Read Lautu Chin Matthai 22 Bible Online

Matthai 22 - Lautu Chin bible

Matthai 22

¹Zingsuv ta zaapuv kha pa-khingpuonabie hmuo te bie a chang pakhaa yi.

²“Vuoruo pena ca a saacapaa cuota achiyhie saduona a tuepa siepahruo pakha hne tana aa lu.

³A sii zaw kha pathlie yite kupa tie bangkhuo kha a chiyhie saduona luo chiy riypata a pachang sa yi, cuorasala vya chiy khing vayi.

⁴A hrangpa sii zaw kha pathlie pakhaa yite, ‘Saduona ca ting ciepa ta a cuo tli. I cuetungpa hne sahring a thusapa zaw thie tli pate, zezaw bangkhuo ting ciepa ta a cuo tli. A chiyhie saduona luo ca a vaw tie ung, nama va ta aa,’ a ta yi.

⁵Cuorasala siysaa ri lipa yi ta chekha ca lu luo ama si, chekha ca chadaw luo cakuo yite,

⁶a hrangpa tie ta a sii zaw kha patuv yite, tuv yite ama thie.

⁷Siepahruopa ca a hihaa hringhruo te a rieka kha pathlie yite capa lie a nawpa tie ca thie yite ama khy kha myi ta ama rue.

⁸Cakhutaata a sii zaw kha, ‘Achiyhie saduona ca ting ciepa ta a cuo tli, cuorasala i kupa tie ta ca aphuv-asiy vayi.

⁹Ata hingta a zaa luopuv luo kha vaa ungla, nama hmungpa bangkhuo kha va ku tie ung,’ a ta yi.

¹⁰Cacuonakawta a sii zaw ca azaa luopuv luo kha vaa yite, ama hmungpa bangkhuo kha achie-apha ta li pata pakiy yite cawsaa ca achiyhie saduona ing ta pangkha ama ta.

¹¹Cuorasala Siepahruopa ca ama kupa tie mang riypata a vya ngie tiyta achiyhiena caw a tue lipa pakha kha a hmung.

¹²‘Liechung, khaapanakawma achiyhiena caw a tue li pata hingpa saduona chung luo naa ngie the?’ a ta. Cuorasala khaahmuo palie vyi.

¹³Cakhutaa siepahruopa ta a sii zaw kha, ‘A kuv hne a phyi kha ciy ungla khungthing khy zingna hmang, caana hne haa riena hmang luo kha thaw tie ung,” a ta.

¹⁴Tahematapakieca, “Kupa ca hluvsa yite, a tlawpa ca ama caw,” a ta.

¹⁵Farasi tie ca vaa yite Zingsuv kha a bie ripa taata a suena patuv the riypata khue ama khuo.

¹⁶Cacuonakawta iema ziytuv chekha hne Herod cawsaa chekha kha pathlie yite, “Saya, nama ca aa dangpa na cuopa maca pachang. Khazing khingna biedangpa kha cawsaa hmie mang li pata na pacuv yi, cawsaa cuona mang pata pahlyipalena tue vaciy.

¹⁷Cacuonakawta na ruenapa malie chang tie. Rom siepahruopa ngukhyi pi riypa hing ma phungbie ta a thlu ma a pa-aw ma?” ama ta.

¹⁸Zingsuv ta atingna pha lipa ama hnyi pakha pachang te, “Phahruocuo tie! Khaapanakawma ina dyapasya ungciy?

¹⁹Ngukhyi pi riypa tuokaa ca na pahmung tie ung,” a ta. Ngu tuokaa phiekha kha ama vya pi.

²⁰“Ahung hmiechang hne ahung ming ma a taa?” a ta yi.

²¹“Siepahruopa hmiechang hne siepahruo ming,” ama ta. Cacuonakaw, Zingsuv ta, “Cacuokieca siepahruo huopa kha siepahruo pi ungla, Khazing huopa kha Khazing pi tie ung,” a ta yi.

²²Capaca ama thyi tiyta ama nang uo te ama kha thuse yite ama cakuo.

²³Capa ning ngiethie cata thu-pakhaana aw vyi a tapa Sadusi ming chekha ca Zingsuv'a luo kha a vaw yite bie ama hiehriy.

²⁴Iema ta, “Saya, Moses ta, ‘cawsaa pakha ca saata hnyi li pata a thiy kieca a napuvnung kha a nuta tah aa hlaw'a te, a uvta cuo khata saata ama hnyi aa,’[47] tapata malie a pacuv.

²⁵Hingpa lie a zaa aw buopa uvcanu pasariy ama za aw. A uvthyicepa ta napuv chiy te saata hnyi li pata a thiyse, cacuonakaw nunghlyinung ca a nuta tah aa hlaw.

²⁶Cahaa ngiethie cata a pahningnapapaa zaw ca thiy te, a pathungnapapaa zaw a thiy ra ngiethie, ama pasariy yalya ta cahaa cata ama thiy.

²⁷A hnangcawce ta nunghlyinung ca a thiy.

²⁸Ama pasariy yalya ta amaa zaa hlaw nakawta thupakhaana ning thueta ahung napuv tama a cuo aa?” ama ta.

²⁹Zingsuv ta, “Nama hla karue de! Hinghaahingta nama hlapa hing Caa Pathepa hne Khazing cahrana nama pachang li nakaw na a cuo.

³⁰Athiypa tie ama thupakhaa thue hing vuoruo lie a awpa avuoming[48] lu'a yite a chiy a hie'a va tli yi.

³¹Athiypa thupakhaana kawlie Khazing ta aca chang payi ri buo va ung cama?

³²‘Kama ca Abraham Khazing, Isak Khazing, Jakob Khazing tana i cuo. Ama ca a hringpa tie Khazing tana a cuo, a thiypa tie Khazing ta cuo vyi,” a ta yi.

³³Cawsaazaapuv ta a pacuvnapa kha ama thyi tiyta ama nang ta a uo.

³⁴Zingsuv na Sadusi ming kha ama ri riy aw li nate ta a tue yi tapa kha Farasi ming ta ama thyi tiyta a tawpakhaw yite,

³⁵iema hraw taata phungbiesaya pakha ta a suena patuv riypata bie a hiehriy.

³⁶“Saya, nawbie hrawlie hing khaapa nawbie hingma a lece?” a ta.

³⁷Zingsuv ta, “Na Byipaapa na Khazing ca na pathiy na palung yalya, na hringna yalya hne na ruena na pacuona yalya ta due tie,”

³⁸tapa hingna a lecepa hne a biepuvcepa nawbie ta a cuo.

³⁹A suohningnapa nawbie ca ‘Nama hne nama naa due pahaata na ingpaa kha due ra tie,’ tapata a cuo.

⁴⁰Moses phungbie bangkhuo hne profet tie pacuvna bangkhuo hing hingpa nawbie suohning lie hingna aa khung diy,” a ta.

⁴¹Farasi tie amaa hmyana lie kha, Zingsuv ta,”

⁴²Messiah[49] hing tuokhaatama nama rue? Ahung ciypathla tama a cuo?” a ta yi. “David ciypathla,” ama ta.

⁴³Zingsuv ta, “Khaapanakawma Thlaapa ta David kha, ‘Messiah hing ‘Abyipa,’ a pata sa? David ta,

⁴⁴‘Abyipa ta i Byipaapa kha Na carie tie kha na phyipazaa rawlie i chi hluo li, I cacuo luo hingta a tu tie,’ a ta.

⁴⁵David ta Messiah ca i Byipaapa a ta kieca, tuokhaatama Messiah ca David ciypathla ta a cuo the aa?” a ta.

⁴⁶Zingsuv bie kha ahungtahmuo palie khu vayi, ama ning taacata ama kha ahungtahmuo bie hiehriy nguo va tli yi.