Read Lautu Chin Matthai 8 Bible Online

Matthai 8 - Lautu Chin bible

Matthai 8

¹Zingsuv ca tluocung taakhata za cung te cawsaa hluvpuv ta ama ziy.

²Caahminghmaa[14] a phyapa pakha a vaw te a hmielie a pakhuv pane te, “Abyipa, na khing kieca ina pathe sa khu ciy,” a ta.

³Zingsuv ta a kuv pazuo te a hrie, “I khing. Pathe tie,” a ta. Capapaa ca a pasana taata sungkha ta a tluo.

⁴Cakhutaa Zingsuv ta, “Ahunghmuo chang kha yi, cadyiseca tluobyipa'a luo kha vaa la vaa pahmung sa tie, cakhutaa cawsaa hmiekunglie i tluo tli tapa paluosana ta Moses ta tue riypa a tapa hriykhungrina kha tue tie”, a ta.

⁵Zingsuv ca Kapernaum khy luo a vaa ngie ning kha riebyi pakha ta a vya taw te,

⁶“Abyipa, i changtaapa pakha ca pakya te a pasa a ruv hringhruo nakawta ing liena a laa thluo,” a ta.

⁷Zingsuv ta, “A vaw'a ang te i patluo sa aa,” a ta.

⁸Riebyipa ta, “Abyipa, kama ca i ingchung luo nama a vaw riypata a tla va ang. Cuorasala na ryi kaakha na pathlie kieca i changtaapa ca a tluo aa.

⁹Kama zaw hing Abyi le viepa rawlie a awpa i cuo pahaata, i rawlie rieka i hnyi ra. Pakha kha, “Cakuo,” i ta kie cakuo te, a hrangpa pakha kha, “A vaw,” i ta kieca aa vaw; cakhutaa i sii kha, “Hingpa hing tue,” i ta kieca a tue,” a ta.

¹⁰Zingsuv ta capa bie ca a thyi tiyta a nang-uosa te a ziypa tie kha, “Hinghaapa zangna a hnyipa Israel ming pakha hmuo hmung buo va ang.

¹¹Biehmisi tana ica chang yi: hinghaapaapa zangna hing Israel ming chunglie hmuota hmung va ang. Ica chang yi, ningchiy ningtla taata cawsaa hluvpuv ca a vaw'a yite, vuoruo pena chunglie kha Abraham, Isak, Jakob zaw hneta sa ama ning pakhaw nguoluo ning kha

¹²vuoruo pena a cu riypa tie tlaku kha ale khyzingna luo thawpa ta cuo'a yite, ama lie kha caa yite ama haa ama rie aa,” a ta.

¹³Cakhutaa Zingsuv ta riebyipa kha, “Cakuo tie; na zangna haata na cuota tuepa cuose,” a ta. Riebyipa changtaapa ca capa cuo lie cata a tluo.

¹⁴Zingsuv ta Piter ing luo kha a ngie ca, Peter piynung ca luvce ta za pasa te iehmang lie aa zie pakha a hmung.

¹⁵A kuv kha hrie te, a nge lingpa kha tluo te, thu te ama kha a mangsang.

¹⁶Capa zuoluo cata khuevuo ta a tuepa cawsaa a hluvpuv kha ama'a luo ama vya chiykhyi. A ryi kaakha ta thlaapa kha papya diy te a pasapa bangkhuo kha a patluo sa yi.

¹⁷Hingpa hing profet Isaiah ta, “Ama ta ma tluo linapa kha la te ma pasana zaw kha phya te a sikhyi,” a tapa a tlingna riypata a cuo.

¹⁸Zingsuv ta a thaalie cawsaa hluvpuv kha a hmung tiy yi ta, riyliy huesuo luo vaa riypata a chang yi.

¹⁹Phungbie saya pakha a vaw te, “Saya, na sina bangkhuo tana ica ziy aa,” a ta.

²⁰Zingsuv ta, “Cahnie zaw ta khue hnyi yite pavaa zaw ta buv ama hnyi, cuorasala Cawsaa Saacapaa ca luv china hmang hmuota hnyi vyi,” a ta.

²¹Ama a ziytuv a cuopa a hrangpa pakha ta, “Abyipa, kaa'a ang te i paa kha va paby taa thi'a ang,” a ta.

²²Zingsuv ta, “Na ziy tie, a thiypa tie khata ama'a thiypa ca paby thluo yi se,” a ta.

²³Zingsuv ca sawkawpalaw luo kie te ziytuv tie ta ama paziy.

²⁴Thliychie khuopuv ta a vya hruo te sawkawpalaw ca tiylaw ta buvkhung aa nang, cuorasala Zingsuv ca aa hmung.

²⁵Ziytuv tie ta vaa yite ama pathu. “Malie khuo tie, Abyipa! vuotaa ma thiy diy'a nang hing” ama ta.

²⁶Zingsuv ta, “Zangna diydyapa zaw, Khaapanakawma nama thlaa a zang?” a ta yi. Cakhutaa thu te thliy hne riyliy kha a chuo ca nesiyliy khata ama die.

²⁷Ama kharue ta haa te, “Tuokhaapa cawsaa ma a cuo ryarya, thliy hne riyliy tahmuo a ri amaa ngie,” ama ta.

²⁸Zingsuv ca riyliy huesuo Gadara ama tapa ruo luo kha a va chiy tiyta khuevuo ta aa hryipa cawsaa pahning ca thluo taata kya pya yite ama kha amaa taw. Hingpa tie hing ciy amaa chiysa nakawta capa luopuv ca ahungtahmuo ziy nguo vayi.

²⁹Sungkhapuv ta khi yite, “Khazing Saacapaa, tuokhaama malie na tue khing? A cuo aa de hluo tama kiema riethyi pi riypata naa vaw,” ama ta.

³⁰Iema'a taata a hla lina hmang lie va a hluvpuv kha ama tle nguoluo.

³¹Khuevuo tie ta Zingsuv kha paakie yite, “Malie na papya kieca va chung luo hue malie pangie sa thi tie,” ama ta.

³²Zingsuv ta, vaa ung! a ta yi. Cacuonakaw pya yite va chung luo ca ama vaa ngie. Va bangkhuo ca lungkuo taata riyliy chung luo a zupathla yite tiy lieta ama thiy diy.

³³Va a khiepa tie ca khychung luo kha a ruo yite khuevuo a hnyipa cunglie a cuopa bangkhuo kha ama va chang.

³⁴Cacuonakaw khychung taata cawsaa bangkhuo kha Zingsuv a taw riypata pya yite, ama hmung ca, ama ruo taata pya riypata paa ama kie.