Read Lautu Chin Marka 10 Bible Online

Marka 10 - Lautu Chin bible

Marka 10

¹Zingsuv ca capa hmang taacata pya te Judea pe, Jordan cavaa huesuo luo kha a vaa. Cawsaazaapuv ta vya pahlaw pakhaa hyi yite a tue tawpa haakhata a pacuv pakhaa hyi yi.

²Farasi tie chekha a vaw yite ama dyapasya khing pata, “Ma phungbie hingta napuv ma riypa a pa-aw ma?” ama ta.

³Zingsuv ta, “Moses ta khaapa nawbie ma aca pi yi?” a ta yi.

⁴Ama paliepa ca, “Moses taca, capaa pakha ca a napuv kha manapa caa a pi kieca a ma khu, malie a ta,” ama ta.

⁵Cuorasala Zingsuv ta, “Nama palung a cuo tuv nakawna hingpa nawbie hing nama cuota a cape pata a cuo.

⁶Cuorasala sahruo thu cuo ning taakhata, ‘Khazing ta canung hne capaa a sa yi’.

⁷‘Cacuonakawta capaa ta a paa hne a nung kha thuse'a yite a napuv kha a hlaw aa,

⁸pahning kha pangkha ta ama cuo aa’. Cacuonakawta iema ca pahning cuo va tli yi pangkha tana ama cuo.

⁹Khazing ta a pahlawpa yi ca ahungtahmuo che kha yi se.”

¹⁰Cakhutaata ing chunglie kha ziytuv tie ta capa kaw ama hiehriy pakhaa.

¹¹Zingsuv ta, “A napuv kha ma te canung hrang a hlawpa ca aparuvsuena a tuepa a cuo.

¹²Cahaangiethiecata a navaapa kha thuse te capaa hrang a hlawpa ca aparuvsuena a tuepa a cuo,” a ta yi.

¹³Cawsaa ta haatiy zaw kha a kuv ta taw naa se yi tapata Zingsuv'a luo kha amaa vaw khyi, cuorasala ziytuv tie ta cawsaa kha ama chuo.

¹⁴Cuorasala Zingsuv ta a hmung yi ca a hi haa te, ziytuv tie kyihuo kha, “Haatiy kha kama'a luo a vaw yi se, thlu kha ung, tahematapakieca Khazing pena ca hingpa haatiy zaw haapa cuo hing tana a cuo.

¹⁵Biehmisi tana ica chang yi: ahunghmuo cuose haatiy zaw haahingta Khazing pena a cuhluo lipa ca a chung luo a ngie khu'a va yi,” a ta.

¹⁶Cakhutaata haatiy tie kha a paw yite, a kuv kha ama cunglie khang te, thluechiy a pi yi.

¹⁷Zingsuv khy tlawna luo a tha ning kha cawsaa pakha kha a vya ruo te, a hmiekunglie a pakhuv vya pane te, “A phapa Saya, Chuozaa hringna cu riypata khaapama i tue aa?” a ta.

¹⁸Zingsuv ta, “Khaapanakawma a phapa ina ta ciy? Khazing ta li pata ahunghmuo pha vayi.

¹⁹Nawbie zaw ca na pachang thluo kha: Lie va naw kha; nungvaathingsuena tue kha; paruv kha; a cuo lipa bie lie malie vaa daakhyi kha; cawsaa va dung kha; na nung hne na paa va ciyzaa yi; tapata a cuopa kha,” a ta.

²⁰Capapaa cata, “Saya, hing nawbie bangkhuo hing i cawta baataata i ziy diy ciepa tana a cuo,” a ta.

²¹Zingsuv ta mang te duena hneta a tapa ca, “Suokha dyina na bu, cakuo la na hnyipa kha zaa la tuokaa kha siypasa tie pi tie yi, vuoruo lie a hnyirungpa na cuo aa, cakhutaata a vaw la kama kha na ziy tie,” a ta.

²²Capa bie a thyi tiyta minghmie pha li cangta ngiechisa pata a cakuo, tahematapakieca ama ca a hnyirungsapa ta a cuo.

²³Zingsuv ta ziytuv tie kha mang paky yite,” Khazing pena luo a hnyirungpa a ngie riypa hing khatluv tama a ruv aa!” a ta yi.

²⁴Ziytuv tie ca capa bie kawlie cata ama kharue a haa sa. Cuorasala Zingsuv ta, “I saa zaw, Khazing pena luo a ngie hing[21] khatluv tama a ruv!

²⁵A hnyirungpa Khazing pena luo a ngiepa laata kala-uv ciphang naakhue luo a ngiepa na a na vie,” a ta pakhaa yi.

²⁶Iema ca ama kharue haa hringhruo te, pakha hne pakha kha, “Cata a cuo kie, ahungma khuona ca a hmung khu aa?” amaa ta.

²⁷Zingsuv ta mang yite, “Hingpa hing cawsaa cuota ca cuo khu vyi, Khazing cuota ca a cuo khu; Zezaw bangkhuo hing Khazing cuota ca a cuo khu,” a ta yi.

²⁸Piter ta, “Kiema ca zezaw bang-khuo sise pate nama maca ziy tli,’ a ta.

²⁹Zingsuv ta, “Biehmisi tana ica chang yi: Kama hne thuophaabie kawlieta a ing a lu a cuo li kie a uvnu a cuo li kie a sieta a cuo li kie a nung a cuo li kie a paa a cuo li kie a saata a cuo li kie a lu zaw a thusepa ca

³⁰ata chuo chunglie hrahring hingta uvnu hne sieta, nung hne saata, ing hne lu zaw kha le zakha ta hmung'a te, hrisaathieruena zaw a hmung aa. A vaw riypa chuo lie zaw chuozaa hringna a hmung aa.

³¹Cuorasala atalie hmaa a sapa a hluvpuv hing hnang chuo'a yite, atalie hnang a chuopa a hluvpuv hing hmaa ama sa aa,” a ta.

³²Zingsuv hne ziytuv tie ca Jerusalem luo ama si nguoluo ning kha, Zingsuv ca hmaa luo kha a cakuolu. Ziytuv tie ca ama nang ta uo te, a hrangpa ama hnang a paziy lepa tie zaw ama thlaa a zangsa. Zingsuv ta ziytuv hlyihning tie kha a hrang ta ku pakhaa yite a cunglie a tlung riypa kaw kha a chang yi.

³³“Mang tie ung, Jerusalem luo ma sithaw nguoluo ung hing, Cawsaa Saacapaa hing tluobyilepa tie hne phungbie saya tie kuv luo pi pata cuo'a te, iema ta thie riypata bie chi'a yite Jentail ming kuv luo kha ama pi aa.

³⁴Ama tue hyalya aa, ama paciy ta ama pacha aa, sungpe ta chi'a yite ama thie aa, ningthung khu taata a thupakhaa aa,” a ta yi.

³⁵Cakhutaata Zebedi saacapaa Jeim hne Johan ta Zingsuv'a luo kha a vaw yite, “Saya, khaapa maacaa hie zaw ta malie na tuepa riypatana maca khing,” ama ta.

³⁶Zingsuv ta, “Khaapa malie tuepa se tapa ma ina khing ungciy?” a ta yi.

³⁷Iema ta, “Na rungnaana chunglie, na cacuo luota pakha, na cavyi luota pakha a tuna naw malie pi tie,” ama ta.

³⁸Cuorasala Zingsuv ta, “Khaapama ina hie ungciy tapa pachang va ungciy. I dang riypa panuo hing nama dang khu'a ma? A cuo li kie i tiy a naw riypa haahingta namaa naw khu'a ma?” a ta yi.

³⁹Iema ta, “Ma tue khu thluo aa,” ama ta. Zingsuv ta, “I dang riypa panuo hing nama dang khu sasaw thluo aa, tiy i naw riypa zaw hing namaa naw khu sasaw thluo aa.

⁴⁰Cuorasala i cacuo hne i cavyi luo a tu riypata pi khuna naw ca hnyi va ang, cuorasala capa hmang ca tingpa paciepa tie cuotana a cuo,” a ta yi.

⁴¹Pahraa tie ta capa bie ama thyi tiyta, Jeim hne Johan cunglie kha ama hi a haa.

⁴²Cacuonakawta Zingsuv ta ama palang khata u yite, “Chuelyi ming hraw lieca uvtuv tapa tie ta uvpa tie cunglie kha a pale yite ama khing ta ama awpa kha nama pachang.

⁴³Cuorasala niema hraw lieca cahaa cata cuo'a vyi; cuorasala nama hrawlie a lecepa a cuo khingpa ca nama changtaapa a cuo riypatana a cuo,

⁴⁴pakhana a cuo khingpa ca nama palang sii kha a cuo riypata a cuo.

⁴⁵Cawsaa Saacapaa hmuota hriepa pa cuo li pata, hriepatuv cuo riypa hne cawsaa hluvpuv a thlana riypata a hringna pi riypata muo aa vaw ta,” a ta.

⁴⁶Zingsuv hne ziytuv tie ca Jeriko luo kha ama chiy. Ziytuv tie'a nata cawsaazaapuv hneta Jerusalem taata ama pya ning kha Timau saacapaapa, a mingcuepa a hielepapaa Bartimu kha luopuv kielie a zaa tu.

⁴⁷Nazareth khypa Zingsuv na a cuo tapa a pachang tiyta khuosa ta khi te, “Zingsuv! David Sapaa! ngie na chi thi tie!” a ta.

⁴⁸Cawsaa hluvpuv ta ama kha thla yite duo riypata ama chang, cuorasala David Sapaa, ngie na chi thi tie ta te khuo vie ta a khi hryly.

⁴⁹Zingsuv ta a daa te, “Va ku ung,” a ta yi. Cacuonakawta mingcuepaa ca ku yite, ‘Na palung tluosa se, thu tie, aca ku cuv,” ama ta.

⁵⁰A pang kha thaw te, a cathlu te Zingsuv'a luo kha aa vaw.

⁵¹Zingsuv ta, “Khaapa na tuepa se tapa ma na khing,” a ta. Mingcuepaa ta, “Saya, I hmung pakhaa khing sa,” a ta.

⁵²Zingsuv ta, “Cakuo tie, na zangna na caa patluo sa,” a ta. Sungkha ta a ming ca vuo paluo te luopuv lie kha Zingsuv ca a ziyle.