Read Lautu Chin Matthai 21 Bible Online

Matthai 21 - Lautu Chin bible

Matthai 21

¹Zingsuv hne ziytuv tie ca Jerusalem khy a thaa luo kha a vya ngie viele yite, Oliv tluo lie a awpa Bethfeih khy ama vya phapa khata, Zingsuv ta ziytuv tie pahning kha hmie luo pathlielu yite,

²“Nama hmielie a awpa khy luo kha va si ungla a taata cangpa laa sakha a zaa hre thluopa kha hmung paluo'a ung cate, pathluo ungla kama'a luo namaa vya chiy aa.

³Cawsaa ta cuvkhaa aca ta kie yi ca, “Abyipa na a hu,” ta ungla aca pathlie paluo'a yi,” a ta.

⁴Hingpa hmang hing profet ta a za ri ciepa a tlingna riypatana a cuo. Profet ta:

⁵Zion sacanung ca chang tie ung Na siepahruo na nama'a luo a vaw nguoluo Ama ca cawsaa nangnepa cuote laa na aa vya khang Laa panuta na a vya khang, va ta tie ung,” a ta.

⁶Ziytuv tie ca si yite Zingsuv ta a changpa haa yi khata ama tue.

⁷Laa hne a taata kha a vya chiy yite, pang kha a ke lie padie yite Zingsuv ca aa khang.

⁸Cawsaa hluvpuv ta ama pang kha luo lie phaa yite, chekha ta chinghmya kha sa yite luo lie ama phaa.

⁹Zingsuv hmie luo ta a cakuolepa tie hne a hnang luo taata a paziylepa zaapuv khata, “Hosanna! David Saacapaa ca pathuosa tie ung! Abyipa ming ta a vawpa ca Khazing ta thluechiy pi se! A suocepa vuoruo lie khiy Hosanna tapata pathuosa pata cuose!” ta yite ama khi.

¹⁰Jerusalem luo a ngie tiyta, khypuv chung bangkhuo ca a cali te, “Ahung tama a cuo,” ta yite ama hiehriy.

¹¹Cawsaazaapuv ta, “Galilee ruo Nazareth khy ming profet Zingsuv na a cuo,” ama ta.

¹²Zingsuv ca biena-ing luo kha a ngie te biena-ing chunglie sue a zaapa tie hne a calyipa tie kha a papya diy yi. Tuokaa a thlepa tie cabya hne valale a zaapa tie thude zaw kha nuopatyi diy te,

¹³“Caapathepa chunglie ta, ‘I ing ca thlaachuona ing ama ta aa’; cuorasala niema ta ca a paruvpa khue tana nama tue,” a ta yi.

¹⁴Mingcuepa hne a phyi cabiepa tie kha biena-ing lieca ama'a luo a vaw yite a patluo sa yi.

¹⁵Cuorasala tluobyilepa tie hne phungbiesaya tie ta kharuehaa hmang a tuepa kha hmung yite, haatiy zaw ta, “David Saacapaa ca pathuosa tie ung,” ta yite biena-ing lie ama khipa kha ama thyi tiyta ama hi a haa.

¹⁶Cacuonakaw Zingsuv kha, “Ama ripa ca na thyi ma?” ama ta. Zingsuv ta, “I thyi samaw! Caapathepa ta, ‘Haatiy zaw'a nata meme a pazaw kaliepa haaseta zaw kha nama pathuosana ca napa ri sa yi,’ a tapa kha ri buo va ung cama?” a ta yi.

¹⁷Zingsuv ta a ruose yite, khypuv chung taakhata pya te Bethani khy luo kha vaa te capa lieca aa ri.

¹⁸A mawluo mawdiy ta khypuv chung luo a vya kaa pakhaa ning kha Zingsuv ca a nang a diy.

¹⁹Luopuv kielie thyikuv kung kha hmung te a va pangie ca a hnaa ri li pata khaapahmuo hmung vyi. Cacuonakaw thyikuv kung ca, “Khatiy tahmuo na thyi pathyi kha tie,” a ta. Cakhupatahne thyikuv kung ca a caa.

²⁰Ziytuv tie ta capa ca ama hmung tiyta ama nang uo te, “Tuokhaatama thyikuv kung hing sungkha ta a caa diy hmuo,” ama ta.

²¹Zingsuv ta, “Biehmisi tana ica chang yi: palung luoluena hnyi li pata nama zang kieca thyikuv kung lie i tuepa haa dyi hing tahmuo cuo li pata, hingpa tluo hing hmuo, ‘A hnyi la riyliy luo hue a thaw tie,’ ta ungla aa thaw aa.

²²Zangna hneta, thlaa nama chuo kieca nama hiepa bangkhuo ca pi pata nama cuo aa,” a ta yi.

²³Zingsuv ca biena-ing luo kha a ngie te a pacuv nguoluo ning yi kha tluobyilepa tie hne uvthyi tie kha a thaa luo a vaw yite, “Khaapa nawhnyina tama hingpa hmang hing na tue? Ahungma hing nawhnyina hing caa pi? ama ta.

²⁴Zingsuv ta, “Bie suokha ca hiehriy'a yi ang te ina palie khu kie ung caca khaapa nawhnyina tama hing hmang hing i tue tapa kha ica chang'a yi.

²⁵Johan ta tiy a nawpa yi hing vuoruo taata ma a cuo, cawsaa taata? a ta yi. Iema'a na iema kha a i yite, “Tuokhaatama ma pa lie'a ung? “Vuoruo taata,” ta se pala, “Khaapaakawma Johan ca nama zang va?” malie a ta aa.

²⁶“Cawsaa'a taata,” ta hyi'a pate, Johan ca cawsaa bangkhuo ta profet tapata ama zang nakawta iema ca ciy amaa chiy hyi,” amaa ta.

²⁷Cacuonakawta Zingsuv kha, “Pachang va puv,” ama ta. Zingsuv ta, “A cuo kieca, kama zaw, khaapa nawhnyina tama hingpa hmang hing i tue tapa kha ca chang raa vayi ang,” a ta yi.

²⁸Tuokhaatama nama rue? Cawsaa pakha za aw te saacapaa pahning a hnyi. A uvthyipa kha, ‘I sapaa, ata ning ca mingsuv diedung luo si la re va hrie tie,’ a ta.

²⁹Ama ta, ‘Si khing va ang,’ a ta, cuorasala a hnang taata a palung a thle te a si.

³⁰A saata a syipa'a luo kha vaa te, capa haa ngiethie cata a chang ra. ‘I si'a ne, abyipa,’ a ta, cuorasala si li pata a aw.

³¹Hingpa tie pahning lie hing ahung hingma a paa khingnapa kha a tue? a ta yi. “A uvthyipa,” ama ta. Cacuonakaw Zingsuv ta, “Biehmisi tana ica chang yi: ngukhyituv tie hne siyhrawnung tie zaw na Khazing pena luo caa ngie khuo'a yi.

³²Johan kha aa hmuopa hringna luopuv pahmung sa riypata a vaw te zang va ungciy; cuorasala ngukhyituv tie hne siyhrawnung tie zaw ta ama zang. Nama hmung thluo patahmuo, a hnang taata nama palung kha a thle pata zang va ungciy.

³³“Pakhingpuonabie a hrangpa kha naathlie tie ung: “Luruo a hnyituvpa khata mingsuv diedung kha tue te, piehu a padung, mingsuv nawna khue kha cu te, rievena tluophie zaw a sa. Cakhutaata rehrietuv tie kha pahlie yite ama ca khy tlaw riypata aa tha.

³⁴Mingsuv thyi lu tiy a ta taata a cuvu la riypata rehrietuv tie'a luo kha a sii zaw a pathlie yi.

³⁵Rehrietuv tie ta a sii zaw kha patuv yite, pakha ama tuv, pakha thie yite pakha ca alung ta ama vaa.

³⁶Luruo a hnyituvpapaa ta a sii zaw kha a hluv vie ta a pathlie yi. Rehrietuv tie ta a hluo nig ama za tue taapa haakhata ama tue pakhaa.

³⁷A hnangcawce ta a saacapaapa kha pathlie te, “I saacapaa hing ca ama hmiezaa ngiethie aa,” a ta.

³⁸Cuorasala rehrietuv tie ta ama hmung pahne ta, “Hingpapaa hingna a rucutuv ta a cuo, a vaw tie ung, thie ung sala a hnyipa hing a la'a ungpuv,” amaa ta.

³⁹Cacuonakawta patuv yite diedung khungthing luo kha thaw yite ama thie.

⁴⁰“A cuo kieca diedung a hnyituvpa a vya chiy tiyta rehrietuv tie kha tuokhaatana a tue thlu'a mang yi nama ta ma? a ta yi.

⁴¹“Capa cawsaa chiepa tie ca thie'a yite, mingsuv lu cuo ningta a cuvu a pi khupa rehrietuv tie kha diedung ca a pahlie'a yi,” ama ta.

⁴²Zingsuv ta, “Caapathepa ta: ‘Ing satuv tie ta ama thawpa alung ca Ingkiy lung ta aa li. Capa hmang ca Abyipa tuepa cuote Ma hmungna lieta nang-uo a chiy vama?’ a ta pakha ri buo va ung ca ma?” a ta yi.

⁴³Cacuonakawta, ica chang yi: “Khazing pena ca niema'a taata lapa cuo'a te, pena thyipaa pha a hnyi riy'apa tie kha pi pata ama cuo aa,” a ta.

⁴⁴Ahunghmuo cuose hing alung cunglie a tlapa ca kyipatlaa'a te, hing alung ta a tlasuepa ca a zapatlaa diy aa,” a ta.[46]

⁴⁵Tluobyilepa tie hne Farasi ming ta Zingsuv ripa pakhingpuonabie ca ama thyi tiyta, kiema na malie a ta tapa kha ama pachang.

⁴⁶Cacuonakawta Zingsuv kha ama patuv khing, cuorasala zaapuv ta Zingsuv kha profet tana a cuo tapa ama zang nakawta zaapuv kha ciy yite patuv nguo vayi.