Read Lautu Chin Matthai 7 Bible Online

Matthai 7 - Lautu Chin bible

Matthai 7

¹Nama zaw bie ripa pa na cuo li riypata malie bie kha va ripa kha.

²Tahematapakieca malie bie na ripa pa haakhata nama zaw bie ripa pata na cuo aa. Malie cuota nama na hmuopa panangna khata na nama zaw panangpa ta na cuo aa.

³Na ming chunglie thingtung hmuo siysaa ri li pata tuokhaatama na uvnu ming chunglie mingbuo kha na mang?

⁴Na ming chunglie thingtung a aw pata tuokhaatama na uvnu ca, ‘na ming chunglie mingbuo kha ca lapa'a ang,’ na ta the?

⁵Nama, phahruo a cuopa, nama ming chung taata thingtung kha thuepathla taa lamuo na uvnu ming chunglie mingbuo thue riypa kha siephele khata na hmung the'a ta.

⁶A pathepa hmang kha uv va pi kha ung. Nama lungvaa kha va hmielie va thaw kha ung. A phyi ta a chaapuo khu taata caa vya palichiy'a te a ca sie'a yi.

⁷Hie ungla pi pata nama cuo aa; huv ungla nama hmung aa; cakhaw ungla ingchiy kha aca pahaw'a yi.

⁸Tahematapakieca a hiepa bangkhuo ca pipa cuo'a yite, a huvpa bangkhuo ca ama hmung aa, a cakhawpa bangkhuo ca ingchiy kha pahaw pata ama cuo aa.

⁹Nama saata ta viechuo acaa hiepa yi ta alung a pipa pakha chuo nama aw'a ma?

¹⁰Ngaa acaa hiepa yi ta pariy a pipa pakha chuo nama aw'a ma?

¹¹Niema a pha lipa tie ta nama saata kha tuokhaatama hmangphapa i pi aa tapa nama pachang kieca, vuoruo lie a awpa nama paa changchiy taca ama'a lie a hiepa tie kha hmangphapa khatluv tama a pi'a yi?

¹²Malie ta ima cunglie vya tue yi se tapata nama khingpa haakhata malie cunglie kha va tue tie ung. Ama cana phungbie hne profet tie pacuvna ta a cuo.

¹³Chiypakaa baata taakhata a ngie tie ung. Tahematapakieca rana luo a sipa chiypakaa ca ku te a luopuv zaw a na,[13] a ziypa zaw ama hluvsa.

¹⁴Cuorasala hringna luopuv a sipa chiypakaa ca baa te a luo zaw a ruv, a hmungpa cawsaa zaw ama cawta.

¹⁵Profetpakhipa tie kha a raaring tie ung. Tuv vang a buv pata niema'a luo a vaw yite, cuorasala ama chung luo ca cahnie a hruopa na ama lu.

¹⁶Iema ca ama thyipaa kha mang ungla nama pachang aa. Ahling kung taata mingsuv thyi ama lu buo ma? Saakuvmuokalaw kung taata thyikuv ama lu buo ma?.

¹⁷Cahaangiethiecata thingkung phapa ta thyiphapa pathyi te thingkung pha lipa ta thyiphalipa a pathyi.

¹⁸Thingkung phapa ta thyiphalipa pathyi vyi, thingkung pha lipa ta thyiphapa pathyi ra vyi.

¹⁹Thyiphapa a pathyi lipa thingkung bangkhuo ca hu pata myi luo thawpa a cuo aa.

²⁰Cahaa cata profetpakhipa tie ca ama thyipaa khata nama pachang aa.

²¹“Abyipa, Abyipa naa tapa bangkhuo vuoruo pena chung luo a ngie diy'a vayi, cuorasala vuoruo lie a awpa i Paa khingna a tuepa dyina a ngie aa.

²²Capa ning thue ca cawsaa hluvpuv ta, ‘Abyipa, Abyipa! na ming ta Khazing thuophaabie ma za ri, na ming ta khuevuo zaw za papya yi pate, na ming ta kharuehaa hmang zaw ma za tue cuo vama?’ ama ta aa.

²³Catiyta kama ta, ‘Ca pachang buo vayi ang. Cakuo ung, cawsaa pha lipa zaw, i ta'a yi,’ a ta.

²⁴“Cakhutaata i bie hing thyi te a ziypa ca alung cunglie ing a sapa cawsaa singpapaa haatana a cuo.

²⁵Khy a saa, tiy a le, thliy khuopuv ta a vya hruo te capa ing ca a nuo tiyta alung cunglie sapa a cuo nakawta a lie vyi.

²⁶I bie thyi raalaa te a ziy lipa ca viehnang cunglie ing a sapa a ngaapapaa haatana a cuo.

²⁷Khy a saa, tiy a le, thliy khuopuv ta a vya hruo te a nuo ca capa ing ca a lie te, a ra patlaa diy,” a ta.

²⁸Zingsuv ta hing bie palang a ri khu taata cawsaazaapuv ca a pacuv na zya kha ama kharue a haasa,

²⁹tahematapakieca phungbie saya tie haakhata cuo li pata nawhnyituv tie haakhata a pacuv yi.