Read Lautu Chin Matthai 5 Bible Online

Matthai 5 - Lautu Chin bible

Matthai 5

¹Zingsuv ta cawsaazaapuv kha a hmung tiy yi ta tluocung luo kha kie te aa tu khu taata ziytuv tie kha ama'a luo amaa vaw.

²Bie ri kha pathu te a pacuv yi:

³Thlaapa luota a siy a pasapa tie ca thluechiypa tana ama cuo, tahema-tapakieca vuoruo pena ca iema huopa tana a cuo.

⁴Ngiechi pacuorung pata a caapa tie ca thluechiypa tana ama cuo, tahematapakieca Khazing ta ama hnaa a panguo'a yi.

⁵A nang a nepa tie ca thluechiypa tana ama cuo, tahematapakieca alyi ru na ama cu aa.

⁶A dangna kha nangdiy tiyhriepa haata a khingpa ca thluechiypa tana ama cuo, tahematapakieca ama khingna kha patling sapa ama cuo aa.

⁷Nangduena a hnyipa tie ca thluechiypa tana ama cuo, tahema-tapakieca Khazing ta iema kha nang a due ra'a yi.

⁸A palung a pathepa tie ca thluechiypa tana ama cuo, tahematapakieca Khazing na ama hmung aa.

⁹Arena a tuepa tie ca thluechiypa tana ama cuo, tahematapakieca Khazing ta i saata a ta'a yi.

¹⁰A dangnapa kawlieta hrisaa-thieruena a angpa ca thluechiypa tana ama cuo, tahematapakieca vuoruo pena ca iema huotana a cuo.

¹¹Kama kawlieta cawsaa ta ca pachie yite, ca hrisaathierue yite, a pha lipa a phangphang kha aa hmuo lipa ta aca thawsue kie yi ca thluechiypa tana nama cuo.

¹²Nama palung tluo sala nama thaa pha se, tahematapakieca vuoruo lieta nama lawmuo a lesa aa. Hinghaahingtana niema hluo taapa profet tie zaw kha za ese yite ama za hrisaa.

¹³Niema ca chuelyi paciy tana nama cuo. Cuorasala paciy ca a iena kha a vie kieca tuokhaatama pa-ie sa pakhaa khu pata a cuo aa? Thlahnena a hnyi li tli nakawta thaw pata tlawpuo riypa dyina a cuo tli.

¹⁴Niema ca chuelyi khena tana nama cuo. Tluocung lie tlapa khypuv ca khaapatahmuo pakhuo khu vyi.

¹⁵Ahunghmuo myi-ing ama vuo tiyta beke khaakhung buo vayi. Cuorasala myivuona cunglie kha khang yite ingchung bangkhuo kha a khe diy.

¹⁶Cahaa cata nama khena ca cawsaa hmielie kha khe se; tahematapakieca hmangpha nama tuepa kha hmung'a yite vuoruo lie nama Paa ming kha ama pathuosa aa.

¹⁷Moses phungbie hne profet tie pacuvnapa kha para riypatana aa zuv tapata na rue kha ung. Para riypata a zuv va ang, patling sa riypa tuv tana i zuv.

¹⁸Biehmisi tana ica chang yi: Alyi hne vuoruo a ra hluo li phungbie lie a cawcepa caasuo suokha[10] a cuo zaw, phungbie chung taata ra'a vayi, a bangkhuo ta a tling diy hluo li ra'a vayi.

¹⁹Cacuonakawta ahungtahmuo cuose phungbie chunglie a cawcepa suokha kha ziy li pata para te malie zaw kha cahaa cata a pacuv kie yi ca ama ca vuoruo pena chunglie a cawcepa ta a cuo aa. Cuorasala ahunghmuo cuose phungbie kha ziy te malie zaw kha cahaa cata a pacuv kie yi ca vuoruo pena chunglie a lepa ta a cuo aa.

²⁰Ica chang yi: phungbie saya tie hne Farasi ming laa hingta namaa dang vie li kieca vuoruo pena chung luo a ngie khu'a va ungciy.

²¹Hluo ningta ca, “Lie va naw kha; lie a nawpa ca bieripana na a ang aa,” ama za ta pakha nama thyi.

²²Cuorasala kama ta ca: a uv a nu, a sieta cunglie a hi a haapa ca bieripana kha nama ang aa; a uvta a nuta, a sieta kha, siysaa ri li pata a esepa ca bieripana zung luo chiykhyi pata cuo'a ung cate, a uv a nu, a sieta kha, ‘a ngaapa,’ a tapa ca hell[11] myi chung luo tla riypata aa tlapa nama cuo aa,” a ta.

²³Cacuonakawta nama lasaw kha bienatluophie lie nama pi tiyta, na uv na nu, na sieta pakhakha ta na cunglie a palung a tling lipa kha naa thyi kieca

²⁴na lasaw kha bienatluophie hmielie chi siy la a catli pata cakuo la na uvnu, na sieta hne a rena kha va tue tie. Cakhutaacata vya kaa la na lasaw kha Khazing ca pi tie.

²⁵Tazaa caa cyipa hneta bieripana zung luo nama vaale ning khata ama kha a rena tue tie. A cuo li kieca tazaa caa cyi pata bieribyi kuv cung luo, bieribyi ta paliy zung luo ca chiykhyi'a te thaw pathla pata na cuo aa.

²⁶Biehmisi tana ica chang yi: lu riypa bangkhuo na lu diy hluo li thawchung taata pya'a vaciy.

²⁷Nungvaathingsuena tue kha ung ama ta tawpa ca nama pachang.

²⁸Cuorasala kama ta ca: canung pakha kha suehnekhingna pathiypalung hne a mangpa ca a palung chunglie ta nungvaathingsuena kha capa nung hne cata a tue tli.

²⁹Cacuonakaw na cacuo ming ta aca pasue sa kieca, cakhyi la thaw tie; na pangpa palang ta hell luo tlapa laa taca na pangpa chebuo suokhakha naa sungpa ca a pha vie.

³⁰Na cacuo kuv ta aca pasue sa kieca, te la thaw tie. Na pangpa palang ta hell luo tlapa laa taca kuvphyi suokhakha a sungpa ca a pha vie.

³¹Ahunghmuo cuose a napuv ama kieca manapa caa pacyi se, tapata ripa a cuo hyi.

³²Cuorasala kama taca hinghaahingta ica chang yi: Capaa ta a napuv kha capaa hrangpa hne suena kawlie ta li pata a hrangpa kawlieta a ma kieca a ama kha nungvaathingsuena a patue sapa ta a cuo, capa nung a hlawpapaa zaw kha nungvaathingsuena a tuetuv ta a cuo ra.

³³“A hmuo li pata chie a sa'a va ungciy, cuorasala Abyipa'a lie nama tue ciepa biekuona kha patling sa tie ung,’ tapata hluo ningta ama za ripa kha nama thyi.

³⁴Cuorasala ica chang yi: Chie a sa kha ung; vuoruo ming caba pata chie a sa kha ung, tahematapakieca Khazing a tuna tana a cuo.

³⁵Alyi ming caba pata chie a sa kha ung, tahematapakieca Khazing phyi pathlana tana a cuo. Jerusalem ming caba pata zaw chie a sa kha ung, tahematapakieca siepahruolepa awna khypuv tana a cuo.

³⁶Nama luv nama puo caba pata zaw chie a sa kha ung, tahematapakieca nama suobuv buvkha hmuota nama paruo sa khu li pahaata pavaw sa khu va ungciy.

³⁷‘A cuo,’ ‘Cuovyi,’ tapa dyi kha ri tie ung, hingpa laa hingta a hlyipa bangkhuo ca a pha lipapaa'a taata a vawpa tana a cuo.

³⁸“Ming cuota ming, haa cuota haa, tapata ama ripa kha nama thyi.

³⁹Cuorasala ica chang yi: phalina a tuepa kha thlu ri kha ung. Cuorasala cawsaa pakhakha ta na cacuo luo be aca tung kieca, kuo kha luo kha va chawpa vie tie.

⁴⁰Na buohryi a khing nakawta tazaa aca cyi kieca, na buohryicungle zaw kha pi chiy vie tie.

⁴¹Cakhutaata pakhakha ta hruohra li pata kilometer suokha aca cakuo sa kieca, kilometer suohning te khata va cakuo tie.

⁴²Chechiy caa hiepa kha va pi la; du caa cyipa kha va thlu kha.

⁴³“Nama viesaa kha due ungla nama carie kha hue tie ung, ama za ta tawpa kha nama thyi.

⁴⁴Cuorasala kama taca hinghaahingta ica chang yi: Nama cariepa tie kha due ungla caa hrisaathieruepa tie cuo khata thlaa chuo tie ung;

⁴⁵cahaacatana vuoruo lie a awpa nama Paa saata ta nama cuo aa. Tahematapakieca ama ca cawsaa chiepa hne cawsaa phapa cunglieta ning kha pachiy sa kaluo te, aa dangpa hne aa dang lipa cunglieta kha khy a pasaa sa kaluo.

⁴⁶Caa duepa dyi nama due kieca khaapa lawmuo ma nama hmung aa? Ngukhyituv tie tahmuo cahaa cata ama tue ra cuo vama?

⁴⁷Na uvnu hne na sieta zaw dyi kha bie naa chang kie yi ca, malie laata namaa nanang vie napa a aw ma? Khazing a bie lipa tie hmuo cahaa cata ama tue ra cuo vama?

⁴⁸Vuoruo lie a awpa nama Paa a tling pahaata niema zaw a tlingpa cuo ra tie ung.