Read Lautu Chin Matthai 9 Bible Online

Matthai 9 - Lautu Chin bible

Matthai 9

¹Zingsuv ca sawkawpalaw chung luo kha kie te riyliy kha va te pakhaa te a khy luo kha a pha.

²A pakyapa pakha kha a pangphaa hne a vya puvle yite amaa luo amaa vaw khyi. Zingsuv ta khatluv tama ama zang tapa kha a hmung tiy yi ta a pakyapapaa kha, “I sapaa, na palung a cahra sa, na suena ca a ngiethe pata a cuo tli,” a ta.

³Cakhutaa phungbie saya tie chekha ta iema hne iema kha, “Hingpapaa hing Khazing ese patana bie a ri,” amaa ta.

⁴Cuorasala Zingsuv ta khaapama ama rue tapa kha a pachang nakawta, “Khaapanakawma hmang pha lipa ca nama rue?

⁵“Na suenapa ca a ngiethe pata na cuo tli,” tapa ma a na vie, a cuo li kie, ‘Thu la cakuo tie,’ tapa ma?

⁶Cuorasala Cawsaa Saacapaa ta hing chuelyi lie hing sue a ngiethe khuna naw a hnyi tapa kha nama pachang the na riypatana a cuo ta te a pakyapapaa kha, “Thu, na pangphaa kha a la lah ing luo cakuo,” a ta.

⁷Cawsaapapaa ca thu te ing luo a cakuo.

⁸Cawsaazaapuv ca ama kha ama hmung tiyta, ama nang ta uosa te, cawsaapa zaw'a lieta hinghaapa nawhnyina a pipa Khazing kha ama pathuosa.

⁹Zingsuv ca a vya cakuole pa khata Matthai ama tapapaa ngukhyina zung lie aa tu nguoluo pakha hmung te, “Na ziy tie,” a ta. Matthai ca thu te ama kha a ziy.

¹⁰Cakhutaata sa ning riypata ingchung lie aa tu ning kha, ngukhyituv hluvpuv, hne a suepa tie kha a vaw yite Zingsuv hne ziytuv tie'a lie kha amaa tu ra.

¹¹Farasi tie ta ama hmung ca ziytuv tie kyihuo khata, “Khaapanakawma nama sayapa hing ngukhyituv tie'a nata a suepa zaw hneta sa a ning?” ama ta.

¹²Zingsuv ta a thyi tiyta, “A tluopa cawsaa ca siybyi a hu vayi, a pasapa dyina a hu yi, a ta.

¹³Cakuo ungla, ‘Hriykhung a rina laata cawsaa nangdue thena khana i khingpa ta a cuo,’ a tapa Caapathepa bie ta a ri khingna kha va rue tie ung. Cawsaa aa dangpa ku riypata a vaw va ang, a suepa ku riypatana i vaw,” a ta.

¹⁴Cakhutaata Johan a ziytuv tie kha Zingsuv'a luo a vaw yite, “Khaapanakawma kiema hne Farasi ming hing sa maa uv lawmaw pata nama caa ziytuv tie hing sa uv li pata ama aw?” ama ta.

¹⁵Zingsuv ta, “Nungchiyna pyi luo kupa tie ca napuv a chiytuvpapaa iema'a lie a aw kalie chung ca ngiechi pata ama aw the'a ma? Nung a chiytuvpapaa kha iema'a taata aa chena cuo kha vya tlung'a te cathue cata sa kha ama uv thluo'a lie.

¹⁶Ahungtahmuo cawhlungpa kha cawthaapa ta abie thla buo vayi, a pangbie khata tlaa khyi hryly'a te a khue kha a ku hryly aa.

¹⁷Cahaa cata savang ungthyi hlungpa chung luo kha mingsuv tiy ahrang raw buo vayi, ama raw kieca savang kha kyi'a te mingsuv tiy kha a zuv diy aa, savang ungthyi zaw a ra diy puo aa. Calaacata savang thaapa chung luo kha mingsuv tiy ahrang ama raw kieca a suohning ta amaa bang hne aa,” a ta.

¹⁸Zingsuv ta capa bie iema'a lie a ri nguoluo ning kha apungna-ing[15] uvthyi pakha a vaw te, a hmiekunglie kha a pakhuv pane te, “Ata bala hingna i sacanungnung a thiy, cuorasala a vaw la a cunglie na kuv na khang kieca a tluo aa,” a ta.

¹⁹Zingsuv ca thu te ziytuv tie hne khata ama kha ama paziy.

²⁰Capa ning cata kung hraa hlyihning chung thiylang pasana ta a pasapa canungnung pakha ca Zingsuv hnang luo taakhata a vaw te a pangpeta kha a taw.

²¹Amaa na ama ta, “a pang hing i taw khu kieca i tluo aa,” aa ta.

²²Zingsuv ca a vya pali te capa nung ca a hmung. “I sacanung, na palung a cahra sa, na zangna na caa patluo,” a ta. Capahnecata canungnung ca a tluo.

²³Zingsuv ca Judah ming uvthyipapaa ingchung luo kha a ngie tiyta khang hne daa hne tung yite cawsaa amaa kalaa patlawpa kha a hmung ca,

²⁴“Pya diy ung, hingpa haatiynung hing thiy vyi, aa hmung nguoluo,” a ta. Ama bangkhuo ta ama pahnyisue.

²⁵Cuorasala cawsaa ama pya diy pahne ta Zingsuv ca haatiynung khuo luo kha a ngie te, a buo ta va patuv te a kya thu.

²⁶Capa thuohlaa ca a cahriy ruo bangkhuo ta a pathuo diy.

²⁷Zingsuv ca capa hmang taacata pya te a cakuole pa khata mingcuepa pahning ta vya paziyle yite, “David Saacapaa, ngie malie chi thi tie,” ta yite ama khi.

²⁸Zingsuv ca ing chung luo a ngie tiyta mingcuepa pahning ca ama'a luo kha amaa vaw. Zingsuv ta, “Kama hingta ica patluo sa khu yi tapata nama zang ma?” a ta yi. “Abyipa, ma zang,” ama ta.

²⁹Zingsuv ta ama ming kha hrie te, “Nama zangnapa haata cuose!” ta yite,

³⁰ama ming ca a vuo pakhaa. Zingsuv ta, “Hingpa kaw hing ahunghmuo pachang sa'a va ungciy,” ta te iema kha a cusa pata a thlu yi.

³¹Cuorasala cakuo yite Zingsuv thuohlaa kha capa pe bangkhuo khata ama pathyi.

³²Iema ama cakuo khu taata khuevuo a hnyi nakawta bie a ri the lipa pakha kha Zingsuv'a luo amaa vaw khyi.

³³Khuevuo a papya khu pahne ta, cawsaapapaa ca bie a ri khu. Cawsaa bangkhuo ama kharue ta haasa te, “Israel ming chunglie hinghaapa hmang hing hmung buo va puv,” ama ta.

³⁴Cuorasala Farasi ming ta, “Khuevuo tie byipa ming tana khuevuo a papya khu,” ama ta.[16]

³⁵Zingsuv ca khypuv khyta bang-khuo kha tlawle te, apungna-ing chunglie kha vuoruo pena thuophaabie kha pacuv yite, pasanapa phangting ta a pasapa zaw kha a patluo sa yi.

³⁶Cawsaazaapuv kha a hmung tiy yi ta iema cunglie kha kawpacuona a hnyi, tahematapakieca khietuv a hnyi lipa tuv haata riethyi vuosuo pata ama aw nakawta a cuo.

³⁷Cacuonakaw ziytuv tie kha, “Sa hrie riypa a hluvsa a aw raalaa pata a hrietuv ca a cawta dyina a aw yi;

³⁸cacuonakaw sa hrie riypa a hnyituv Abyipa'a luo kha sa a hrietuv a hluvsa a za pathlie riypata thlaa chuo tie ung,” a ta.