Read Lautu Chin Matthai 26 Bible Online

Matthai 26 - Lautu Chin bible

Matthai 26

¹Zingsuv ta hing bie bangkhuo hing a ri khu taata ziytuv tie kha,

²“Nama pachangpa haata ning hning khutaa Lawsena Pyi vya cuo'a tli te, Cawsaa Saacapaa ca vieluo lie khepuo riypata pipa a cuo aa,” a ta yi.

³Cakhutaa tluobyilepa tie hne uvthyi tie ca Tluobyilecepa Kaiafas ing lie kha a hmya pakhaw yite,

⁴Zingsuv kha a paruvta tah patuv pata thie riypata khue ama khuo.

⁵Cuorasala iema ta, “Pyi chunglie ca tue'a va ungpuv, cawsaa na hnaa a pahnaw sue'a yi,” amaa ta.

⁶Zingsuv ca Bethani khy, caahming-hmaa[60] zaa phya buopa Simon ing lie a aw nguoluo ning kha

⁷canung pakha a vaw te, alabaster ungthyi lie pangkha ta a rawpa a muo ruv ciemuopa ziyhmyi kha cabya lie a tu nguoluo pata a luv lie a bya.

⁸Capa ca ziytuv tie ta ama hmung tiyta ama hi haa te, “A puohrie laalaw de!

⁹Hingpa ziyhmyi hing tuokaa a dawsawli ta zaa pata siypasa tie pi riypa a cuo raalaa pata,” ama ta.

¹⁰Cuorasala Zingsuv ta khapa kaw kha a pachang tiyta, “Khaapanakawma hingpa nung hing hnaa nama pahnaw? I cuota hmang phapa na a tue.

¹¹Siypasa tie ca niema'a lie ama aw pari aa, cuorasala kama ca niema'a lie aw pari'a va ang.

¹²Ziyhmyi ina byapa hing i riy paby riypata a tingtuopa tana a cuo.

¹³Biehmisi tana ica chang yi: Thuophaabie ama phu napa chuelyi hmangting lie hingpa nung a tuepa hmang hing ama maw lina ta ama ri pari aa,” a ta.

¹⁴Cakhutaa ziytuv hlyihning hraw-lie pakha a cuopa Judas Iskariot ca tluobyilepa tie'a luo kha vaa te,

¹⁵“Zingsuv hing nama kuv luo ica pi kie yi ca khaama ina pi'a ungciy?” a ta yi. Iema ta ngu tuokaa sawthung kha ama pi.

¹⁶Ama khu yalya taakhata Judas ca Zingsuv lyina riypa cuophaa dyi kha a bya.

¹⁷Ruoriy phuv li Viechuo Pyi ning kha ziytuv tie ca Zingsuv'a luo kha a vaw yite, “Lawsena Pyi sa dung pakhawnapa ca khaapalie va pachie se pala ma na khing?” ama ta.

¹⁸Zingsuv ta, “Khy chunglie cawsaa pakhapapaa luo kha vaa ungla, ‘Saya na, I cuo na a tling tli, naa ziytuv tie hne tana na ing lie Lawsena Pyi ma tue khing, caa ta,’ va ta tie ung,” a ta yi.

¹⁹Zingsuv ta a changpa haa yi cata ziytuv tie ta Lawsena Pyi sa ca ama pachie.

²⁰Zuoluo ca Zingsuv hne ziytuv hlyihning ca sa ning riypata amaa tu pakhaw.

²¹Sa ama ning nguoluo pata Zingsuv ta, “Biehmisi tana ica chang yi, niema chung taa pakha ta ina lyi'a ungciy,” a ta.

²²Ziytuv tie ca ama ngie chi hringhruo te pakha hnang pakha ta, “Abyipa, kama i cuo maw?” ama ta kaluo.

²³Zingsuv ta, “Kama hne lapakhue khuekha a caphaw hnepa hingna naa lyi aa,” a ta.

²⁴Cawsaa Saacapaa ca Caapathepa lie a kaw aa capepa haakhata a thiy aa, cuorasala Cawsaa Saacapaa a lyituvpa cuo hing taca khatluv tama ciy aa chiy aa! Capapaa ca puv li pata aw sala a cuota a pha vie aa,” a ta.

²⁵A lyituv Judas ta, “Saya, kama ta i cuo maw?” ta te a hiehriy. Zingsuv ta, “Na cuo ne,” a ta.

²⁶Sa ama ning nguoluo ning kha, Zingsuv ta viechuo kha la te thlaa a chuo khu taata chechi te ziytuv tie kha a pi yi. “A la ungla ning tie ung,” hingpa hing i pangpa tana a cuo,’ a ta.

²⁷Cakhutaata panuo kha la te, Khazing kha palungtluona bie a hluo khu taata iema kha pi yite, “Nama bangkhuo ta dang tie ung.

²⁸Hingpa hing biekuona[61] i thiyse, cawsaa hluvpuv sue a ngiethena riypata i lyipa tana a cuo.

²⁹Ica chang yi: I Paa Pena chunglie niema hne mingsuv tiy thaapa i dang hluo li hingpa mingsuv tiy hing dang pakhaa'a va tli ang,” a ta yi.

³⁰Cakhutaa hlaa sa yite Oliv tluo luo kha ama si.

³¹Cakhutaa Zingsuv ta iema kha, “Caapathepa ta, ‘Khazing ta tuvkhietuv kha tuvsa'a te, tuvrung chunglie tuv kha ama chepatlaa diy aa,’ a tapa haata, ata zuo hrahring lie hing nama bangkhuo ta ina thuse diy'a ungciy.

³²Cuorasala pathu pakhaapa i cuo thueta Galilee luo kha i silu aa,” a ta yi.

³³Piter ta Zingsuv kha, “A hrangpa tie bangkhuo acaa ruose zaw yi ta, kama ca caa ruose buohluo'a va ang,” a ta.

³⁴Zingsuv ta Piter kha, “Biehmisi tana ica chang: Ata zuo aa a khang hluo ta yi thung te ina thaw'a ciy,” a ta.

³⁵Piter ta, “Nama hne thiy ra riypa i cuo zaw ta ca thaw'a va ang,” a ta. Ziytuv tie bangkhuo ta cahaa cata ama ta kaluo.

³⁶Cakhutaa Zingsuv ca ziytuv tie hne khata Gethsemane ama tapa hmang luo kha vaa yite iema kha, “Palie hue thlaa i va chuo chung ta hingpa lie hing zaa tu tie ung,” a ta yi.

³⁷Piter hne Zebedi saacapaa pahning tie kha aa chiyle yi. A ngie chi te a lalilahie a chiy.

³⁸Iema kha, “I pathiypalung lie ngiechina hing le tuv te vuotaa i thiy'a nang. Lie hing aw ungla a hmung li pata na huo mya ung,” a ta yi.

³⁹Acawta va cakuo vie te, alyi lie kha a bu te, “I Paa, a cuo khu pata a cuo kieca hingpa te-angna panuo hingta na law thi se! Cuorasala kama khingna haata cuo kha se, nama khingna haata cuo hriy se,” tapata thlaa a chuo.

⁴⁰Cakhutaata ziytuv tie'a luo kha vya kaa te amaa hmungpa kha a hmung yi ca, Piter kha, “A hmung li pata siymaluo pakha chuo hmuo na huo khu va ung cama?

⁴¹Pasupaliyna chung luo nama tla li riypata a hmung li pata thlaa chuo tie ung. Pathiypalung ta a khing raalaa pata, saapa ca a thaazuo na a caw,” a ta.

⁴²Zingsuv ca a yihningnapa vaa pakhaa te thlaa a chuo pakhaa. “I Paa, hing panuo hing dang li pata law the a aw li kieca, na khingnapa haa cuo thluo se,” a ta.

⁴³Ziytuv tie'a luo kha a vya kaa pakhaa ca amaa zaa hmung ngiethie, ama ming hetahmuo haw khu vayi.

⁴⁴Thuse pakhaa yite, vaa te, a yi thungna thlaa a chuo pakhaa, a ri tawpa kha a ri pakhaa.

⁴⁵Cakhutaa ziytuv tie'a luo kha vya kaa te, “A hmung ung cate ma namaa pahy hyalya kalie? Mang tie ung! Cawsaa Saacapaa ca a suepa tie kuv chung luo pina cuo kha a vya chiy tli.

⁴⁶Thu tie ung, cakuo'a ungpuv. Mang tie ung, naa lyipapaa ca lie hing a vya chiy hing, a ta yi.

⁴⁷Zingsuv ta bie a ri nguoluo ning kha ziytuv hlyihning hraw taata pakha a cuopa Judas ca tluobyilepa tie hne uvthyi tie ta ama pathliepa, zueziy hne tungbung a cyipa cawsaazaapuv hne khata ama vya chiy.

⁴⁸A lyituvpapaa cata zaapuv kha pamangsana pi pacie yite, “I pahnuopapaa ca nama patuv khingpa khata cuo'a te nama patuv aa,” a ta yi.

⁴⁹Zingsuv'a luo kha vaa paluo te, “Saya, na cunglie diena aw se,” ta te a pahnuo.

⁵⁰Zingsuv ta, “Liechung, na tue khingpa ca tue tie,” a ta. Cakhupahne a vaw yite Zingsuv ca ama patuv.

⁵¹Zingsuv hne a aw rapa pakha ta a zueziy kha a da te tluobyilecepa sii naacakue kha a sa pathla.

⁵²Zingsuv ta, “Na zueziy kha a kaw luo pasuo tie. Zueziy a hmuopa ca zueziy tana a thiy aa,” a ta.

⁵³I Paa kha abyana i hie kieca yikha ta avuoming rieka phuv hlyihning laata a hluv vie ina za pathliepa khu tapa kha pachang va cama?

⁵⁴Cuorasala cahaa cata a cuo kieca, tuokhaatama hinghaahingtana a cuo aa za tapa Caapathepa bie ca a tling khu aa?

⁵⁵Capa cuo ning cata Zingsuv ta zaapuv kha, “Kama ca damie tama i cuo, khaapanakawma kama patuv riypata zueziy hne tungbung a vya cyi ung cate namaa vaw? a ta yi. A ning tating ta Biena-ing lie a tu ang te ica pacuv ning yi kha ahunghmuota na patuv vade ungciy.

⁵⁶Cuorasala profet tie ta Caapathepa chunglie ama ripa a tlingna riypata hingpa hmang bangkhuo hing a cuopa ta a cuo,” a ta. Cakhutaa ta ziytuv tie ca ama kha thuse yite amaa ruo diy.

⁵⁷Zingsuv ca a patuvpa tie khata tluobyilecepa Kaiafas ing luo kha cakuo khyi yite capa lieca phungbie saya tie hne uvthyi tie kha amaa zaa hmya.

⁵⁸Piter ta tluobyilecepa inghmie te kha a hlapuo pata ziy yite tlawhmie luo kha a ngie te tuokhaatama hmang a vya cuo aa tapa pachang khing re pata rie a vepa tie'a lie kha a tu.

⁵⁹Tluobyi lepa tie hne bierituv tie palang khata Zingsuv thie the riypata a suena kha huv yite,

⁶⁰hanghie pata bie ri te sue a phawpa a hluvsa amaa vaw raalaa pata a suena suokha hmuo hmung khu vayi. A hnangcawce ta cawsaa pahning vya pya yite,

⁶¹“Hingpapaa hingta, Khazing Biena-ing hing phi'a ang te ningthung chunglie i sa pakhaa khu aa, a ta,” ama ta.

⁶²Tluobyilecepa ta a daa te Zingsuv kha, “Palie riy hnyi va cama? Hingpa tie ta sue aca phawpa yi hing khaapa bie ma a cuo? a ta.

⁶³Cuorasala Zingsuv ca a dieta tah a aw. Tluobyilecepa ta canyi pakhaa te, “A hringpa Khazing ming ta chie a sa ang te ica ta: Khazing Saacapaa, Messiah[62] ta na cuo kieca malie chang tie,” a ta.

⁶⁴Zingsuv ta, “Na ri tli cahaw! Cuorasala ica chang yi: Ata taahingta Cawsaa Saacapaa ca Cungnungce cacuo luo khata a tu'a te vuoruo amyi cung taata aa zuvpa kha nama hmung aa,” tapata a palie.

⁶⁵Cakhupahne tluobyilecepa ca a pang kha thlaa te, “Capaca Khazing thuo-pachina tana a cuo! Pachangkhyituv hrangpa a hu va tli puv. Khazing thuopachina bie a ripa ca niema ta nama thyi tli!

⁶⁶Tuokhaatama nama rue?” a ta. Iema ta, “Thiy aa phuv,” ama ta.

⁶⁷Cakhutaa a hmie lie kha ama paciy ta pacha yite ama tuv; chekha ta cabe yite,

⁶⁸“Messiah, ahungma caa cabe tapa kha malie chang tie,” ama ta.

⁶⁹Piter ca ingle, tlawhmie lie a tu nguoluo ning kha tluobyilecepa changtaapanung kha ama'a luo a vaw te, “Nama zaw hing Galilee pa Zingsuv hne a khepa tana na cuo,’ a ta.

⁷⁰Cuorasala iema bangkhuo hmielie kha a sie te, “Khaapama na ri tapa kha pachang va ang,” a ta.

⁷¹Thlake luo kha a pya ca a hrangpa changtaapanung ta ama kha hmung te a thaa lie a daapa tie kha, “Hingpapaa hing Nazareth khypa Zingsuv'a lie zaa aw rapa tana a cuo,” a ta yi.

⁷²Piter ta, “hingpapaa hing i pachangpa cuo vyi,” ta te chie a sana hne aa sie pakhaa.

⁷³A cawta a aw pata, capa lie a daapa tie ta Piter ca, “Nama hing iema'a lie a aw rapa tana na cuo hrahring, na uephya tana naa hnang,” ama ta.

⁷⁴Cakhutaa Piter ta, “Nama ripapaa hing pachang hrahring va ang tapata chiesana hne bie i kuo,” a ta. Cakhupatahne ta aa a khang.

⁷⁵Piter ca Zingsuv ta a za changpa, “Aa a khang hluo ta pachang va ang ne, ta'a cate yi thung te ina thaw'a ciy,” a tapa bie kha a kya thyi pakhaa. Ale luo kha pya te khuopuv ta a caa.