Read Lautu Chin Matthai 3 Bible Online

Matthai 3 - Lautu Chin bible

Matthai 3

¹Ca cuo ning ca tiynawtuv Johan ca Judea ruochung lie kha a vya luo te,

²“Nama suena kha a ngiepachiy ung, tahematapakieca Vuoruo Pena na a ngie tli,” tapata phung a ri.

³Profet Isaiah ta, “Ueryi suokha ca ruochung lie kha u te: ‘Abyipa luopuv kha sapa tie ung, a luopuv kha padang tie ung’” tapata a za ri tiyta Johan hingna a za ta khing hnuochuopa ta a cuo.

⁴Ama ca kala-uv hming ta taapa caw kha a tue te a se lie kha savang tesaw aa saw, a sa ca khawbyapa hne khyitiy ta a cuo.

⁵Jerusalem taa hne Judea pe bangkhuo taa cuose, Jordan cavaa kie khyta bangkhuo taata cawsaa zaw kha ama'a luo ca pya yite,

⁶ama suena kha a phu yite Jordan cavaa lie kha tiy a naw yi.

⁷Cuorasala Johan ta Farasi ming hne Sadusi ming zaw tiy a naw riypata amaa vawpa kha a hmung tiyta, “Pariy ciypathla zaw, a vya tlung riypa Khazing hihaana chung taata a ruo riypata ahungma a raaringna caa pi yi? a ta yi.

⁸Sue a ngiepachiyna hne aa phuvpa hringzya kha hnyi tie ung.

⁹Niema hne niema kha, ‘Malie a sa a vyatuv Abraham na ma hnyi tapata rue kha ung;’ ica chang yi: Khazing ca hing alung chung taahingta Abraham samingsahlaa zaw kha a sa khu yi.

¹⁰Ahryi ca thingkungpa thabaw lie pahlaa pacie pata cuote thyiphaa a pathyi lipa thingkungpa bangkhuo ca hu pata myi chung luo thawpa ama cuo aa.

¹¹Kama ca nama sue a ngiepachiy-napa paluosana ta tiy ta[9] tiy ica naw yi, cuorasala kama laata a le viepapaa ca i hnang taata a vaw'a te kama hing ca a phyipakaw a cyipale riypa tahmuo a tla va ang. Ama ta Thlaapa Pathe hne myi ta tiynawnapa aca pi'a yi. Ama ca kama laata a le vie karaa.

¹²A kuv lie sazinapa pahraa kha a cyi te sa kha a zi diy aa. A chuo ca be luo kha raw'a te asiypa ca a thiy buo lipa myi luo kha a hmaw aa,” a ta.

¹³Capa cuo ning ca Zingsuv ca Galilee taakhata Jordan cavaa luo kha Johan kuv ta tiy a naw riypata aa vaw.

¹⁴Cuorasala Johan ta, “Kama hingna nama kuv ta tiy a naw riypa a cuo ang, nama tlaku ma kama'a luo a vaw ciy?” a ta.

¹⁵Cuorasala Zingsuv ta, “Ata hing ca hinghaahingta cuo thluo se, tahematapakieca a dangna bangkhuo a tlingna riypata hinghaahingta ma tue riypa hing a phapa tana a cuo,” a ta. Cacuonakawta Johan ca a naa a tla.

¹⁶Zingsuv ca tiynawna hmung te tiy chung taata a kya thu pahne ta vuoruo kha sungkha ta a pahaw te Khazing Thlaapa kha thuvruv haata zaa zu te a cunglie a zaa cang pakha a hmung.

¹⁷Vuoruo taata ueryi suokha ta, “Hingpapaa hing i duepa i Saacapaa tana a cuo, a cunglie hing i palung a tling,” a ta.