Read Lautu Chin Matthai 25 Bible Online

Matthai 25 - Lautu Chin bible

Matthai 25

¹“Vuoruo Pena ca hinghaa-hingtana a cuo aa. Napuv a chiypa satliepa[57] daw riypata ama myi-ing hne a pyapa lesaa[58] pahraa hne tana aa lu.

²Iema hrawlie papangaa ca a ngaapa cuo yite a hrangpa papangaa ca a singpa ama cuo.

³A ngaapa tie ca myi-ing kha a cyi yite myitiy a cyi vayi.

⁴A singpa tie ca ama myi-ing hne myitiy pangkha ama rawpa pung kha amaa cyipuo.

⁵Napuv a chiypa satliepa ca a vya chiy haa nakawta lesaa zaw ca tluv yite amaa hmung.

⁶“Zuocang a chiypa khiy ta, ‘Napuv a chiypa satliepa na a vaw tli! Thu ungla va daw tie ung,’ tapata ama khi.

⁷Lesaa pahraa tie ca thu yite ama myi-ing kha ama vya pachie.

⁸Catiyta ta a ngaapa tie ta a singpa tie kha, ‘Myitiy malie pibuo thi tie ung, tahematapakieca ma myi-ing na a thiy'a nang,’ ama ta.

⁹Cuorasala a singpa tie ta, ‘Cuo the'a vyi, niema hne kiema hne malie a zu pakhaw the'a vyi, chadaw luo kha cakuo ungla nama vaa calyi patana a pha vie aa,’ ama ta.

¹⁰A ngaapa lesaa tie myitiy ama vaa calyi chung ta napuv a chiypa satliepa ca vya chiy te, a ting pacie pata a awpa papangaa tie hneta achiyhie saduona luo kha a ngie yite ingchiy kha ama khaa.

¹¹“Cakhutaata cata lesaa hrangpa tie ca vya chiy yite, ‘Abyipa, abyipa, malie kya pahaw tie,’ ama ta.

¹²Cuorasala ama ta, ‘niema kha ca pachang hrahring vayi ang,’ a ta yi.

¹³Cacuonakawta a raaring pata huo tie ung, tahematapakieca a ning hne a cuo[59] kha pachang va ungciy.

¹⁴Vuoruo Pena ca khy tlawna luo a tha'a nang nakawta a sii zaw kha ku yite a hnyipa mangchiy riypata bie a taa siypa cawsaa pakha hne tana aa lu.

¹⁵Ama hmang tue khuna cyicuo zi ta tuokaa kha a pi yi: pakha kha talent suopangaa, pakha kha talent suohning, pakha kha talent suokha lawta a pi yi. Cakhutaa ca khy tlawna luo ca aa tha.

¹⁶Talent suopangaa a hmungpapaa cata a tuokaa cata sung kha pali te, a hrangpa talent suopangaa amie a hmung.

¹⁷Cahaa cata talent suohning a hmungpapaa ta a hrangpa talent suohning amie a hmung ra.

¹⁸Cuorasala talent suokha a hmungpapaa khata alyi kha cu te a byipaapa tuokaa kha a nu.

¹⁹“Cuo syipuv khu taata capa sii tie ama byipaapa ca vya chiy pakhaa te ama tuokaa hmuonapa kha a sieta tah a tue khyi yi.

²⁰Tuokaa talent suopangaa a hmungpapaa kha hmie luo vya pya te a mie talent suopangaa a vya pi. Abyipa, kama kha tuokaa talent suopangaa ina za pi ciy. ‘Mang tie! talent suopangaa i pamie,’ a ta.

²¹A byipaapa ta, ‘A pha ciemuo, a phapa hne zangtluo aa tlapa sii, nama ca hmang cawta kawlie zangtluo a tlapa tana na cuo, hmang hluvpuv mangchiytuv tana ica chi aa, zaa ngie la na byipaapa palungtluona hing zaa hraw ra tie,’ a ta.

²²Cakhutaa tuokaa talent suohning a hmungpapaa kha hmie luo vya pya ra te, ‘Abyipa, kama kha tuokaa talent suohning ina za pi ciy; mang tie! talent suohning i pamie,’ a ta.

²³A byipaapa ta, ‘A pha ciemuo, a phapa hne zangtluo aa tlapa sii, nama ca hmang cawta kawlie zangtluo a tlapa tana na cuo, hmang hluvpuv mangchiytuv tana ica chi aa, zaa ngie la na byipaapa palungtluona hing zaa hraw ra tie,’ a ta.

²⁴Cakhutaata tuokaa talent suokha a hmungpapaa kha a hmie luo vya pya ra te, ‘Abyipa, nama ca cawsaa tateta-iepa, saciy na vaa lina lie sa hrie cate, ciy na cyi li na lie kha a thyipaa a pahriypa na cuopa kha ica pachang;

²⁵cacuonakawta ca ciy ang te na tuokaa talent suokha ca alyi chunglie i nu, na huopa hing a la tie,’ a ta.

²⁶A byipaapa ta, ‘A pha lipa hne a thaathiypa sii, saciy i vaalina lie sa hrie ang te, ciy i cyi lina hmang lie thyipaa i pahriy tawpa napa chang sasaw cuo vama?

²⁷Cacuokieca i vya kaa thueta i tuokaa hne amie hne i hmung riypata i tuokaa ca tuokaa-ing lie na za chi riypa muo a cuo ta.

²⁸Cacuonakawta hingpapaa taahingta tuokaa kha la ungla, talent suohraa a hnyipapaa kha pi tie ung.

²⁹Tahematapakieca a hnyipa tie ca chachiypa cuo'a yite, a hlyi nate ta ama hnyi aa; cuorasala khaapahmuo a hnyi lipa ca a hnyi tlakuopa kha hmuo chuv pata a cuo aa.

³⁰Hingpa thlahnena a hnyi lipa sii hing ale khyzingna luo, caana hne haariena hmang luo kha thaw tie ung,’ a ta.

³¹Cawsaa Saacapaa ca a rungnaana hne avuoming bangkhuo hneta a zuv tiyta, a byithude rungnaapa cunglie ca a tu'a te,

³²mingphang bangkhuo ca a thaa lie pahmyapa ama cuo aa. Tuvkhietuv ta tuv ca mie'a taata a chepa haata mingphang bangkhuo kha phuvhning ta a che'a yi.

³³Tuv tie kha a cacuo luota chi'a yite mie tie kha a cavyi luota a chi'a yi.

³⁴Siepahruo ta a cacuo luota a awpa tie kha, ‘I paa ta thluechiy a pipa tie, a vaw tie ung. Chuelyi hruothu baataata niema cuota ting ciepa Pena ru hing vya cu tie ung.

³⁵Tahematapakieca i nang diy te sa ina pi ungciy, i tiy hrie te tiy ina pi ungciy, khyche cuo ang te ing inaa patlung sa ungciy,

³⁶abuv-ase riypa i hnyi li ning caw ina pi ungciy, pasa ang te ina mangsang ungciy, thaw tla ang te ina ve ungciy,’ a ta'a yi.

³⁷Cawsaa aa dangpa tie ta, ‘Abyipa, khaapa ning ma na nang diy te sa maca pi, na tiy hrie te tiy maca pi buo?

³⁸Khaapa ning ma khyche cuo cate maacaa patlung sa, abuv-ase riy hnyi li pata aw cate caw maca pi buo?

³⁹Khaapa ning ma pasa cate a cuo li kie thaw lie aw cate maca ve buo?’ ama ta aa.

⁴⁰Siepahruo ta, ‘Biehmisi tana ica chang yi: Hing i uvnu zaw hrawlie ta nutaacepa a cuo zaw a cunglie nama tuepa ca kama cunglie nama tuepa tana a cuo,’ a ta'a yi.

⁴¹Cakhutaa a cavyi luota a awpa tie kha, ‘Niema, chie sapa tie, i thaa taahingta pya ungla Setaa hne aa vuoming cuota ting ciepa a thiy buo lipa myi chung luo kha cakuo tie ung.

⁴²Tahematapakieca i nang diy te sa na pi va ungciy, i tiy hrie te tiy na pi va ungciy;

⁴³khyche cuo ang te naa patlung sa va ungciy, abuv-ase riy hnyi li pata aw ang te caw na pi va ungciy; i pasa ning hne thaw i tla ning zaw na ve va ungciy,’ a ta yi.

⁴⁴Cakhutaa iema ta, ‘Abyipa, kha tiy ning ma na nang a diy, na tiy a hrie, khyche ta na cuo, abuv-ase riy hnyi li pata na aw, na pasa, thaw na tla pata ca hmung pate caa byase khing li pata ma aw buo?’ ama ta aa.

⁴⁵Cakhutaa ama ta, ‘Biehmisi tana ica chang yi: nutaacepa cawsaa pakha naa bya khing lipa kha, kama inaa bya khing lipa ca tana a cuo, a ta'a yi.

⁴⁶Cakhutaa, capa tie ca chuozaa duotena ruo luo kha si'a yite, cawsaa a dangpa tie ca chuozaa hringna luo kha ama si aa,’ a ta.