Read Lautu Chin Matthai 6 Bible Online

Matthai 6 - Lautu Chin bible

Matthai 6

¹Biena luota hmangpha nama tuepa kha malie ta na hmung naaseyi tapata zaapuv hmielieta va tue kha ung. Cahaa cata nama tue kieca vuoruo lieta a awpa nama Paa'a taata lawmuo khaahmuo hmung'a va ungciy.

²Cacuonakaw hmangpha nama tue tiyta phahruocuo tie ta cawsaa malie pathuosa naaseyi tapata apungna-ing hne azaa luopuv lie hmyakaa tung yite ama tuepa haata tue kha ung. Biehmisi tana ica chang yi, iema ca ama lawmuo kha ama hmung diy tli.

³Cuorasala niema ca hmangpha nama tue tiyta nama cacuo luo kuv ta a tuepa kha nama cavyi luo kuv tahmuo a pachang li riypata va tue tie ung.

⁴Cahaa cata a paruv ta nama tuepa a hmungtuvpa nama Paa khata nama lawmuo kha aca pi'a yi.

⁵Thlaa nama chuo tiyta phahruo a cuo pakhipa tie kha lu kha ung. Iema ca cawsaa ta malie hmung naaseyi tapata luopuv a tawna lie hne apungna-ing lie a daa pata thlaa chuo kha ama tlechuo sa. Biehmisi tana ica chang yi: iema ca ama lawmuo kha ama hmung diy tli.

⁶Cuorasala thlaa nama chuo kieca nama khuo luo a ngie ungla, ingchiy kha khaa ungla, ming ta hmung khu a aw lipa nama Paa'a luo kha chuo tie ung. A paruv ta nama tuepa a hmungtuv nama Paa ta nama lawmuo kha aca pi'a yi.

⁷Thlaa nama chuo tiyta Jentail ming ta bie a hluvsa ma ri kieca malie a thyi thlu aa tapata siyluo a hnyi lipa bie a syisa ama ripa haakhata thlaa chuo kha ung.

⁸Iema ca va lu lie ungciy, tahematapakieca nama Paa ta nama hie hluo ta khaapama namaa hu tapa kha a pachang diy tli.

⁹Cacuonakaw hinghaahingta thlaa chuo tie ung: Vuoruo lie a awpa ma Paa, Na mingpathepa ca pa-uvsathyi pata aw mangsue.

¹⁰Na pena tlung paatie se; Vuoruo lie haata alyicung lie na khingnapa tling paatie se.

¹¹Ningting ta maa hupa sa ca ata ning zaw malie pi tie.

¹²Malie ta ima cunglie ama sue ningta maa ngiethepa haayita, Ma suenapa kha malie a ngiethe ra tie.

¹³Pasupaliyna luo malie pachiy sa li pata, A pha lipa chung taata malie khuo tie.[12]

¹⁴Malie ta nama cung lie ama tuepa suena kha namaa ngiethe kieca, vuoruo lie a awpa nama Paa ta niema zaw acaa ngiethe ra'a yi.

¹⁵Cuorasala malie kha namaa ngiethe li kieca niema suena zaw kha nama Paa ta caa ngiethe ra'a vayi.

¹⁶Sa namaa uv tiyta phahruocuo tie haata nama hmiephya a pachie sa kha ung. Sa amaa uvpa kha cawsaa ta malie pachang naaseyi tapata ama hmiephya kha amaa pachie sa. Biehmisi tana ica chang yi: iema ca ama lawmuo kha ama hmung diy tli.

¹⁷Sa namaa uv tiyta nama hmie kha a siy ungla nama luv zaw kha sathu a thuv tie ung,

¹⁸tahematapakieca sa namaa uvpa kha malie ta ca pachang lipa yi ta hmung khu lipa nama Paa kyalya ta aca pachang'a yi. Cahaa cata a paruv ta nama tuepa a hmungtuv nama Paa ta nama lawmuo kha aca pi'a yi.

¹⁹Thinghlaa ta ning te a pabung khunapa hne a se ta ce te a ra khunapa, a ruvhangpa ta a paruv khunapa alyi lieta nama suethiy kha pacung kha ung.

²⁰Thinghlaa ta ning te a pabung khu linapa hne a se ta ce te a ra khu linapa vuoruo lieta nama suethiy kha pacung tie ung.

²¹Tahematapakieca nama sue a awna lie khana nama pathiypalung zaw a aw ra aa.

²²Ming ca pangpa cuota myi-ing tana a cuo. Cacuonakawta na ming a pha kieca nama pangpa ca a khe diy aa.

²³Cuorasala na ming a pha li kieca na pangpa ca zingna chunglie tana a aw aa. Cacuonakaw na chunglie a awpa khena ca zingna ta a cuo sue kieca capa zingna ca a zing suesaapa a cuo aa.

²⁴Ahungtahmuo byi pahning re hriepa pakhaw the'a vyi; pakha kha due'a te a hrangpa pakha kha a hue aa, pakha'a lie kha zangtluo aa tla pata aw'a te a hrangpa pakha kha siysaa ri li pata a aw aa. Khazing re hne hnyirungna re ca hrie pakhaw the'a va ungciy.

²⁵Cacuonakawta ica chang yi, “Ning riy dang riypa kawlie cuose, nama pangpa hne abuv-ase riypa kawlie cuose, ningting hringna kawlieta nama palung rie thyi kha se. Hringna ca sa laata biepuv vie te pangpa ca cawsie laata a biepuv vie cuo vama?

²⁶Pavaa zaw hing mang tie ung: saciy vaa vayi, sa zaw la yite be luo raw vayi. Cuorasala vuoruo lie a awpa nama Paa ta ama riy a pabi thluo yi. Niema ca pavaa laata nama sungnaa vie karaa cuo vama?

²⁷Nama palung rie a thyi nakawta nama hringnapa siymaluo pakha chuo a pasyi sa vie khupa pakha chuo nama aw ma?

²⁸Cacuonakaw khaapanakawma cawsie kawlie nama palung rie a thyi? Ruo lie paapaapa khiy pacuo tie ung, tuokhaatama ama lethaw, re hrie vayi, cawsie cuota palaa hrie vayi.

²⁹Ica chang yi, Siepahruo Solomon khahmuo, khatluv kha ta a hnyirung raalaa pa khata a hnyirungna hne a cawsie kha hingpa paapaapa paakha puvthenapa tluv hing ta vyi.

³⁰Ata ning hring te mawluo myi chung luo hmaw riypa, ruo lie aphuv kung zaw hmuo a pangituv Khazing ta niema changchiy ca ca pangi li pata aca aw'a yi ma? Nama zangna hing a caw hringhruo de!

³¹Cacuonakawta, ‘Khaapama ma ning aa? khaapama ma dang aa? Khaapama maa tue aa?’ tapata nama palung rie thyi kha se.

³²Hingpa hing ca Khazing a zang lipa tie ta ama palung rie a thyikhyi tawpa tana a cuo. Vuoruo lie a awpa nama Paa ta hingpa bangkhuo hing namaa hu diy tapa kha a pachang.

³³Cacuonakawta Khazing pena hne aa dangna kha huv taa ungla hmanghrangpa bangkhuo zaw hing aca pi puo ngiethie'a yi.

³⁴Cacuonakaw mawluo cuota nama palung rie thyi kha se, mawluo ta ama cuota a palung rie thyi thluo se. Ata ning'apa ruvnaana hing ata ning cuota aa de.