “Khaapa malie tuepa se tapa ma nama khing?” a ta yi.

³³Iema ta, “Abyipa, ma ming pavuo sa la tapa na ma khing,” ama ta.

³⁴Zingsuv ta ngiechisa yite ama ming kha a hrie yi. Capahnecata ama ming ca vuo te ama kha ama ziy.