Read Lautu Chin Matthai 4 Bible Online

Matthai 4 - Lautu Chin bible

Matthai 4

¹Cakhutaa Zingsuv ca Setaa ta pasupaliy riypata Thlaapa ta ruochung luo kha a sikhyi.

²Zingsuv ca ning sawliy hne zuo sawliy chung sa uv te a nang a diy hringhruo.

³Pasupaliytuv ca a vaw te, “Khazing Saacapaa hmisi ta na cuo kieca hingpa alung zaw hing viechuo ta pali tie,” a ta.

⁴Cuorasala Zingsuv ta, “Caapathepa na a ri, ‘Cawsaapa hing sa ta dyi hring'a vyi, cuorasala Khazing ta a ripa bie tana a hring aa,’” a ta.

⁵Cakhutaata Setaa ta Zingsuv kha khypuv pathepa biena-ing a daw lie kha chi te,

⁶“Khazing Saacapaa ta na cuo kieca hingpa taahingta a thawpathla tie, tahematapakieca Caapathepa ta, ‘Khazing ta nama cuo hing ta a avuoming naw pi'a yite, iema ta ama kuv ta ca cawchue'a yite, alung lie na phyi a phaw'a vaciy, a ta kha,’” a ta.

⁷Zingsuv ta, “Caapathepa ta, ‘Na Byipaapa na Khazing kha va dyapasya kha,’ a ta,’” tapata a palie.

⁸Cakhutaata Setaa ta Zingsuv kha a suosapa tluocung luo kiekhyi te chuelyi pena bangkhuo hne a rungnaana bangkhuo kha a pahmung sa.

⁹Setaa ta, “A bung la inaa bie cakieca hingpa bangkhuo hing ica pi aa,” a ta.

¹⁰Zingsuv ta, “Setaa, cakuo buo! Caapathepa ta, ‘Na Byipaapa Khazing kha abie la, ama re dyi kha va hrie tie,’ a ta pakha,” a ta.

¹¹Cakhutaata setaa ta pya se te, avuoming ta sungkha ta a zuv yite ama za mangsang.

¹²Zingsuv ca Johan na ama patuv tapa kha a thyi tiyta Galilee luo kha a si.

¹³Ama ca Nazareth kha thuse te Zebulun hne Naftali pe, riyliy kielie a awpa Kapernaum khy lie kha a aw.

¹⁴Hinghaahingta a tue napa ca profet Isaiah ta,

¹⁵“Zebulun hne Naftali ruo, Riyliy luopuv kie, Jordan cavaa huesuo, Jentail ming ruo Galilee—

¹⁶Zingna chunglie a awpa cawsaa zaw ta, khena lepuv kha ama hmung aa. Thiyna ruo ningdiy rawlie a awpa tie cunglie, khena ca a kya luo tli,” a za tapa kha a tlingna riypatana a cuo.

¹⁷Capa cuo taacata Zingsuv ta, “Nama suena kha a ngiepachiy tie ung, tahematapakieca vuoruo pena na a ngie tli!” tapata phungri hruo a pathu.

¹⁸Zingsuv ca Galilee riyliy kielie a cakuole pata, Simon (Piter ama tapuopa) hne a nuta Andru riyliy lie asue ama vaa nguoluopa kha a hmung yi, tahematapakieca iema ca ngaavaapa tana ama cuo.

¹⁹Zingsuv ta, “Kama hing na ziy tie ung, cawsaa a patuvpa tana ica tue'a yi,” a ta.

²⁰Amaa sue kha thuse paluo yite ama kha ama ziy.

²¹Capa hmang taacata a va cakuo vie pata a hrangpa uvcanu pahning, Zebedi saacapaapa Jeim hne a nuta Johan kha ama paa Zebedi hneta sawkawpalaw chunglie amaa sue ama thyi nguoluo pa khata hmung yite a u yi. Zingsuv ta ku yite,

²²ama sawkawpalaw hne ama paa kha thuse paluo yite ama kha ama ziy.

²³Zingsuv ca Galilee ruochung bangkhuo kha tlaw te, apungna-ing lie kha a pacuv yi, vuoruo pena thuophaabie kha chang yite pasanapa phangphang a angpa tie kha a patluo sa yi.

²⁴Cacuonakawta a thuohlaa ca Siria ruochung ting khata pathuo te, a pasapa bangkhuo kha ama'a luo ama vya chiykhyi, pasana phangphang ta a pasapa tie, khuevuo ta a tuepa tie, siy te a thiychiethepa tie, hne a pakyapa tie bangkhuo kha a patluo sa diy yi.

²⁵Galilee, Dekhapolis, Jerusalem, Judea, hne Jordan cavaa huesuo luo ruo taata cawsaa hluvpuv khata ama ca ama ziy.