Read Lautu Chin Matthai 24 Bible Online

Matthai 24 - Lautu Chin bible

Matthai 24

¹Zingsuv ca Biena-ing taakhata pya te a cakuole pa khata ziytuv tie kha a thaa luo a vaw yite, Biena-ing a phana zya kha ama rikhyi. Zingsuv ta,

²“Hingpa hing nama hmung kaluo cuo vama? Biehmisi tana ica chang yi: Hing alung suokha hing hmuo a pacangcang pata aw'a va tli, a palang ta pacing diypa tana a cuo aa,” a ta.

³Zingsuv Oliv Tluocung lie a tu nguoluo pata, ziytuv tie kha iema se ta ama'a luo a vaw yite, “Malie chang tie, hing hmang hing khatiy tama a cuo aa? Naa vaw pakhaa na cuo hne cuo chuona riypa pamangsana ta khaapa hmang ma a aw aa,” ama ta.

⁴Zingsuv ta, “A raaring ung, ahunghmuo a padung sa kha ung.

⁵Cawsaa hluvpuv i ming ta a vaw'a yite, ‘Messiah[54] tana i cuo,’ ta'a yite cawsaa hluvpuv kha ama dung aa.

⁶Rie amaa tuvna thuohlaa hne rie amaa tuv'a nangpa thuohlaa kha nama thyi aa, cuorasala nama thlaa zang kha se. Cahaapa hmang ca ama aw aa, cuorasala a chuona ta cuo valie.

⁷Mingphang phangkha hne phangkha, ruokha hne ruokha amaa tuv aa. Hmangting lieta cakuo[55] tlung'a te, aling a siy aa.

⁸Hingpa hmang bangkhuo hing nu pazipa hne na a lu aa.

⁹Cakhutaata niema kha hrisaa riypa hne thie riypata malie kuv luo aca pi'a yi. Kama kawlieta mingphang ting ta aca hue'a yi.

¹⁰Cawsaa hluvpuv ca ama zangna kha thuse'a yite, pakha hne pakha kha a lyi'a yite amaa hue aa.

¹¹Cakhutaata profetpakhipa hluvpuv kha vya pya'a yite cawsaa hluvpuv kha ama dung aa.

¹²Phalina kha a pungzaale nakawta duena a cakingle aa.

¹³Cuorasala a chuona te a ang khupa ca khuona a hmung aa.

¹⁴Cakhutaa mingphang bangkhuo cuota tehte cuo riypata pena thuophaabie ca chuelyi khyzaa ta phupa a cuo aa; cakhutaa dyi tana a chuona ca a cuo aa.

¹⁵“Profet Daniel ta a ripa, ‘Ciy aa chiypa duvsamakhiepa,” hmang pathepa lie a daa pakha nama hmung aa.” (Hingpa caa a ripa hingta thyi the se).

¹⁶Judea ruo lie a awpa ta tluocung luo kha a ruo se.

¹⁷A ing cunglie a awpa ca a ing chunglie a awpa hmang la riypata cung kha se.

¹⁸Lu lie a awpa ta a buohryicungle la riypata kaa kha se.

¹⁹Capa ning hne cuo ningta nu a phyapa canung hne haaseta a hnyipa canung ca thluechiylipa tana ama cuo.

²⁰Namaa ruona cuo hing thlasiy chung hne Sabbath ning aa chuo li riypata thlaa chuo tie ung.

²¹Tahematapakieca chuelyi hruothu baataata a ta cuo te ta a tlung buo lipa, hmie luo cuo thue zaw a tlung li riy'apa, ruvnaana na a tlung aa.

²²Capa cuo ca pachang sa vie pata a cuo li kieca ahunghmuota hyazang'a vayi, cuorasala a tlawpa zaw cuota a cuo ca pachang sa vie pata a cuo aa.

²³Cakhutaa, pakhakha ta, ‘Mang tie, Messiah ca lie hing a aw hing,’ a cuo li kie, ‘lie hue a aw hue,’ aca ta kie zaw yima zang kha ung.

²⁴Messiah pakhipa tie hne profetpakhipa tie kha vya pya'a yite, a cuo khu kietaca Khazing a tlaw ciepa zaw khahmuo dung riypata kharuehaa hmang lesapa hne pamangsana zaw kha ama tue aa.

²⁵Maw khya ung, a cuo a tling hluo ta tlihing ica changlu yi.

²⁶Cacuonakawta cawsaa ta, ‘Mang tie! ama ca ruochung lie na a aw,’ aca ta kie zaw yima vaa kha ung. ‘Mang tie! ingkhuo chunglie na a aw,’ aca ta kie zaw yima va zang kha ung.

²⁷Ningchiy taata thinghlaa a vya cakang te ningtla te a khepahlipa haatana Cawsaa Saacapaa ca a vaw aa.

²⁸“Athiypa riy a awnapa hmang lie luotaa amaa hmyasuele aa.”

²⁹Capa ruvnaana cuo a chuo khu pahne ta, ning ca zing'a te, thlaa ca vaa'a va tli; aasiy zaw vuoruo taa za tla'a te, vuoruo lie a awpa cahrana zaw ca amaa cahang aa.

³⁰Cakhutaata Cawsaa Saacapaa pamangsana ca avuo lie aa luo aa. Cawsaa Saacapaa ca vuoruo amyi cung taata lesyi rungnaana hneta aa zuvpa kha chuelyi mingphang bangkhuo ta hmung'a yite ama caa aa.

³¹Aa vuoming kha chuelyi kiy paliy luo pathlie'a yite, hmyakaa kha thaapuv ta tung'a yite, aa tlawpa cawsaa zaw kha chuelyi kiy paliy, avuo dena kuo kha taata kuo kha te ta ama pakiy aa.

³²“Thyikuvkung'a taahingta a cuv tie ung. A daw kya pakiy te a hnaa a thue tiyta cuovuo na a ngie tli tapa kha nama pachang.

³³Cahaa cata, hingpa hmang bangkhuo nama hmung tiyta, ama ca thlake thabaw te a vya chiy tli tapa kha pachang tie ung.

³⁴Biehmisi tana ica chang yi: ata chuo cawsaa zaw ama thiy diy hluo hingta hingpa hmang bangkhuo a vya cuo aa tapa kha maw kha ung.

³⁵Vuoruo hne alyi ca ama ra aa, cuorasala kama bie ca khatiy tahmuo ra'a vyi.

³⁶Cuorasala, ahungtahmuo capa ning hne cuo ca khatiy tama a cuo aa tapa kha pachang vayi; avuoming cuose, Saacapaa cuose,[56] pachang vayi; Paa kyalya dyina a pachang.

³⁷Cawsaa Saacapaa a vaw riypa ca Noah chuo ning hmang a cuopa haa khatana a cuo aa.

³⁸Tiypa-aa a tlung hluo, Noah palaw chung luo a ngiena te ta, cawsaa zaw ca ning dang yite, canung hne capaa zaw amaa chiy amaa hie,

³⁹tiypa-aa vya tlung te a phya diy hluo te yi ta khaama a vya tlung tapa kha pachang vayi. Cawsaa Saacapaa aa vaw thueta ca cahaacatana a cuo aa.

⁴⁰Cakhutaa, lu lie a awpa pahning lie kha pakha la pata cuo'a te, pakha ca thuse pata a cuo aa.

⁴¹Sung a suv hnepa canung pahning lie kha pakha la pata cuo'a te, pakha ca thuse pata a cuo aa.

⁴²Cacuonakawta singvaasa pata aw tie ung, tahematapakieca khatiy ningcuo lieta ma nama Byipaapa a vaw aa tapa kha pachang va ungciy.

⁴³Ing a hnyituvpa ta a paruvpa khatiy tama a vaw aa tapa kha a pachang kieca a hmung li pata huo'a te a ing kha caphi pata paruv sa khu'a vyi tapa ca nama pachang.

⁴⁴Cacuonakaw, niema zaw a raaring tie ung, tahematapakieca Cawsaa Saacapaa ca nama mangkhuo lina cuo lie tana aa vaw aa.

⁴⁵Cakhutaata ahung cama zangtluo aa tlapa hne a singpa sii, a byipaapa ta a sii hrangpa tie uv riypa hne a cuo a hmuota tah sa a pi riypata re a pipapaa ta a cuo?

⁴⁶Re a hrie nguoluo ningta a byipaapa ta a vya chiyhnuepa sii ca thluechiypa tana a cuo.

⁴⁷Biehmisi tana ica chang yi: Capapaa ca a byipaapa ta a hnyipa bangkhuo a mangchiytuv ta a chi aa.

⁴⁸Cuorasala sii pha lipa pakha ta, ‘i byipaapa ca a vaw'a valie, a vya haa kalie aa ta te,

⁴⁹sii hrangpa tie kha tuvde yite, a pariypa tie hne khata ning dang yite a aw kieca,

⁵⁰a mangkhuo li cuo ning hne a pachang li cuo ning khata a byipaapa ca a vaw aa.

⁵¹A diykariy pata a cepachung diy'a te, caana hne haa cariena a awna hmang lie kha phahruocuo tie hneta a chihne aa.