Read Lautu Chin Marka 1 Bible Online

Marka 1 - Lautu Chin bible

Marka 1

¹Khazing Saacapaa[1] Zingsuv Khrih thuophaabie a pathanapa ca hinghaahingta a cuo.

²Profet Isaiah ta, “Mang tie, i tluo-utuv ca niema cuota luo salu riypata, nama hmie luo i pathlielu aa;

³ueryi suokha ca ruochung lie kha u te; ‘Abyipa cuota luopuv kha sa tie ung; a ziy riypa luo ca padang tie ung!’” a tapa haakhata a cuo sasaw.

⁴Tiynawtuv Johan ca ruochung lie kha vya pya te sue a ngiethena riypata a ngiepachiyna hne aa patuvpa tiy a nawna kaw kha a u khyi.

⁵Judea pe khyta bangkhuo taa hne Jerusalem khypuv taata cawsaa bangkhuo ca Johan'a luo kha vya pya yite ama suena a phu yite Jordan cavaa lie kha tiy a naw yi.

⁶Johan ca kala-uv hming ta ama taapa caw kha a tue te a se lie kha savang tesaw aa saw, khawbyapa hne khyitiy kha a ning.

⁷Cawsaazaapuv kha, “Kama laata hmang a tue khu vie papaa na i hnang taata a vawle nguoluo. Kama hing ca a bung pata a phyipakaw riy pathluo riypata hmuo a tla va ang.

⁸Kama ca tiy ta tiynawna ica pi yi, cuorasala ama ca Thlaapa Pathe tana tiynawna aca pi'a yi.

⁹Capa ningkhue lieca Zingsuv ca Nazareth pe Galilee taakhata a vaw te Jordan cavaa lie kha Johan ta tiy a naw.

¹⁰Tiy chung taata a kya thu pahne ta vuoruo a pahaw te Thlaapa kha thuvruv haata a cunglie a za cungpa kha a hmung.

¹¹Vuoruo taata ueryi kha a zuv te, “Nama ca i Duepa i Saacapaa tana na cuo, na cunglie i palung a tling hringhruo,” a ta.

¹²Cakhupahne Thlaapa ta Zingsuv ca ruochung luo kha aa chiy.

¹³Ruochung lieca ning sawliy chung aw te Setaa pasupaliyna kha a ang. Saa a hruopa zaw hne ta ama aw; cadyiseca avuoming ta ama ca ama aw khyi.

¹⁴Johan kha ama patuv khu taata Zingsuv ca Galilee luo kha vaa te Khazing[2] Thuophaabie kha a phu.

¹⁵ “Cuo ca a tling tli, Khazing pena ca aa ngie tli! A ngiepachiy ungla Thuophaabie hing zang tie ung,” a ta.

¹⁶Galilee riyliy kielie a cakuole pata ngaavaapa pahning, Simon hne a nuta Andru kha ngaa ama vaa nguoluo pata a hmung yi, tahematapakieca iema ca ngaa a vaapa tana ama cuo.

¹⁷Zingsuv ta, “Na ziy tie ung, cawsaa a patuvpa tana ica tue'a yi,” a ta.

¹⁸Amaa sue kha thuse yite ama ziyle paluo.

¹⁹A cawta a va cakuo vie pata a hrangpa uvcanu tie, Zebedi saacapaa Jeim hne Johan kha amaa sue ama thyi nguoluo pata a hmung yi.

²⁰A hmung pahne yi ta a ku yi ca ama paa Zebedi hne sawkawpalaw kha rehrietuv tie hne khata thusesiy yite ama kha ama ziy.

²¹Karpenaum khy luo kha va chiy yite Sabbath ning a vya chiy ca Zingsuv ca apungna-ing luo kha a ngie te phung a chang yi.

²²A pacuvnapa kha ama kharue a haasa, tahematapakieca phungbie pacuvtuv saya tie haata cuo li pata nawhnyituv pakha haata a pacuv nakaw yi ta a cuo.

²³Cakhupatahne ta apungna-ing chunglie a awpa, a pyalyipa thlaapa ta aa hryipapaa kha khi te,

²⁴“Naazaretpa Zingsuv, “Kiema hing tuokhaatama malie na tue khing? Malie na para khing ma? Ahungma tapa kha maca pachang, nama ca Khazing'a taata a vawpa A pathepa tana na cuo,” a ta.

²⁵Zingsuv ta, “A dieta tah aw, hingpapaa chung taahingta pya!” ta te a chuo.

²⁶A pyalyipa thlaapa cata cawsaapapaa ca khuosa ta siy te khuopuv ta a khi khu taata a chung taa cata a pya.

²⁷Cawsaazaapuv ca ama nang ta uo te pakha hne pakha kha, “Hingpa hing khaapatama a cuo? Naw hnyina cangta pacuvna thaapa tana a cuo! A pyalyipa thlaapa hmuo naw pi te a ri amaa ngie,” amaa ta.

²⁸A thuohlaa ca sungkha ta Galilee pe bangkhuo kha a ze paluo te a pathuo diy.

²⁹Apungna-ing taakhata ama[3] pya pahne Jeim hne Johan hne khata Simon hne Andru tie ing luo kha ama vaa.

³⁰Simon piynung ca a nge ling te iehmang cunglie a zaa zie nakaw kha ama chiy pahne ama chang paluo.

³¹Ama'a luo ca vaa te, a kuvbuo ta la te a padaa. A nge lingpa ca cakaa te iema kha a mangsang yi.

³²Zuoluo, ningtla khu taata a pasapa bangkhuo hne khuevuo ta a tuepa bangkhuo kha Zingsuv'a luo ca ama vya chiykhyi.

³³Khyming bangkhuo ca chiypakaa a thaa lie kha amaa hmya.

³⁴Pasana phangting ta a pasapa a hluvpuv kha patluo sa yite khuevuo hluvpuv zaw kha a papya. Khuevuo tie kha bie hehmuo pari sa vayi, tahematapakieca iema ta ama kha ama pachang.

³⁵Mawdiy khy dyi hluo ta Zingsuv ca thu te khyle ruoduona luo kha pya te thlaa a chuo.

³⁶Simon hne a viesaa zaw ta ama ca va huv yite,

³⁷ama hmung pahne, “Cawsaa bangkhuo tana aca huv yi,” ama ta.

³⁸Ama ta a paliepa yi ca, “Hingpa cahriy lie a awpa khyhrangpa luo zaw hing thuophaabie i phu the riypata tlaw ra'a ungpuv, tahematapakieca ama cana i vaw hnuochuopa ta a cuo,” a ta.

³⁹Cacuonakawta Galilee pe kha tlaw diy te, apungna-ing lie thuophaabie phu te khuevuo zaw kha a papya.

⁴⁰Caahminghmaa[4] a phyapa pakha ca Zingsuv'a luo kha a vaw te a pakhuv pane te,[5] “Na khing kieca ina pathe sa khu ciy,” tapata paa a kie.

⁴¹Zingsuv ta ngie a chisa[6] nakawta a kuv va pazuu te a hrie. “Ica pathe sa khing, pathe tie,” a ta.

⁴²Caahminghmaa pasanapa ta sungkha ta thuse te cawsaapapaa ca a pathe.

⁴³A raaringna khuosa ta a pi khu taata ama kha pathlie paluo te, Zingsuv ta,

⁴⁴ “Naathlie tie, hingpa kaw hing ahunghmuo chang'a vayi ciy; cadyiseca tluobyipa'a luo kha vaa la vaa pamang sa tie. Cakhutaata cawsaa ta a pathe tli tapa aca pachang na riypa yita Moses ta tue riypa a za tapa hriykhungrina kha va tue tie,” a ta.

⁴⁵Cuorasala cawsaapapaa ca pya te capa kaw ca hya zangsa pata a rile nakawta bie ca pathuo diy te, Zingsuv ca luohuo ta khychung luo a ngie nguo li pata khyle luo ruo lie kha aw te hmangting taata ama vya pangie.