Read Lautu Chin Matthai 28 Bible Online

Matthai 28 - Lautu Chin bible

Matthai 28

¹Sabbath khutaa a mawluo Zaapuv ning mawdiychie ta Mary Magdalin hne a hrangpa Mary ca thluo kha mang riypata ama vaa.

²Sungkha puv ta aling a siy te; Abyipa avuoming pakha ca vuoruo taata za cung te thluokhaakhuv kha hnyi te a cunglie aa tu.

³A hmingsuo ca thinghlaa haata cuote a caw ca cahue haata a ngu.

⁴Thluo a huotuv tie ca ama ciy tuv pa khata a siysa yite athiypa ama lu.

⁵Cuorasala avuoming ta canung tie kha, “Ciy kha ung, vieluo lie ama thiepa Zingsuv nama huvpa kha ica pachang yi.

⁶Ama ca hing lie hing aw vyi, a ripa haakhata a thupakhaa tli. A vaw ungla a laanapa hing mang tie ung.

⁷Cakhutaa a catli pata cakuo ungla ziytuv tie kha, ‘Thiyna taa pathu pakhaa pata cuo tli te ata hing nama hmie luo khatana Galilee luo a silu tli, capa lie cana nama va hmung aa, ta ungla va chang tie ung.’ Ica changpa yi hing maw khya ung,” a ta yi.

⁸Cacuonakaw a catlisa pata thluo taa kha kaa yite, ama thlaa a zangpuo amaa lawpuo pata, ziytuv tie chang riypata amaa ruo.

⁹Zingsuv ta tlangkhy a taw yite, “Niema'a lie diena aw mangsue,” a ta yi. A zuchiy yite a phyi kha a paw yite amaa bie.

¹⁰Zingsuv ta, “Ciy kha ung, cakuo ungla i uvnu tie kha Galilee luo si riypata va chang tie ung, capa lie cana ina hmung'a yi,” a ta.

¹¹Canung tie ama kaale nguoluo ning kha thluo a huotuvpa tie chekha ca khypuv chung luo kha vaa yite, hmang chiycuona bangkhuo kha tluobyilepa tie ama va chang.

¹²Tluobyilepa tie ca Judah uvthyi tie hne khata a hmya yite rieka tie kha nawthuv tuokaa a hluvsa pi riypata khue ama khuo.

¹³“Ziytuv tie ta zuo maa hmung chung a vaw yite na a riy kha ama vya paruv, nama ta aa.

¹⁴Hing bie hing muokiy byipa ta a thyi sue kie zaw ma, kiema ta a palung patluo'a pate ruvnaana namaa taw li riypata maca rikuo'a yi,” ama ta.

¹⁵Cacuonakawta tuokaa kha a la yite ama changpa haata ama tue. Capa bie ca Judah ming hrawlie ata ning tepa hingta ama ripa bie ta a cuo.

¹⁶Ziytuv hlyikha ca Zingsuv ta a ripa haakhata Galilee tluo luo kha ama si.

¹⁷Ama kha hmung yite amaa bie, cuorasala chekha ca ama palung a hring.

¹⁸Zingsuv ta a ngie vie yite, “Vuoruo hne alyi lie naw hnyina bangkhuo ca pi pata i cuo tli.

¹⁹Cacuonakawta si ungla mingphang bangkhuo kha naa ziytuv va pacuo sa ungla; A paa, Asaa hne Thlaapa Pathe ming ta tiynawna va pi tie ung;

²⁰cakhutaata ica changpa bangkhuo ama ziy riypata va pacuv tie ung. Hingpa hing maw kha ung, chuozaa ta niema'a lie ica aw puo'a yi, cuo chuona te ta,” a ta yi.[69]