Read Lautu Chin Matthai 27 Bible Online

Matthai 27 - Lautu Chin bible

Matthai 27

¹Mawdiychie ta tluobyilepa tie hne uvthyi tie ca a hmya yite Zingsuv thie riypa kha khue ama khuo.

²Ama kha pa-uo yite ama ciy khu taata muokiy byi Pilat kuv luo kha ama pi.

³Zingsuv a lyituv Judas ta Zingsuv ca thie riypatana bie ama chi tapa kha a pachang tiyta ngu tuokaa sawthung kha la te tluobyilepa tie hne uvthyi tie kha a va pi pakhaa yi.

⁴“Suena a hnyi lipapaa[63] lyi ang te thiyna luo i papha sapa ca i sue,” a ta. Kiema hne khaapama aa se, nama re tana a cuo,” ama ta.

⁵Tuokaa sawthung kha Biena-ing chunglie ca thaw siy te a pya, cakuo te a vaa pa-uosa.

⁶Tluobyi lepa tie ta tuokaa kha a haa yite, “Hingpa tuokaa hingca thiyse tuokaa tana a cuo, Biena-ing tuokaa china lieta chi riypa ca ma phung ta cuo vyi,” ama ta.

⁷Ama ripakhaw khu taata bi vytuvpapaa lu kha ruohrang ming thluohmang riypata ama calyi.

⁸Capanakaw cata capa lu ca ata ning te pata Thiyse Lu tapata ama u.

⁹Cahaa cata profet Jeremiah[64] ta a za ri siypa bie ca a tling: “Israel ming ta capapaa calyina riypata bie ama chi ciepa muo ngu tuokaa sawthung kha la yite,

¹⁰Abyipa ta bie ina pipa haata bi vytuvpapaa lu calyina ta ama hmuo,” a za ta.

¹¹Zingsuv ca muokiy byipa hmie-kunglie kha a daa te, muokiy byipa cata, “Judah ming siepahruo cata na cuo ma? tapata a hiehriy. Zingsuv ta, “Nama ta na ri cahaw,” a ta.

¹²Cuorasala tluobyilepa tie hne uvthyi tie ta sue ama phawpa kha suokha hmuo palie vayi.

¹³Cacuonakaw Pilat ta, “Khatluv ta ma sue aca phaw yi tapa hing thyi va cama?” a ta.

¹⁴Cuorasala Zingsuv ta kaakha hmuo a palie li nakawta muokiy byipa ca a nang ta a uo.

¹⁵Lawsena Pyi kyry ta muokiy byipa ta, cawsaazaapuv ta pya se tapata ama hiepa thaw a tlapa pakha kha a papyapa taw yi.

¹⁶Capa cuo ning ca zaapuv ta pachangpa thaw a tlapa pakha aw te, a ming ca Zingsuv[65] Bar-Abbas a cuo.

¹⁷Cacuonakaw zaapuv kha amaa vya hmya ca Pilat ta, “Ahung hing pathlie se tapa ma ina khing ungciy? Zingsuv Barabbas ma a cuo li kie Messiah[66] tapa Zingsuv ma?” a ta yi.

¹⁸Pilat ta, i-aw ama hnyi nakawtana i kuv luo ina vya pi yi tapa kha a phasa pata a pachang.

¹⁹Pilat ca bierina thude lie a tu nguoluo ning kha a napuvnung ta bie kya taa te, “Suena khaahmuo a hnyi lipapaa kha a cunglie khaahmuo za tue khya, tahematapakieca ama kawlie tana azuohnie i muo ta riethyina a hluvsa i ang,” a ta.

²⁰Tluobyilepa tie hne uvthyi tie ta cawsaazaapuv kha Bar-Abbas kha pathlie pata Zingsuv thie riypa kha ama pahie sa.

²¹Muokiy byipa ta cawsaazaapuv kha, “Iema pahning lieta a ahung hingma pathlie se tapata ina khing ungciy?” a ta pakhaa yi. Iema ta, “Barabbas!” ama ta.

²²Pilat ta, “Cacuokieca Messiah tapa Zingsuv hing tuokhaatama i tue aa?” a ta. Ama bangkhuo ta, “Vieluo lie thie tie!” ama ta.

²³Ama ta, “Khaapa suena ma a tue? a ta yi. Cakhupahne ama ue a aw zawdya ta khi yite, “Vieluo lie thie tie!” ama ta.

²⁴Pilat ta ri tyly pata a thlahnenapa aw vyi tapa hne cawsaazaapuv ta hnaahnawnapa tlaku kha chiykhyi'a kie yi a ta nakawta, tiy kha a la te cawsaazaapuv hmielie kha a kuv a siy te, “Hingpa suena a hnyi lipa[67] thiyse kawlie hing kama ca i pathe, niema tuepa tana a cuo,” a ta.

²⁵Cawsaazaapuv palang ta, “Hingpapaa thiyse ca kiema hne ma saming sahlaa cunglie tlung mangsue!” ama ta.

²⁶Cakhutaa Pilat ta Barabbas kha pathliepa yite, Zingsuv ca a tuv khu taata vieluo lie thie riypata a pi yi.

²⁷Cakhutaa muokiy byipa rieka tie ta Zingsuv ca muokiy byipa ing luo ca a ngiekhyi yite ama yalya ta ama cadung.

²⁸A pang kha hlepa yite pangsepa ama pabuv.

²⁹Cakhutaa ahling ta ama phiepa lakhuv kha ama pakhuv. A cacuo kuv lie kha asung pahrie yite, a hmiekung lie ama pakhuv pane yite ama tue hyalya. “Judah siepahruo ca a hring a taa pasiy se! ama ta.

³⁰Ama paciy ta pacha yite, asung kha chuv yite a luv lie amaa hluo.

³¹Ama tue hyalya khu taata pangsepa kha hlepa yite ama pang kha ama pabuv pakhaa. Cakhutaata vieluo lie thie riypata ama kha ama pya khyi.

³²Ama cakuole pata Sairin khypa Simon ama tapa kha a taw yite, Zingsuv vieluo tung kha hripuo yite ama papuv sa.

³³Golgotha (Luvruv Hmang tana siyluo tana a cuo) ama tapa hmang luo kha ama kya chiy.

³⁴Capa lieca Zingsuv kha mangkhaa haata a khapa tiy hne ama pyapa mingsuv ama pi, a pacuo te dang khing vyi.

³⁵Zingsuv ca vieluo lie thie yite a caw kha vyisung a da yite amaa re.

³⁶Cakhutaa a tu yite ama kha ama huo.

³⁷“Hingpapaa hing Judah siepahruo Zingsuv tana a cuo,” tapa, sue ama phawnapa caa kha cape yite a luv cunglie ama taa.

³⁸Cakhutaa Zingsuv'a lieca damie pahning kha pakha a cacuo luo, pakha a cavyi luota vieluo lie ama taa ra.

³⁹A hmungpaapa bangkhuo ta ama luv ti sue yite ama bieke ta,

⁴⁰“Biena-ing puv hmuo para'a ang te ningthung chung ta i sa pakhaa ne a tapa paa, nama hne nama ca a khuo tie nie! Khazing Saacapaa ta na cuo kieca vieluo cung taakhata za cung tie! ama ta.

⁴¹Cahaa cata tluobyilepa tie, phungbie saya tie hne uvthyi tie zaw ta tue hyalya ra yite:

⁴²“Malie ca a khuo yi, cuorasala ama hne ama ca a khuo the vyi! Israel siepahruo ta muo a cuo ta; ata bala hingta vieluo cung taa za cung sela ca ma zang'a muo.

⁴³Ama ta Khazing kha a buchuo pata Khazing Saacapaa tana i cuo aa ta; Khazing cata a khing kie ata hingta za khuo se,” amaa ta.

⁴⁴Ama hne vieluo ama taa hnepa damie tie zaw khata ama tue hyalya ra.

⁴⁵Ningchung khingkhuo taata zuoluo siymaluo pathung te ruo ting[68] ta khy a zing.

⁴⁶Siymaluo pathung hrawlie kha Zingsuv ca, “Eli, Eli, lema sabachthani?” tapata khuopuv ta a khi. A siyluo ca, “I Khazing, I Khazing, khaapanakawma ina thaw ciy?” tana ta a cuo.

⁴⁷A thaalie a daapa cawsaa chekha ta thyi yite, “Elijah na a ku,” ama ta.

⁴⁸Iema hraw taa pakha ta vaa ruo pahraa te pangcaw kha la te mingsuv tiy chunglie a naw khu taata aarasung daw lie ciypuo te dang riypata a pi.

⁴⁹Cuorasala a hrangpa tie ta, “Aw caw, ama khuo re pata Elijah aa vaw ma a vaw vama tapa kha mang'a ungpuv,” ama ta.

⁵⁰Zingsuv ca khuopuv ta khi pakhaa te a huv a ci.

⁵¹Cakhutaa Biena-ing pangzu ca a luv taata a lie te a tlaa. Alyi aa cahang, alung kyi te aa che.

⁵²Thluo zaw kha a pahaw yite Khazing cawsaa pathepa a thiy ciepa a hluvsa kha ama thupakhaa.

⁵³Zingsuv a thupakhaa khu taata thluo chung taa kha kya pya yite khypuv pathepa chung luo kha a ngie yite cawsaa hluvpuv'a lie kha amaa luo.

⁵⁴Zingsuv a huopa riebyipa hne a rieka tie ca aling aa siypa hne hmang a cuopa ting kha ama hmung tiyta ama thlaa zang hringhruo te, “Hingpapaa hing Khazing Saacapaa hmisi tana a cuo,” ama ta.

⁵⁵Galilee ruo taata Zingsuv zaa ziy tawpa tie hne zaa bya tawpa tie canung a hluvpuv aw yite luopaa taakhata ama mang.

⁵⁶Iema hrawlie ca Mary Magdalin, Jeim hne Josef nung Mary, hne Zebedi saacapaa tie ama nung zaw kha ama aw ra.

⁵⁷Zuoluosuo khata Arimathea khy taata Josef ama tapa, a hnyirung-sapapaa, Zingsuv ziytuv zaa cuopapaa pakha a vya chiy.

⁵⁸Pilat kha vaa taw te Zingsuv riy kha aa hie. Pilat ta, Zingsuv riy kha Josef pi riypata naw a pi yi.

⁵⁹Cacuonakaw Josef ta Zingsuv riy kha la te pawruo pang pathepa ta cataw te

⁶⁰ama thluo riypata alung ryi te a cupa thluo thaapa lie kha a paby. Cakhutaa lungphie lesapa ta thluopakaa kha khaa te a cakuo se.

⁶¹Mary Magdalin hne Mary hrangpa pakha ca thluo luo kha a hy yite amaa tu.

⁶²A mawluo, Sabbath ning kha tluobyilepa tie hne Farasi tie ta Pilat kha a taw yite,

⁶³“Abyipa, hing a hanghiepapaa hingta a hring ningta, ‘Ningthung khutaa pathu pakhaa patana i cuo aa,’ a za tapa kha ma pachang.

⁶⁴Cacuonakawta a thluo kha ningthung te huo riypata naw pi tie yi, cacuolikieca a ziytuv tie ta a riy kha paruv’ a yite cawsaazaapuv kha, ‘thiyna taana a thupakhaa tli,’ ta'a yite a hnang ta malie ama dungnapa hing tawtaa ta malie ama dungnapa laata a ruv vie aa,” ama ta.

⁶⁵Pilat ta “A huotuv riypa rieka nama hnyi kha, vaa ungla a pha khu chung ta va pahuo sa tie ung,” a ta yi.

⁶⁶Cacuonakawta cakuo yite thluo khaakhuvlung kha caa ama khe khu taata a phasa pata ama pahuo sa.